Ruuka 8 - INDAGANO INYA:YA

Yesu naribata nara:sya

¹ Wejire gwatura omwanya muto:to, naribata mu misi eminene ne mito:to, nara:sya no kweresya Ebigambo byo bwana byo bukama bwa Nyamuanga, na bariya rikumi na babiri bari aamwi nage,

² aamwi na bagasi abandi banu ariga aonyisye emisambwa na jindwara, nibo banu, Maryamu unu atogwaga Magadalene, unu aso:kerweko emisambwa emibi:bi eta:nu ne:biri,

³ Na Joana muka Kuja, omubi:ki we bi:nu bya Erode, na Susana, na bandi ba:fu banu bamusakiraga ku bi:nu byebwe.

Ecijekekanyo co mubibi

⁴ Ecise cinene wejire ce:kofyanya na banu baso:kaga mu misi jo:ne wejire bamu:jako, na:ika ecijekekanyo ati,

⁵ Omubibi e:mukire okujo:biba imbibo yae. Mbe anu ariga acabiba, ejindi nijigwa ku mbari ya injira, nijitajirirwa, jinyonyi ja mu rutumba nijijirya.

⁶ Ejindi nijigwa ku rutare. Wejire jamera nijiotoka kurwo kuburwa amanji.

⁷ Ejindi nijigwa mu mawa. Aonao amawa nigamera aamwi najo nigajisoritya.

⁸ Ejindi nijigwa mu maaru go bwana, nijimera nijitwasya amatwasyo kwiya egana-gana. Wejire amara okwaika emisango ejo, na:ikirira inguru ati, Unu ari na matwi go kungwa nongwe.

⁹ Abe:igisibwa bae nibamubu:sya ati, ?Ecijekekanyo eco niki?

¹⁰ Na:ika ati, Emwe mwayabirwe okumenya obumbise bwo bukama bwa Nyamuanga, nawe abandi abongwa mu bijekekanyo, korereki bakarora bareme okubona, no kungwa bakongwa bareme okusombo:kerwa.

¹¹ Ecijekekanyo nico cinu, Imbibo nigwo omusango gwa Nyamuanga.

¹² Baliya aba ku mbari ya injira nibo abongwa. Mbe niwo Syetani naja, nakwaburamo omusango mu mitima jebwe, bareme okwikirisya no kuonyibwa.

¹³ Na ba ku rutare, nibo abongwa omusango nibagwikirisya no kukonderwa. Nawe hatari na misi, nibe:kirisya kasinjeke, na mu siku jo kusakwa nibe:bere:ra.

¹⁴ Na jinu jagu:ye mu mawa abo nibo abongwa, nibagenda nibaingirirwa no kwigana kwo buanga bunu, no buni:bi bwabwo no rumura rwabwo, nibaremo:twasya ge:maririye.

¹⁵ Ne:ja mu maaru go bwana, abo nibo abongwa omusango no mutima gwerere na gwa bwana, nibagurumya, nibatwasya amatwasyo mu kwigumirisya.

Ecijekekanyo ca itara (Mt. 5:15; Mk. 4:21-23)

¹⁶ Atario mu:nu unu kakongesya itara naifundikira mu ci:bo, amwi atakuitu:ra mwifu:fu, nawe kaitu:ra ku cikango korereki banu abengiramo barore obweru.

¹⁷ Okuba gutario musango gunu guserekerwe gunu gutaribu:risibwa, nakabee gwa bwitebe gunu gutarimenywa no kubu:rika abweru.

¹⁸ Mbe mukabuke kutyo omungwa, okuba unu ane bi:nu ariyabwa, na unu atari na ci:nu, arite:sibwa na cinu ke:ganirisya ati ndinaco.

Nyiramwene na ba:na ba:bo nibayenja Yesu

¹⁹ Mbe nyiramwene na ba:na ba:bo nibaja anu ariga:ri, nibatamibwa okumukingako kurwe cise.

²⁰ Nabwirwa ati, Nyokomwana na ba:na ba:nyu bemereguyu anja, abenda okukurora.

²¹ Omwene naindura nababwira ati, Mai na ba:na ba:su nibo banu abongwa omusango gwa Nyamuanga nibagukora.

Yesu nagonya amatuma

²² Ku rusiku rumwi nasyabara mu bwato, omwene na be:igisibwa bae. Nababwira ati, Ciunguke cije ku ngego yenderya eya inyanja. Nibagenda.

²³ Anu bariga nibagenda, nibasirwa amatanga, naongera jintiro. Omuyaga mwafu niguutu:tura ku nyanja. Obwato nibwamba okwijura amanji, nibaba mu masika.

²⁴ Nibamutako nibamurafya niba:ika ati, Mukaruka, mukaruka, cafwa. Narafya nagonya oinuyaga no kusa:ruma kwa manji, nibite:kana ndiba etore.

²⁵ Na-babu:sya ati, ?Okwikirisya kwemwe kubee a:ki? Nibo:baya nibarugu:ra, niba:ika abe:ne:ra ati, ?Ka niga unu? Okuba omuyaga na manji kabiragirira nibimungwa.

Omusasi wa Bageresene

²⁶ Nibagoba mu:si ya Bageresene inu eirore:rera Galilaya.

²⁷ Nasyokamo nakinga ku njekekera, nabonana no mu:nu unu aso:kere mu musi, unu ariga:ri ne misambwa, amarire siku nyafu kufwara ngubo uri, atace:kara mu nyumba, nawe mu bitu:ro.

²⁸ Wejire arora Yesu, na:ikirira inguru, nafukama imbere yae, na:ika na buraka bunene ati, ?Ecifuno niki anye na:we, Yesu Omwana wa Nyamuanga unu ari inguru muno? Enikuremberesya utaja ku:nya:sya.

²⁹ Okuba ariga naragirira omusambwa omujabi okuso:ka mu mu:nu uyo, okuba ariga amarire siku nyafu gumuungire. Aboywaga mu nyoro na mu masega, nibamurinda. Natemyaga binu byariga bimuboere, omusambwa nigumuirisisyaga ibara.

³⁰ Yesu namubu:sya ati, ?Risi:na ryao nawega? Na:ika ati, Regioni, okuba misambwa myafu jariga jimwingiyemo.

³¹ Nijimuremberesya ati, utaciragirira okuso:kamo no kugenda mu ryobo.

³² Mbe ryariga ririo eijo rya jingurube nyafu nijire:bera ku ci:ma, nijimuremberesya ajiragirire jijo:kujingiramo. Naji:kirisya.

³³ Mbe emisambwa ejo nijiso:ka ku mu:nu uyo nijingira mu ngurube. Riijo niriurutukira ku bugema nijigwirira mu nyanja, nijifwira mu manji.

³⁴ Abare:fi wejire barora jinu jabao, nibabirima, nibaja:ika mu misi na mu ndimiro.

³⁵ Aba:nu niba-so:kayo okujo:rora jinu jabao. Niba:ja ku Yesu, nibarora omu:nu uyo aso:kwamo emisambwa, enyanjire mu maguru ga Yesu, afwae acore:rere, nibo:baya.

³⁶ Na banu barorere nibababwira kutyo aonyibwe oyo ariga aungirwe emisambwa.

³⁷ Na ba:nu bo:ne aba mu:si ya Bageresene inu yariga isije:ne nibamuremberesya abaso:keko, okuba obu:ba bwafu bwariga bubagwatire. Mbe nasyabara mu bwato nasubayo.

³⁸ Nawe omu:nu unu aso:kerweko emisambwa namuremberesya abega nage. Mwene namuku:ra na:ika ati,

³⁹ Suba ike:wao, ubabwire emisango eminene jinu Nyamuanga akukorera. Nagenda nara:sya mu musi gwone emisango eminene jinu Yesu amukoree.

Omwana wa Yairo, no mugasi wo bure:gu

⁴⁰ Mbe Yesu wejire asuba, ecise nicimuramira cikondeywe, okuba bo:ne bariga nibamurindirira.

⁴¹ Mbe naja omu:nu, risi:na ryae Yairo, unu ariga:ri mukuru we rikofyanyisyo, nagwa mu maguru ga Yesu, namuremberesya engire mu nyumba yae,

⁴² okuba ariga:ri na muyasya wae, e:buywe enyere, unu ariga amarire myaka ekumi ne:biri, ariga ajo:kufwa. Yesu anu ariga aca:genda ebise nibimuiganya.

⁴³ Na:ja omugasi unu ariga arwae obure:gu myaka ekumi ne:biri, ariga amariye ebi:nu byae byone ku bafumu, nibatamibwa bo:ne okumuosya.

⁴⁴ Oyo namuso:ka inyuma naku:nia ku mufunjo gwe cifwaro cae. Aonao obure:gu bwae nibutemekera.

⁴⁵ Yesu Na:ika ati, ?Unu anku:niako niga? Wejire be:ga:na bo:ne, Petero na be:ja:bo niba:ika ati, Ratabugenyi, ebise bikusingiye nibikuiganya, ka awe owa:ika ati, ?Niga anku:niako?

⁴⁶ Yesu na:ika ati, Mu:nu anku:niako, okuba enungwa amanaga ganso:kamo.

⁴⁷ Mbe omugasi uyo ejire arora ati, atakutura kwiibisa, na:ja nayarara namwifukamira, namubwirira imbere ya ba:nu bo:ne cinu cakora namuku:niako, na kutyo aora aonao.

⁴⁸ Namubwira ati, Muyasya wani, okwikirisya kwao kwakuosya. Genda no murembe.

⁴⁹ Mbe anu ariga aca:ika, na:ja omu:nu unu aso:kere mu nyumba yo mukuru we rikoryanyisyo na:ika ati, Omuyasya wao afu:ye. Wasiga kumunya:sya omwiigisya.

⁵⁰ Nawe Yesu ejire ongwa, namuindura ati, Uto:baya, ikirisya:ra kajo:ona.

⁵¹ Wejire akinga mu nyumba, ate:kirisisye mu:nu undi kwingira nage, tari Petero na Yakobo na Yoana nesemwene mwana, na nyiramwene.

⁵² Mbe anu bariga nibarira bo:ne nibamuririra, omwene na:ika ati, Mutaja kurira, okuba atafu:ye nawe aongee era.

⁵³ Nibamuseka nibamugomberera, okuba bariga bamenyere ati afu:ye.

⁵⁴ Omwene namugwata okuboko na:ikirira inguru ati, Muyara imuka.

⁵⁵ Omwoyo gwae nigusubamo, ne:meregulu aonao. Nababwira okumuyana ebiryo.

⁵⁶ Abe:busi bae nibarugu:ra. Nawe omwene nabaragirira batabwirako mu:nu jinu jabao.