Obhusweruro 8 - INDAGANO INYA:YA

Eciboero ca kata:nu na kabiri—jiŋombi

¹ Wejire asurumura eciboero ca kata:nu na kabiri, nikaba kajibijibi mu rwire mwanya gwa nusu saa.

² Nindora bamaraika bata:nu na babiri banu be:mere-guyu imbere ya Nyamuanga. Nibayabwa jiŋombi eta:nu ne:biri.

³ Maraika oundi na:ja ne:mereguru ku cigabiro, ari na impiki ya ijaabu. Nayabwa emigaju myafu, korereki ajisasye no kusabwa kwa be:ru bo:ne ku cigabiro ca ijaabu cinu cariga imbere ye citebe ca iŋoma.

⁴ Na ingesi yo mugaju ni:so:ka ku kuboko kwa maraika, ni:rinya imbere ya Nyamuanga, aamwi no kusabwa kwa be:ru.

⁵ Maraika oyo nagega impiki, naijusya omuriro gwa ku cigabiro, naye:sa ku ca:ro. Nigabao amabaruka, na maraka, na jindafi, ne ciyararo.

⁶ Niwo bamaraika abata:nu na:babiri banu bariga na jiŋombi eta:nu ne:biri nibe:ra:ba okubuma.

Iŋombi yo kwamba

⁷ Maraika wo kwamba nabuma iŋombi, ni:ba ŋuba ya mabui no muriro, bisasisye na manyinga, nibyeswa ku ca:ro. Na riba:ra rya kasatu erye ca:ro niriya, na riba:ra rya kasatu erya mati niriya, na manya:si amabisi go:ne nigaya.

Iŋombi ya kabiri

⁸ Maraika wa kabiri nabuma iŋombi, eci:nu cinu cisusene ci:ma cinene nice:swa mu nyanja. Na riba:ra rya kasatu erya inyanja niriba manyinga.

⁹ Nibifwa riba:ra rya kasatu erye bi:nu byo buanga ebya mu nyanja. Na riba:ra rya kasatu erya ma:to nigasimagira.

Iŋombi ya kasatu

¹⁰ Maraika wa kasatu nabuma iŋombi, mbe injota ni:so:ka mu rwire, niyaka rwo rumuri, ni:gwa kwiba:ra rya kasatu erye misima, na ku binyo bya manji.

¹¹ Na risi:na rya injota eyo eritogwa Nyabusungu. Na riba:ra rya kasatu erya manji nigarura, na ba:nu ba:fu nibafwa kurwa manji okuba ga:rusi:bwe.

Iŋombi ya kana

¹² Maraika wa kana nabuma iŋombi, na riba:ra rya kasatu erya risu:ba niribumwa, na riba:ra rya kasatu eryo kwesi, na riba:ra rya kasatu erya jinjota, korereki riba:ra ryabyo erya kasatu ribe cisu:te, no mwisi gusige kwatika riba:ra ryagwo erya kasatu, na mu ngeta one kutyo.

¹³ Nindora ninungwa iŋona ni:guruka aagati yo rwire, niyaika na buraka bunene ati, Jababona, jababona, jababona, emwe banu mwikae ku ca:ro, kurwa maraka ga jiŋombi ja bamaraika abasatu banu baja okubuma.