Obhusweruro 3 - INDAGANO INYA:YA

Eya ku kanisa ya Saridi

¹ Yandikira intumwa ya ikanisa ya Saridi ati, Unu ari ne Myoyo eta:nu ne:biri eja Nyamuanga na jinjota eta:nu ne:biri, niwe ka:ika ati, Nimenyere ebikorwa byao ati, uri na risi:na uti uri muanga, ke:nu ufu:ye.

² Tengeja, urumye binu byasigaeo binu byariga nibyendo:kufwa, okuba nitarorere ku bikorwa byao binu biku:miye imbere ya Nyamuanga wani.

³ Mbe icuka kutyo waramiye na kutyo wonguywe. Ubigwate ebyo, ute. Mbe ukarema okutengeja, ndi:ja rwo mwifi, amwi utarimenya saa inu ndikwijirako.

⁴ Nawe uri na masi:na mato:to mu Saridi ga banu batajabiasisye ngubo jebwe. Abo bariribata aamwi nanye bafwaye jingubo jinyeru, okuba be:ire.

⁵ Nyaburiko na unu kaiga arifwafibwa jingubo jinyeru. Amwi jinitarisimya esi:na ryae mu citabo co buanga na katyari, Ka nditogora risi:na ryae imbere ya Rata, na imbere ya bamaraika bae.

⁶ Unu ari no kutwi, nongwe jinu Omwoyo kabwira jikanisa.

Eya ku kanisa ya Filadefia

⁷ Yandikira intumwa ya ikanisa ya Filadefia ati, Omweru no we cimari, unu ari no rufunguro rwa Daudi, na ka unu ke:gura, amwi atario unu ke:gara, ka unu ke:gara amwi atario unu ke:gura, niwe ka:ika ati,

⁸ Nimenyere ebikorwa byao. Rora, natee orwigi runu rwiguye imbere yao, amwi omu:nu wo:ne atakutura kwigara. Nimenyere ati, uri na managa mato:to, nugwata omusango gwani, amwi ute:ga:nire esi:na ryani.

⁹ Rora, banu aba mu rikofyanyisyo rya Syetani, banu abe:toga Bayaudi, ke:nu hatari nibo nawe ababeya, mbe ndibare:ta oku:ja okuramya imbere ye bigere byao, korereki bamenye ati anye nikwendere.

¹⁰ Okuba wagwatire omusango gwani ogwo kwigumirisya, anye one ndikurinda usige kwingira mu mwanya gwo kusakwa gunu ogwenda oku:ja ku ca:ro co:ne okubasaka banu be:kae mu ca:ro.

¹¹ Eni:ja bwangu. Rumya cinu uri naco, omu:nu wo:ne asiga kukugegera orutenga rwao.

¹² Unu kaiga, ndimukora ŋingi mu yekaru ya Nyamuanga wani, amwi atarisuba kuuruka anja. Anye ndimwandikako risi:na rya Nyamuanga wani, na risi:na ryo musi gwa Nyamuanga wani, nigwo Yerusalemi omuya:ya gunu ogwika okuso:ka ku Nyamuanga wani mu rwire, na risi:na ryani riya:ya.

¹³ Unu ari no kutwi, nongwe jinu Omwoyo kabwira jikanisa.

Eya ku kanisa ya Laodikia

¹⁴ Yandikira intumwa ya ikanisa ya Laodikia ati, Oyo ari Amina no mwimako omwiikanyibwa, no wo kwamba wo kuanga kwa Nyamuanga, niwe ka:ika ati,

¹⁵ Nimenyere ebikorwa byao ati, utanyiriye amwi utakubira. Kumba unyiriye amwi nubira.

¹⁶ Mbe okuba uri ne:birabira, amwi utanyiriye amwi utakubira enijo:kukutanaka mu kanwa kani.

¹⁷ Okuba owaika ati, Ndi muni:bi nani:bire, amwi nitari na cinu nikenere. Ka na utakumenya ati uri mutaka, no wo kufwirwa ecigongo, no mukene, no muofu, na ka uri tuyu.

¹⁸ Mbe nikubwire obwenge ati, nugure kwanye ijaabu inu yesibwe mu muriro, korereki uni:be. Ugure na jingubo jinyeru korereki ufware, jiswaro jo buju:re bwao jisige kuboneka. Ugure no muti gwo kubambaga ku me:so gao korereki urore.

¹⁹ Enibagonya no kubatongera bo:ne banu enenda. Mbe kome:raga, ute.

²⁰ Rora, nimereguyu ku rwigi enibirikira. Omu:nu wo:ne akongwa oburaka bwani, ne:gura orwigi, anye eningira ku mwene, nindya aamwi nage, no mwene one karya nanye.

²¹ Unu kaiga ndimuyana okwiyanja aamwi nanye ku citebe ca:ni eco bukama, rwanye one kutyo naigire nininyanja aamwi na Rata ku citebe cae eco bukama.

²² Unu ari no kutwi, nongwe jinu Omwoyo kabwira jikanisa.