Obhusweruro 21 - INDAGANO INYA:YA

Orwire oruya:ya na i:si inya:ya

¹ Nindora orwire oruya:ya na i:si inya:ya, okuba orwire rwo kwamba na i:si yo kwamba byaoeo, na inyanja itacariwo.

² Nindora omusi omweru, nigwo Yerusalemi omuya:ya, nigwika okuso:ka mu rwire ewa Nyamuanga, gucumacumire rwo mwenga unu kacumacumirwa omurume wae.

³ Ninungwa oburaka bunene nibuso:ka ku citebe ca iŋoma, nibwaika ati, Rora, obwikaro bwa Nyamuanga buri aamwi na ba:nu. Ari:kara aamwi nabo, na bene bariba ba:nu bae. Na Nyamuanga aribaga aamwi nabo, niwe Nyamuanga webwe.

⁴ Omwene aryeya amasiga go:ne mu me:so gebwe. Okufwa kutarisuba kubao rindi. Amwi jitarisuba kubao mamu, amwi kurira, amwi kwasibwa okuba ebyo kwamba byaoeo.

⁵ Oyo enyanjire ku citebe ca iŋoma na:ika ati, Rora enibikora byone kuba biya:ya. Na:ika ati, Yandika, okuba emisango jinu ni jo kwiikanyibwa na je cimari.

⁶ Nambwira ati, Jaku:miye. Nanye Alufa na Omega, nanye obwambiro no bute:ro. Unu ari no bwiro ndimunywesya ku cinyo ca manji go buanga kutyo era.

⁷ Unu kaiga arirya binu omwandu. Anye niriba Nyamuanga wae, no mwene naba mwana wani.

⁸ Nawe abo:ba na banu batakwikirisya, na banu abafururusya, na be:ti, na baromesi, na ba maiku, na banu abaramya ebisusano, na bo rurimi bo:ne, omugabo gwebwe guriba mu nyanja inu eyaka omuriro ne cibiriti. Okwo nikwo okufwa kwa kabiri.

Yerusalemi omuya:ya

⁹ Na:ja umwi ku bamaraika bata:nu na babiri banu bariga bari ne bibiga bita:nu na bibiri binu byariga bi:juye ebinya:syo bita:nu na bibiri ebya ku bute:ro. Na:ika nanye ati, Ija, nje nikweresye omwenga, niwe omugasi wo Mwana wa Ina:ma.

¹⁰ Nangegera mu Mwoyo kukinga ku ci:ma ecinene cire:ra, nanyeresya omusi omweru gunu ogutogwa Yerusalemi, nigwika okuso:ka mu rwire ku Nyamuanga.

¹¹ Gwariga na rikusyo rya Nyamuanga, nigweŋengeta rwa ribui ryo bugusi oburambu muno, rwa ribui rya yasepi yo munyerwe rinu erirabangirya.

¹² Gwariga na indugu nene nde:ra, na marango ekumi na gabiri. Na ku marango bariga bario bamaraika ekumi na babiri, na ka gandikirweko amasi:na ga jiŋanda ekumi ne:biri eja ba:na ba Israeli.

¹³ Orubara rwe buturuka gariga marango gasatu, na mu murungu marango gasatu, na mu marimbe marango gasatu, ne bugwa marango gasatu.

¹⁴ Indugu yo musi yariga iri ne misingi ekumi ne:biri, nigabako amasi:na ekumi na gabiri aga jintumwa ekumi na babiri abo Mwana wa Ina:ma.

¹⁵ Unu ariga na:ika nanye ariga:ri na risa:ru rya ijaabu eryo kurengera, korereki arenge omusi na marango gagwo, na indugu yagwo.

¹⁶ Omusi gwariga guriŋene-riŋene mbara jo:ne. Obure:ra bwagwo bwariga rwo bugari. Narenga omusi na risa:ru. Narenga mairi 1,500. Obure:ra bwagwo no bugari no bwamba buriŋene.

¹⁷ Narenga na indugu yagwo. Yariga maboko egana na makumi gana na gana (144) rwa indengo yo mu:nu, niyo eya maraika.

¹⁸ Indugu yagwo yariga yumbakirwe ya yasepi yo munyerwe. No musi gwariga gwa ijaabu nde:si, rwa rirore ryo bwana.

¹⁹ Emisingi ja indugu yo musi jirebekere na mabui go:ne ago bugusi oburambu. Omusingi gwo kwamba gwariga gurebekere na yasepi yo munyerwe, ogwa kabiri safiro yo mu:rura, ogwa kasatu karikedoni ya mabara-bara, ogwa kana sumaradi yo munyerwe.

²⁰ Ogwa kata:nu onikisi ya mabara-bara, ogwa kata:nu na gumwi sadio nukurasi, ogwa kata:nu na kabiri kirisorito yo munyerwe, ogwa kata:nu na kasatu berulo yo mu:rura, ogwa kata:nu na kana topasi ye ciwondo, ogwa rikumi kurisopuraso yo munyerwe, ogwa rikumi na gumwi jakinto yo ruyoyo, ogwa rikumi na kabiri ametisto yo ruyoyo.

²¹ Amarango ekumi na bagiri gariga ga ru:ru ekumi ne:biri. Buri irango ru:ru imwi. Injira yo musi yariga ya ijaabu nde:si, rwa rirore rinu erirabangirya.

²² Nitabwenemo yekaru, okuba iyekaru yendemo niwe Ratabugenyi Nyamuanga unu katura byone, no Mwana wa Ina:ma.

²³ Amwi omusi ogwo gutakenere esu:ba amwi kwesi kusekamo, okuba rikusyo rya Nyamuanga niryo eritamo bweru, na itara yendemo niwe Omwana wa Ina:ma.

²⁴ Amaanga gariribatiraga mu bweru bwagwo, na bakama be ca:ro barire:tamo rikusyo ryebwe.

²⁵ Amarango gagwo gatari:garwa na katyari mu mwisi, okuba omwo ingeta itaribamo.

²⁶ Ka barire:tamo rikusyo ne cibaro ca maanga.

²⁷ Eci:nu co:ne cinu cite:rere citaringiramo na katyari, amwi unu kakora binu ebifururusya ne byo rurimi, tari abo era banu bandikirwe mu citabo co buanga eco Mwana wa Ina:ma.