Obhusweruro 2 - INDAGANO INYA:YA

Inyaruba ya ku kanisa ya Efeso

¹ Yandikira intumwa ya ikanisa ya Efeso ati, Unu kagwata jinjota eta:nu ne:biri mu kuboko kwae okwe buryo, unu karibatira agati ya jitara eta:nu ne:biri eja jijaabu, niwe ka:ika ati,

² Anye nimenyere ebikorwa byao, no kukome:ra kwao, no kwigumirisya kwao, na rwa kutyo utakutura kwigumirisisya ababi:bi, nawe wabasakire banu abe:toga jintumwa ke:nu hatari nibo, nubarora ati ababeya.

³ Ka we:gumirisyaga niwi:kome:sya kurwa risi:na ryani, amwi utaigirwe.

⁴ Nawe ndi no musango kwawe ati, wasigire okwenda kwao okwo kwamba.

⁵ Mbe icuka enu waguye, ute, ukorega ebikorwa byo kwamba. Araba utakukora kutyo eniku:jako, ninso:syao itara yao awayo, ariba utatee.

⁶ Nawe uri no musango gunu ati, utamangenwe ne bikorwa bya Banikolaiti, binu anye one nitamangenwe nabyo.

⁷ Unu ari no kutwi, nongwe jinu Omwoyo kabwira jikanisa. Unu kaiga ndimuyana okurya kwiti ryo buanga, rinu riri mu Paradiso ya Nyamuanga.

Eya ku kanisa ya Simurina

⁸ Yandikira intumwa ya ikanisa ya Simurina ati, Owo kwamba no wa ku bute:ro, Unu ariga afu:ye, nasuba okuba muanga, niwe ka:ika ati,

⁹ Nimenyere okunya:sibwa kwao no butaka bwao, nawe uri muni:bi. Nimenyere no kufuma kwa banu abe:toga Bayaudi, ke:nu hatari nibo, nawe ni ba rikofyanyisyo rya Syetani.

¹⁰ Uto:bayaga okunya:sibwa kunu oujo:bona. Mbe, Syetani kajo:kwesa abandi mwimwe mu mabubusi, korereki musakwe. Murinya:sibwa siku ikumi. Ubega mwiikanyibwa kukinga kufwa, anye ndikuyana orutenga rwo buanga.

¹¹ Unu ari no kutwi, nongwe jinu Omwoyo kabwira jikanisa. Unu kaiga atarirumwa kufwa kwa kabiri na katyari.

Eya ku kanisa ya Perigamo

¹² Yandikira intumwa ya ikanisa ya Perigamo ati, Unu ari ne cinyambutu ca mo:gi agabiri ka:ika ati,

¹³ Nimenyere anu wikae niwo ciri ecitebe ca iŋoma eca Syetani. Na ka ugwatire muno risi:na ryani, amwi utaremere kwikirisya anye, nakabee mu siku ja Antipa omwiikanyibwa wani unu anyimireko, unu e:tiywe mwimwe anu Syetani e:kae.

¹⁴ Nawe ndi ne misango mito:to kwawe, okuba uriyo na banu abagwata okwi-igisya kwa Balaamu, unu e:igisisye Balaki okutao eci:ku:juro imbere ya ba:na ba Isiraeli, barye binu byaso:sibwe co:go ku bisusano no kukora oburomesi.

¹⁵ Na:we one nikwo kutyo uri na banu abagwata okwiigisya kwa Banikolaiti.

¹⁶ Mbe nute. Ukarema okuta, eniku:jako bwangu, nindwana nabo ne cinyambutu ca mu kanwa ka:ni.

¹⁷ Unu ari no kutwi, nongwe jinu Omwoyo kabwira jikanisa. Unu kaiga ndimuyana emanu inu ibisire, ka ndimuyana ribui:ryeru, na kwibui eryo ryandikirweko risi:na riya:ya, rinu mu:nu wo:ne atakumenya tari unu kayabwa.

Eya ku kanisa ya Tuatira

¹⁸ Yandikira intumwa ya ikanisa ya Tuatira ati, Omwana wa Nyamuanga, unu ari na me:so ganu gari rwa jimbesi jo muriro, ne bigere byae bisusene rwe cu:ma ecitukurasi cinu ciku:bire memo.

¹⁹ Nimenyere ebikorwa byao, no kwenda kwao, no kwikirisya kwao, no kufurubenda kwao, no kwigumirisya kwao. Ne bikorwa byao ebya ku bute:ro ni byafu kukira ebyo kwamba.

²⁰ Nawe ndi no musango kwawe, okuba utakuganya omugasi uriya Yejebeli unu ke:toga muragi, ne:igisya nayabya abagaya bani ati, baromerega no kurya binu byaso:sibwe co:go ku bisusano.

²¹ Namuyae omwanya gwo kuta, nawe atakwenda kuta mu buromerwa bwae.

²² Rora, enimwesa ku buriri, nimbe:sa banu baromeranaga nage mu kunya:sibwa kwafu, bakarema okuta mu bikorwa byae.

²³ Ka na ba:na bae ndibe:ta no rufu, ndijei jikanisa jo:ne nijimenya ati, nanye unu enitatirisya obwiganirisya no mutima, ka ndiyana buri mu:nu mwimwe rwe bikorwa byae kutyo biri.

²⁴ Nawe enibabwira, emwe abandi abende Tuatira, bo:ne banu mutana kwiigisya okwo, ka banu mutamenyere ebyo bwina bya Syetani rwa kutyo aba:ika. Emwe nitakubatu:rako mugugu gundi.

²⁵ Nawe cinu munaco mucigumyega kukinga anu ndi:jira.

²⁶ Mbe unu kaiga, nagumya ebikorwa byani kukinga ku bute:ro, oyo ndimuyana okutunga amaanga.

²⁷ Aribatunga na isimbo ye cu:ma rwa jinyungu jo mumogi kutyo eja:twa. Okuba nikwo nayabirwe Rata.

²⁸ Ka ndimuyana injota ya katondo.

²⁹ Unu ari no kutwi, nongwe jinu Omwoyo kabwira jikanisa.