Obhusweruro 13 - INDAGANO INYA:YA

Rityanyi rinu ryaso:kere mu nyanja

¹ Nindora rityanyi niriso:ka mu nyanja rinu riri na maembe ekumi ne mitwe eta:nu ne:biri. Na ku maembe gayo jariga jiriko nenga ekumi, na ku mitwe jayo gandikirweko amasina go kufuma.

² Na rityanyi rinu narorere ryasusanaga rwa ingo, ne bigere byaryo byariga nibisusana rwe bya ritarago, no munwa gwaryo gwariga rwo gwa intare. Na riyoka niryo ryariyae amanaga garyo ne citebe caryo ca iŋoma no buinga bwafu.

³ Nindora omutwe gwaryo gumwi gusomere bwiti, na riuta ryaryo ryo kufwa niriora. Ne ca:ro co:ne nicirugu:ra niciru:ba rityanyi.

⁴ Nibaramya riyoka, okuba ryariyae obuinga bwaryo. Nibaramya rityanyi niba:ika ati, ?Niga unu kasusana na rityanyi rinu? ?Ka niga unu katura okurwana naryo?

⁵ Niriyabwa omunwa gunu ogwaika ebikuru ne byo kufuma. Niri:kirisibwa okumara me:si makumi gana na gabiri.

⁶ Niryasamya omunwa gwaryo nirifuma Nyamuanga, nirifuma risi:na ryae, na riyema ryae, na banu be:kae mu rwire.

⁷ Niriyanwa okurwana na be:ru no kubaiga. Niriyanwa amanaga ku ŋanda jo:ne, na ku ba:nu ba nyami jo:ne, na ku ba nyaika jo:ne, na ku maanga go:ne.

⁸ Na baririramya ba:nu bo:ne banu be:kae mu ca:ro, banu bo:ne amasi:na gebwe gatandikirwe mu citabo co buanga eco Mwana wa Ina:ma unu e:tirwe, kuso:kerera ku kuyangwa kwe ca:ro.

⁹ Omu:nu wo:ne akaba no kutwi, nongwe.

¹⁰ Omu:nu wo:ne akenda okugwata jingwatwa, one arigwatwa ngwatwa. Omu:nu wo:ne ake:ta ne cinyambutu, one ni busibusi e:twe ne cinyambutu. Kunu nikwo okwigumirisya no kwikirisya kwa be:ru.

Rityanyi rinu ryaso:kere mu ca:ro

¹¹ Nindora rityanyi erindi niriso:ka mu ca:ro. Ryariga na maembe gabiri rwa go mwana wa ina:ma, niryaika rwa riyoka.

¹² Nirikorera obuinga bwone obwa rityanyi ryo kwamba, nirikora imbere yaryo. Nirikora eca:ro na banu be:kaemo baramyega rityanyi ryo kwamba, rinu ryaorere riuta ryo kufwa.

¹³ Nirikora ebibarikisyo binene, nirire:ta omuriro ku ca:ro kuso:ka mu rwire mu me:so ga ba:nu.

¹⁴ Niribebeya banu be:kae ku ca:ro kurwe bibarikisyo binu ryayabirwe okukora imbere ya rityanyi. Niribwira banu be:kae ku ca:ro ati bakorere rityanyi ecisusano, niryo rityanyi rinu ryariga na riuta ryo kufwa niriora.

¹⁵ Niriyabwa okuyana ecisusano ca rityanyi okwisya omwoyo, korereki ecisusano ca rityanyi ca:ikega, no kukora be:twe bo:ne banu batakuramya ecisusano ca rityanyi.

¹⁶ Nirisinyirisya bo:ne, abakuru na bato:to, na bani:bi na bataka, na be:bure na bagaya, baterweko ecibarikisyo ku kuboko kwebwe okwe buryo, amwi ku bisu:su byebwe,

¹⁷ korereki omu:nu wo:ne asige kutura kugura amwi kuka:na, tari unu ari ne cibarikisyo, niryo risi:na rya rityanyi amwi obukumi bwa risi:na ryaryo.

¹⁸ Anu niwo obwenge buri. Unu ari no kusombo:kerwa abare obukumi bwa rityanyi, okuba ni bukumi bwo mu:nu. No bukumi bwaryo ni magana gata:nu na rimwi na makumi gata:nu na rimwi, ne:ta:nu na imwi (666).