Obhusweruro 1 - INDAGANO INYA:YA

¹ Kunu nikwo okuswerura kwa Yesu Kristo kunu Nyamuanga amuyae, korereki e:resyega abagaya bae jinu ni busibusi jibeo bwangu, natuma maraika wae korereki amweresye omukosi wae Yoana.

² Yoana niwe unu agwimireko omusango gwa Nyamuanga no kwimako kwa Yesu Kristo, ne:mako jo:ne jinu arorere.

³ Unu kasoma ari na ribando, aamwi na banu abongwa emisango jo buragi bunu, na banu abagwata jinu jandikirwemo. Okuba omwanya guri yei.

⁴ Anye Yoana enandikira jikanisa eta:nu ne:biri jinu jiri mu Asia. Mubega ne cigongo no murembe binu ebiso:ka ku Unu ariwo, na Unu ariga:rio, ka Unu aribao, na ku Myoyo eta:nu ne:biri jinu jiri imbere ye citebe ca iŋoma.

⁵ Nibyo ebiso:ka ku Yesu Kristo omwimako omwiikanyibwa, niwe owo bubere okuso:ka mu bafu:ye, na unu atungire abakama ba mu:si. Niwe Unu acendere eswe, nacisurumura mu bibi:bi byeswe kurwa manyinga gae,

⁶ nacikora kuba bukama na bagabisi ku Nyamuanga Esemwene. Oyo abega na rikusyo na managa kajanende na kajanende. Amina.

⁷ Rora, ka:ja na me:re. Ame:so go:ne garimurora, na banu ba:musomere barimurora. Na jiŋanda jo:ne ja mu ca:ro jiririra jimamu kubwae. Yee, Amina.

⁸ Nanye Alufa na Omega. Nanye obwambiro no bute:ro. Nikwo kutyo ka:ika Ratabugenyi. Nyamuanga unu ariwo, na unu ariga:rio, na unu aribao, niwe unu katura byone.

Yesu nabonekera Yo ana

⁹ Anye Yoana, unu ndi mwana wanyu, na unu nisangiye nemwe mu Yesu, mu kunya:sibwa na mu bukama na mu kwigumirisya, nariga kwisinga rinu eritogwa Patimo kurwo musango gwa Nyamuanga na kurwo kumwimako Yesu.

¹⁰ Nimba mu Mwoyo ku rusiku rwa Ratabugenyi, ninungwa oburaka bunene inyuma yani, rwo bwa iŋombi,

¹¹ nibwaika ati, Jinu ourora ujandike mu citabo, ujitume ku kanisa eta:nu ne:biri jinu jiri Efeso, na Simurina, na Perigamo, na Tuatira, na Saridi, na Filadefia, na Laodikia.

¹² Nini:kebukira nirore oburaka bunu bwariga mbwaika nanye. Wejire ne:kebukira nindora jitara eta:nu ne:biri eja jijaabu.

¹³ Na agati ya jitara nindora unu kasusana no Mwana wo mu:nu, ariga afwae cifwaro ŋwaa ku bigere, na ka afwae orukoba rwa ijaabu mu cifuba.

¹⁴ No mutwe gwae na ji:fwiri jae jariga je:rere rwa magafu, rwa mabui ga iŋuba. Na me:so gae gariga rwa jimbesi jo muriro.

¹⁵ Ne bigere byae nibisusana rwe cu:ma ecitukurasi cinu ciku:bire muno, rwa cinu ecise:ka:na mu ruija. No buraka bwae bwariga rwe ciru:mo ca manji ama:fu.

¹⁶ Ariga:ri na jinjota eta:nu ne:biri mu kuboko kwae okwe buryo, ne cinyambutu ca mo:gi agabiri niciso:ka mu kanwa kae. No busu bwae bwariga rwa risu:ba kutyo erise:ka:na mu managa garyo.

¹⁷ Wejire namurora, ningwa mu maguru gae rwo mufu:ye. Nanterako okuboko kwae okwe buryo, na:ika ati, Siga ku:baya, nanye owo kwamba no wa ku bute:ro.

¹⁸ Nanye unu ndi Muanga. Nariga nafu:ye, ka rora ndi muanga kajanende na kajanende, na ka ndina ji:funguro jo kufwa ne je bwire.

¹⁹ Mbe, yandika jinu warorere, na jinu jiriwo, na jinu jiribao ejo ariba jawa.

²⁰ Imbisike ya jinjota eta:nu ne:biri jinu warora mu kuboko kwani okwe buryo, no bwa jitara eta:nu ne:biri eja jijaabu ni inu ati, jinjota eta:nu ne:biri nibo bamaraika ba jikanisa eta:nu ne:biri. Na jitara eta:nu ne:biri nijo jikanisa eta:nu ne:biri.