Matayo 8 - INDAGANO INYA:YA

Yesu naosya omugenge

¹ Ejire aso:ka ku ci:ma, ebise byafu nibimuru:ba.

² Mbe na:ja omugenge namuramya na:ika ati, Ratabugenyi, ukenda outura okunyesya.

³ Nagorora okuboko kwae naika ati, Enenda, uore. Aonao ebigenge nibyera.

⁴ Yesu namubwira ati, Rora utaja kubwira mu:nu, nawe ugende wiyeresye ku mugabisi, umusirire eciyanwa cinu Musa aragiriye, cibe rusingiro ku bene.

Omurerwa wo musirikare naosibwa

⁵ Yesu ejire engira mu Kaperinaumu, Omukuru wa basirikare namu:jako namwiremberesya,

⁶ Na:ika ati, Ratabugenyi, akamura kani kama:mire mu nyumba kakomborikire, aka:sibwa muno.

⁷ Yesu namubwira ati, Eni:jo:kuja nimuosye.

⁸ Omukuru wa basirikare naindura ati, Ratabugenyi, anye nite:ire awe okwingira emwaro yo ruswi rwani, nawe yaika ecigambo era, akamura kani akajoora.

⁹ Kwo kuba anye one nitungirwe, ndi na basirikare banu nitungire. Enimubwira oundi ati, Genda, kagenda. No undi ati, Ija, ka:ja. No mugaya wani enimubwira ati, Kora kutya, kakora.

¹⁰ Yesu ejire ongwa ebyo narugu:ra nababwira banu bamuru:baga ati, Ni cimari enibabwira ati, Nicariga kubona kwikirisya kunene kwejabo kunu nakabee mu Baisraeli.

¹¹ Nawe enibabwira ati, Bari:ja ba:fu kuso:ka ebuturuka ne bugwa, bariyanja aamwi na Iburaimu na Isaka na Yakabo mu bukama bwa mu rwire.

¹² Nawe aba:na bo bukama baryeswa mu cisu:te ca anja, niyo kuriba okurira no kuguguna ame:no.

¹³ Yesu namubwira Omukuru wa basirikare ati, Mbe nugende, gabe rwa kutyo wekirisya. Mu mwanya ogwo akamura kae nikaora.

Yesu naosya ba:fu mu Kaperinaumu

¹⁴ Yesu ejire engira mu nyumba ya Petero, narora nyabuko ama:mire arwae ribiri nabira rugurugu.

¹⁵ Namugwata ku kuboko, ribiri ndimuso:kako, ne:muka namufurubendera.

¹⁶ Kwejire kwaba ke:goro, nibamure:tera ba:fu banu bariga baungirwe emisambwa, nairisya emisambwa ne cigambo cae, naosya abarwae bo:ne.

¹⁷ Korereki cikumire eco caikirwe no muragi Isaya ati, Omwene a:gegere amarwaririsi geswe, ne:twika jindwara jeswe.

Okumuru:ba Yesu

¹⁸ Mbe Yesu ejire arora ebise byafu bimusingiye, naragirira ati, Ciunguke cije ku ngego yenderya.

¹⁹ Omwandiki umwi na:ja namubwira ati, Mwiigisya, nje nkuru:bega eyo wo:ne uragendaga.

²⁰ Yesu namubwira ati, Banyamubwe barina mo:bo na jinyonyi ja mu rutumba jiri na moswi, nawe Omwana wo mu:nu atana wa kuta mutwe gwae.

²¹ Omwiigisibwa wae oundi namubwira ati, Ratabugenyi, Siga mbere nije okusi:ka rata.

²² Nawe Yesu namubwira ati, Ndu:ba, siga abafu:ye basi:ke abafu:ye bebwe.

Yesu narembe:sya amatu:ma no muyaga

²³ Nasyabara mu bwato abe:igisibwa nibagenda nage.

²⁴ Mbe ngwimuka omuyaga gwe ciure ku nyanja, amatu:ma nigaorekera mu bwato, nawe Omwene ariga ama:mire.

²⁵ Abe:igisibwa bae nibamu:jako nibamurafya niba:ika ati, Ratabugenyi, nucikisye, cafwa!

²⁶ Nababu:sya ati, ?Niki cinu omukora nimu:baya? Emwe abo kwikirisya okuto:to. Mbe, ne:muka, nagonya omuyaga na inyanja, ni:rembe:ra ndiba etore.

²⁷ Aba:nu nibarugu:ra mba:ika ati, ?Ni mu:nu ki unu, omuyaga na inyanja ebimungwa?

Abe misambwa abe Gadara

²⁸ Ejire agoba ku ngego yenderya mu:si ya Bagadara nabonana na ba:nu babiri baungirwe emisambwa, nibaso:ka mu bitu:ro, barurire muno, atariwo mu:nu unu aturaga okuitiŋana ku njira eyo.

²⁹ Mbe nibaragirisya niba:ika ati, ?Ecifuno niki eswe na:we, Omwana wa Nyamuanga? ?Wejire okucinya:sya omwanya gweswe gucari kwiya?

³⁰ Ryariga ririwo kurao eijo rya jingurube nyafu njire:ba.

³¹ Emisambwa nijimwiremberesya nja:ika ati, Ukaciirisya, ucisige cigende cingire mwiijo rya jingurube.

³² Najibwira ati, Mugende. Nijibaso:kako njingira mu ngurube. Mbe rora, riijo ryone ndiurutukira ku bugema ndigwirira mu nyanja njifwira mu manji.

³³ Abare:fi nibabirima nibengira mu musi, nibabasimurira byone ne bya be misambwa one.

³⁴ Omusi gwone nigwimuka okubonana na Yesu. Wejire bamurora nibamwiremberesya aso:ke mu mbibi jebwe.