Matayo 7 - INDAGANO INYA:YA

Okuramura na indengo

¹ Musige kuramura, emwe one korereki musige kuramurwa.

² Kwo kuba okuramura kunu omuramura emwe one nikwo muriramurirwa. Na indengo inu omurengamo, niyo one murirengerwa emwe.

³ Kubaki ourora akakongokera kanu kari mu ri:so ryo wanyu, nawe utakurora riti riri mu ri:so ryao?

⁴ Tere amwi urimubwira kutiki owanyu ati, Siga nikuso:sye aka:nu kanu kari mu ri:so ryao, ke:nu riti riri mu ri:so ryao?

⁵ Rurimi awe, tangata uso:sye riti mu ri:so ryao, mbe niwo urore kisi okuso:sya akakongokera mu ri:so ryo wanyu.

⁶ Mutayanaga mbwa ci:nu ce:ru, amwi mute:saga jiru:ru jemwe imbere ya jingurube, jasiga okujitajirira ne bigere byajo, nijicu:ka okubaka:bura.

Okusabwa

⁷ Musabwe muriyabwa, muyenje muribona, mwibu:re muri:gurirwao.

⁸ Kwo kuba mu:nu wo:ne unu kasabwa kayabwa, na unu kayenja kabona, na unu ke:bu:ra ke:gurirwao.

⁹ ?Amwi ni mu:nu ki mwimwe omwana wae akamusabwa obusima kamuyana ebui?

¹⁰ ?Akamusabwa iswi kamuyana injoka?

¹¹ Kambe emwe ababi:bi mumenyere okuyana aba:na bemwe ebi:nu bye kisi, ?Esomwana unu ari mu rwire atakukira muno okuyana ebye kisi banu abamusabwa?

¹² Mbe byone binu omwenda aba:nu okubakoreraga emwe, nemwe one mubakorerega kutyo, kwo kuba eco nico ebiragiro na baragi.

Jinjira ebiri

¹³ Mwingire mu muryango omufunde, kwo kuba omuryango omugari na injira inu eigenda mu kusimagira ni ngari, na banu abaturako ni ba:fu.

¹⁴ Okuba omuryango omufunde na injira inu eigenda mu buanga ni funde na banu abaibona bakeere.

Abaragi abo rurimi

¹⁵ Mwikenge abaragi bo rurimi, banu aba:ja kwimwe bafwae bifwaro bya ji:na:ma, nawe munda ni misege miruru mika:busi.

¹⁶ Muribamenyera ku matwasyo gebwe. ?Abanoga emijabibu ku bikomati amwi abanoga jitini ku matobo:ro?

¹⁷ Nikwo kutyo eti ryone erye kisi eritwasya amatwasyo ge kisi, nawe riti ribi:bi eritwasya amatwasyo mabi:bi.

¹⁸ Riti rye kisi ritakutura kutwasya amatwasyo mabi:bi, nyaburiko na riti ribi:bi ritakutura kutwasya amatwasyo ge kisi.

¹⁹ Eti ryone rinu ritakutwasya matwasyo ga kisi abaritema nibaryesa mu murio.

²⁰ Nikwo murikora nimubamenyera ku matwasyo gebwe.

²¹ Tari ati mu:nu wo:ne unu kambwira ati, Ratabugenyi, Ratabugenyi, nuwe aringira mu bukama bwa mu rwire, tari unu kakora ebyo Rata unu ari mu rwire binu kenda.

²² Ba:fu barimbwira ku rusiku niriya ati, Ratabugenyi, Ratabugenyi, ?citakoraga oburagi mwisi:na ryao, no kuirisya emisambwa mwisi:na ryao no kukora ebirugu:ro byafu mwisi:na ryao?

²³ Mbe niwo ndibabwiririrao ati, Nitendega kubamenya emwe. Munso:keko, emwe banu omukora obunyamusi.

Jinfuka ebiri

²⁴ Mbe mu:nu wo:ne unu kongwa ebigambo byani binu no kubikora kwarikora nasusanyibwa rwo mu:nu wo bwenge unu ombakire inyumba yae ku rutare.

²⁵ Iŋuba nigwa, emigeresi nijiurura, omuyaga niguutu:tura nibibuma inyumba eyo, nirema okugwa, kwo kuba yombakirwe ku rutare.

²⁶ No mu:nu wo:ne unu kongwa ebigambo byani narema okubikora, arisusanyibwa rwo mutamutamu, unu ombakire inyumba yae mu nsenyi.

²⁷ Iŋuba ni:gwa, emigeresi nijiurura, omuyaga niguutu:tura, nibibuma inyumba, ni:gwa no kugwa kwayo nikuba kunene.

²⁸ Ejire Yesu amara ebigambo ebyo, ebise nibirugu:ra okwiigisya kwae.

²⁹ Kwo kuba abeigisyaga rwo mu:nu unu amenyere kata, tari rwa bandiki bebwe.