Matayo 6 - INDAGANO INYA:YA

Ebya bo rurimi

¹ Mukabukega mutakoreraga ebyo oburengeresi bwemwe mu me:so ga ba:nu, korereki babarore, kwo kuba murakoraga kutiyo mutayabwega muyero Kwisomwana unu ari mu rwire.

² Mbe awe ukagabira abataka, utabumaga ŋombi imbere yao rwa bo rurimi kutyo abakora mu mekofyanyisyo na mu njira, korereki aba:nu babayane ecibaro. Ni cimari enibabwira ati, bamarire okuyabwa omuyero gwebwe.

³ Nawe awe, uragabiraga abataka, okuboko kwao okwe bumosi kusigega kumenya okwe buryo binu okukora.

⁴ Okugaba kwao kubega mu bumbise, na Esomwana unu karoraga mu bumbise arikuyana omuyero.

⁵ Murasabwaga mutabaga rwa bo rurimi, kwo kuba abenda okusabwa bemereguyu mu mekofyanyisyo na ku njira ya ma:ka:ka, korereki aba:nu babarore. Ni cimari enibabwira ati, bamarire kuyabwa omuyero gwebwe.

⁶ Nawe awe urasabwaga ingiraga esi:ko wao, wigare orwigi, niwo usabwe Esomwana unu ari mu bumbise, na Esomwana unu karoraga mu bumbise arikuyana omuyero.

⁷ Nawe emwe murasabwaga, musigega kusubasubagamo misango kutyo era rwa ba:maanga kutyo abakora, okuba abe:togera ati, abongwibwa kurwe misango jebwe okufura.

⁸ Mbe mutasusanaga nabo kwo kuba Esomwana amenyere binu mukenere mucari na kumusabwa.

Okusabwa kwa Beigisibwa

⁹ Mbe musabwega kutya ati, Rata unu uri mu rwire, Risi:na ryao rikusibwe.

¹⁰ Obukama bwao bu:je. Okwenda kwao kukorwega mu:si rwa kutyo okukorwa mu rwire.

¹¹ Uciyane rero ebiryo byeswe byo kuci:ya.

¹² Uci:swaririre amabanja geswe, rweswe kutyo eci:swaririra banu ecitonga.

¹³ Utacisira mu kusakwa nawe ucikisye ku mubi:bi. Kwo kuba obukama no buinga na rikusyo ni byao kajanende na kajanende. Amina.

¹⁴ Kwo kuba muke:swaririra aba:nu ebikayo byebwe, Esomwana wa mu rwire aribe:swaririra emwe one.

¹⁵ Nawe mukarema okwiswaririra aba:nu ebikayo byebwe, nyaburiko Esomwana one atakube:swaririra ebikayo byemwe.

Okusara:rira

¹⁶ Mbe mukasara:rira, musige kususana na bo rurimi banu abairiga obusu, okuba abe:surumbasya obusu, korereki barorwe ati abasara:rira. Ni cimari enibabwira ati, bamarire okuyabwa omuyero gwebwe.

¹⁷ Nawe awe ukasara:rira, ibambagaga amafuta ku mutwe, wiyosyega mu busu,

¹⁸ Korereki aba:nu basige kukurora ati, ousara:rira, tari Esomwana unu ari mu bumbise, na Esomwana unu karora mu bumbise, oyo arikuyana omuye:ro.

Obuni:bi bwa mu rwire

¹⁹ Mute:bikiraga ebi:nu mu:si, omwo ebinyamurirwa jifufunyi no butaretare, na be:fi mbatakura nibe:ba.

²⁰ Nawe Mwibikirega ebi:nu mu rwire, omwo bitakunyamurirwa fufunyi nakabee buri butaretare, amwi abe:fi batakutakura amwi kwiba.

²¹ Kwo kuba anu ebi:nu byemwe ebiba, niwo no mutima gwemwe one oguba.

²² Orumuri rwo mubiri ndye ri:so. Mbe eri:so rikaba rikobere omubiri gwao gwone oguba no bweru.

²³ Nawe eri:so ryao rikaba ebi:bi omubiri gwao gwone oguba ne cisu:te mbe, obweru bunu buri mwawe bukaba cisu:te, ni cisu:te ca:fu kutiki!

²⁴ Atariwo mu:nu unu katura okubakorera besebugenyi babiri. Okuba amwi arisokako oumwi, nenda oundi, amwi naruma ku umwi, nagaya oundi. Mutakutura kukorera Nyamuanga no kukorera obuni:bi one.

Ebyo kwigana

²⁵ Nikwo enikora nimbabwira ati, Mute:ganaga obuanga bwemwe ati, Cirirya ki? amwi, Cirinywa ki? amwi mutaganiraga emibiri jemwe ati, Cirifwara ki? ?Obuanga butakukira ebiryo, no mubiri gutakukira ebifwaro?

²⁶ Murore jinyonyi ja mu rutumba, jitakubiba amwi jitakugesa, amwi jitakusombera mu bitara. Nawe Esomwana wa mu rwire kajiri:sya:ra. ?Emwe ejo mutakujikira muno?

²⁷ ?Niga mwimwe unu katura okwigana okwiyongesyako obure:ra bwae cita cimwi?

²⁸ ?Niki cinu ecikora nimwigana ebifwaro? Murore obwaso bwa mu ndiri kutyo obumera. Butakukora murimu amwi kuruka myenda.

²⁹ Nawe enibabwira ati, Sulemani mwikusyo ryae, ryone atafwae rwo bwejabo obwo.

³⁰ Kambe Nyamuanga araba kafwafya obunyasi bwa mu ndiri bunu buriwo rero, na mutondo obweswa mu co:to, ?mbe ka atakubafwafya emwe kukira obwo, emwe abo kwikirisya okuto:to?

³¹ Nikwo murakoraga nimurema okwigana ati, Cirirya ki? amwi ati, Cirinywa ki? amwi ati, Cirifwara ki?

³² Okuba ebyo byone nibyo abamaanga abayenja. Kwo kuba Esomwana wa mu rwire amenyere ati, mukenere ebyo byone.

³³ Nawe muyenje okwamba obukama bwa Nyamuanga no burenge:resi bwae, nebyo byone niwo muryongesibwa.

³⁴ Mbe mute:ganaga bya mutondo, kwo kuba orusiku rwa mutondo orwiganira orwene. Orusiku orumwi ecibi:bi cendemo ecirumara.