Matayo 5 - INDAGANO INYA:YA

Yesu neigisya mu ci:ma. Aba ribando

¹ E:jire arora ebise, narinya ku ci:ma. E:jire amara okwinyanja, abe:igisibwa bae nibamu:jako.

² Natanya omunwa gwae, nabe:igisya na:ika ati,

³ Barina ribando abataka mu mwoyo, kwo kuba obukama bwa mu rwire ni bwebwe.

⁴ Barina ribando abasurumbae, kwo kuba abo barisi:ri:sibwa.

⁵ Barina ribando abafura, kwo kuba abo barirya i:si omwandu.

⁶ Barina ribando abo mweko no bwiro kurwo burengeresi, kwo kuba abo bari:gusibwa.

⁷ Barina ribando abe cigongo, kwo kuba abo barifwirwa ecigongo.

⁸ Barina ribando abo be:rere emitima, kwo kuba abo barirora Nyamuanga.

⁹ Barina ribando abaikanya bo mure:bo, kwo kuba abo baritogwa ba:na ba Nyamuanga.

¹⁰ Barina ribando banu abanya:sibwa kurwo burenge:resi, kwo kuba obukama bwa mu rwire ni bwebwe.

¹¹ Emwe murina ribando barabafumaga no kubanya:sya no kubabeeresya omusango gwone omubi:bi kubwani.

¹² Mukonderwe mutembetembe, kwo kuba omuyero gwemwe ni mwafu mu rwire, kwo kuba nikwo banya:syaga abaragi banu babatangatiye emwe.

Omunyu gwa i:si no bweru bwa i:si

¹³ Emwe muri munyu gwa i:si. ?Nawe omunyu gukakuba, abasuba bagurunge kutiki? Oguba gutace:ire tari kweswa anja no kutajirirwa na ba:nu.

¹⁴ Emwe muri bweru bwa i:si. Omusi gunu gumbakirwe ku ci:ma gutakutura kubiswa.

¹⁵ Amwi batakukongesya itara nibaifundikira mu ci:bo, tari kuitu:ra ku cikango ni:murikira bo:ne banu bari mu nyumba.

¹⁶ Nikwo kutyo obweru bwemwe bwakega imbere ya ba:nu, barorega ebikorwa byemwe byo bwana, korereki bakusye Esomwana unu ari mu rwire.

Ebiragiro

¹⁷ Mute:ganirisyaga ati, ne:jire kumarao ebiragiro amwi abaragi. Nite:jire kumarao, tari ne:jire kuku:misya.

¹⁸ Kwo kuba enibabwira cimari ati, kukinga orwire na i:si anu biriwerao, nyuguta imwi nakabee kari kakotore kamwi ka mu biragiro katariwao kukinga byone bikumire.

¹⁹ Omu:nu wo:ne unu araso:syagao ecimwi ku biragiro binu ebito:to, no kubeigisya aba:nu kutyo, oyo aritogwa muto:to mu bukama bwa mu rwire. Nawe unu wo:ne aribigwata nabi:igisya, oyo aritogwa mukuru mu bukama bwa mu rwire.

²⁰ Kwo kuba enibabwira ati, oburenge:resi bwemwe bukaremo:kira obwa bandiki na Bafarisayo, mutaringira mu bukama bwa mu rwire na katyari.

Obwiti

²¹ Mwonguywe kutyo aba:nu ba kara babwiriywe ati, Utari:ja kwita, no mu:nu unu ari:ta arijira intambara.

²² Nawe anye enibabwira ati, omu:nu wo:ne unu kabiirirwa Omwana wabo era, arijira intambara. Nawe unu arimufuma Omwana wabo ati, Raka, ni busi busi asirwe mu ci:na. Nawe unu araikaga ati, Mutamutamu awe, e:ire okweswa mu muriro gunyatasima.

²³ Mbe ukare:ta eciyanwa cao ku cigabiro, niwo niwicuka ati, owanyu ari na:we omusango,

²⁴ Siga eciyanwa cao imbere ye cigabiro, subayo utangate okungwana no wanyu, mbe niwo usube uso:sye eciyanwa cao.

²⁵ Mungwane no mubu:si wao bwangu ucari nage mu njira, omubu:si asiga kukusira ku muramusi, no muramusi asiga kukusira ku musirikare ukeswa mwiboero.

²⁶ Ni cimari enikubwira ati, utariso:kamo kata kukinga runu urimarira okuriya akacapa ko kumarisya.

Oburomesi

²⁷ Mwonguywe kutyo babwiriywe kara ati, utari:ja kuromera.

²⁸ Nawe anye enibabwira ati, unu wo:ne karore:rera omugasi no kumurigira oyo kaba amarire kara okumuromera mu mutima gwae.

²⁹ Ukaba eri:so ryao rye buryo ndikuyabya, uri:yemo uryese kura, kwo kuba ni kwa kisi ecungo cao ecimwi cisimagire, kukira omubiri gwao gwone okweswa mu muriro gunyatasima.

³⁰ Ukaba okuboko kwao okwe buryo nikukuyabya, ukutemeko ukwese kura, okuba ni kwa kisi ecungo cao ecimwi cisimagire kukira omubiri gwao gwone okweswa mu muriro gunyatasima.

³¹ Babwiriywe ati, unu wo:ne araremaga omugasi wae, amuyane inyaruba yo buta:ni.

³² Nawe anye enibabwira ati, omu:nu wo:ne araremaga omugasi wae, tari kurwo buromesi, kamukora muromerwa. Na unu aritwara unu aremerwe karomera.

Okwaika kwe cimari. Okubenda abasoko

³³ Rindi mwonguywe kutyo aba:nu ba kara babwiriywe ati, utari:ja kwiraira ebyo rurimi, nawe ukumisisyega Esobugenyi binu owiraisya.

³⁴ Nawe anye enibabwira ati, Ute:raisyaga na katyari, nakabee ari ku rwire, okuba ni citebe ca Nyamuanga eca iŋoma,

³⁵ Nakabee ari ku ca:ro, okuba ni citebe co kutako ebigere byae, nakabee ari Yerusalemi, okuba nigwo musi gwo Mukama Omukuru,

³⁶ Ute:raisyaga omutwe gwao okuba utakutura kuindura rufwiri rumwi rweru amwi nyirafuru.

³⁷ Nawe emisango jemwe jibega ati, Yee Yee, uri uri. Nawe binu ebikira ebyo ebiso:ka ku mubi:bi.

³⁸ Mwonguywe kutyo babwiriywe ati, Eri:so eritambana ne ri:so, eri:no eritambana ne ri:no.

³⁹ Nawe anye enibabwira ati, Mutayajanaga no mubi:bi, nawe omu:nu akakubuma oruba rwe buryo umucu:sisyega no rwe bumosi one.

⁴⁰ Na unu kenda okuromanwa na:we okugega ikanju yao, umusigire na rigoti one.

⁴¹ Omu:nu akakuyamba okuribata maili imwi, genda nage ne ya kabiri.

⁴² Unu arakusabwaga wamuyana, na unu kenda okukuryako amasi:ri, wasiga kumufuta:tira.

⁴³ Mwonguywe kutyo babwiriywe ati, Umwendega omwikasyanya wao, usokega omuremo wao.

⁴⁴ Nawe anye enibabwira ati, Mwendega abaremo bemwe, musabirwega banu ababanya:sya.

⁴⁵ Korereki mube ba:na ba Esomwana unu ari mu rwire, okuba risu:ba ryae kabaurusisya ababi:bi na be kisi, kabagimbira iŋuba abarenge:resi na banyamusi.

⁴⁶ ?Okuba mukenda banu ababenda emwe, muri na muyero ki? ?Abaosya one batakukora kutiyo?

⁴⁷ ?Ka murakesyaga abanyu era, omubakisyao ki? ?Abamaanga one batakukora kutiyo?

⁴⁸ Mbe emwe mubega banu baku:miye rwa Esomwana wa mu rwire kutyo aku:miye.