Matayo 4 - INDAGANO INYA:YA

Yesu nasakwa na Syetani

¹ Mbe Yesu nasirwa no Mwoyo mwibara Syetani amusake.

² Wejire amara okusara:rira siku makumi gana mu mwisi na mu ngeta, niwo narumwa omweko.

³ Omusaki namu:jako naika ati, Araba uri Mwana wa Nyamuanga, bwira amabui ganu gabe biryo.

⁴ Omwene namuindura na:ika ati, Gwandikirwe ati, Omu:nu atakuba muanga kurwe biryo era, Tari kurwo musango gwone gunu oguso:ka mu kanwa ka Nyamuanga.

⁵ Mbe Syetani namusira ku musi omweru, namuta ku cisonge ca iyekaru.

⁶ Namubwira ati, Araba uri Mwana, wa Nyamuanga, ijunga wiyese a:si, okuba gwandikirwe ati, arikuragiririra bamaraika bae, barikuyagata mu maboko gebwe utarija kwiku:jura cigere cao kwibui.

⁷ Yesu namubwira ati, Gwandikirwe rindi ati, Utasakaga Esobugenyi Nyamuanga.

⁸ Syetani namusira rindi ku ci:ma cire:ra muno, namweresya ebyaro bya bakama bo:ne banu bari mu:si na rikusyo ryendemo.

⁹ Namubwira ati, Binu byone enijo:kuyana, uke:nama okundamya.

¹⁰ Mbe Yesu namubwira ati, So:kayo Syetani, okuba gwandikirwe ati, Ramyaga Esobugenyi Nyamuanga, oyo niwe uko-rerega:ra.

¹¹ Mbe niwo Syetani namusiga, mbe bamaraika niba:ja mbamufurubendera.

Yesu namba Okusimura

¹² Ejire Yesu ongwa ati, Yoana bamugwatire, nasuba Galilaya.

¹³ Naso:ka Najareti, naja okwikara Kaperinaumu gunu guri ku mwaro, mu mbibi ja Jaburoni na Nafutali,

¹⁴ Korereki ciku:mire cinu ca:ikirwe no muragi Isaya na:ika ati,

¹⁵ I:si ya Jaburoni na i:si ya Nafutali, Injira ya ku mwaro, ingego ya Yorodani, Galilaya ya maanga,

¹⁶ Aba:nu banu bariga be:kae mu cisu:te barorere obweru bwafu, Na banu bariga bekae mu:si yo rufu na mwirengesi ryarwo obweru bwabaswerukira.

¹⁷ Kuso:ka mu mwanya ogwo Yesu namba okusimura na:ika ati, Mute okuba obukama bwa mu rwire bwafugee.

Yesu nabirikira abe:igisibwa

¹⁸ Mbe Yesu nabarama ku nyanja ya Galilaya, narora bamura babiri ba nda imwi, Simoni unu katogwa Petero na Andereya wabo, nibe:sa emijarifu mu nyanja okuba bariga bategi.

¹⁹ Nababwira ati, Mundu:be, enibakora bategi ba ba:nu.

²⁰ Aonao nibasiga emijarifu nibamuru:ba.

²¹ Nafugerao imbere narora bamura bandi babiri ba nda imwi, Yakobo mumura wa Jebedayo na Yoana wabo, bariga mu bwato aamwi na Jebedayo esemwene, nibasumikanya emijarifu jebwe, nababirikira.

²² Aonao nibasigao obwato nesemwene nibamuru:ba.

²³ Yesu naswisya Galilaya yone neigisyaga mu mekofyanyisyo gebwe, nasimura ebigambo byo bwana byo bukama, naosya jindwara jo:ne no bugo:bo:ke bwone mu ba:nu.

²⁴ Orukuma rwae nduswira Syamu yo:ne. Nibamure:tera bo:ne banu bariga barwae, na banu bagwatirwe jindwara jitasyanyisye, ne binya:syo, na banu baungirwe misambwa na be citwe na banu bafu:ye omubiri, nabaosya.

²⁵ Ebise byafu mbimuru:ba mbiso:ka Galilaya na Dekapori na Yerusalemi ne Buyaudi na ku mwambuko gwa Yorodani.