Matayo 3 - INDAGANO INYA:YA

Okusimura kwa Yoana Omubatija

¹ Mu siku ijo Yoana Omubatija na:ja nasimurira mwibara rye Buyaudi,

² Na:ika ati, Mute, Okuba obukama bwa mu rwire bwafugee.

³ Okuba oyo niwe a:ikirwe no muragi Isaya, ati, Oburaka bwa unu kakobyakobya mwibara, Mucumecume injira ya Ratabugenyi, Mumugorororere obwitiŋano bwae.

⁴ Yoana omwene ariga afwae obusinga bwa ingamira, no rukoba mu cibunu cae, ne biryo byae byariga biri nsige no bu:ki bwa mwibara.

⁵ Mbe aba Yerusalemi na Buyaudi yo:ne na ba i:si inu isijene na Yorodani nibamuja:ko.

⁶ Nababatija mu musima gwa Yorodani nibegamba ebibi:bi byebwe.

⁷ Nawe wejire abarora Abafarisayo ba:fu na Basadukayo ba:fu niba:ja okubatijibwa nababwira ati, Emwe orwiburo rwa jinjoka, niga unu abakabusisye okwiruka risungu rinu eryendo:ku:ja?

⁸ Mbe mutwasye amatwasyo ganu ge:ire okuta.

⁹ Muteganirisya mu mitima jemwe ati, Ciri na saja Iburaimu. Okuba enibabwira ati, Nyamuanga katura ku mabui ganu okumwimusisyamo Iburaimu aba:na.

¹⁰ Nawe woryanu ise:na iteeywe ku masina ga mati. Mbe eti ryone rinu ritakutwasya amatwasyo go bwana eritemwa ndyeswa mu muriro.

¹¹ Ni cimari anye enibabatija mu manji kurwo kuta nawe oyo kaja inyuma yani ankisisye amanaga, nite:ire okugega ebikwirya byae. Oyo niwe aribabatija no Mwoyo Mweru no muriro.

¹² Oruungo rwae ruri mu kuboko kwae, aryesya muno ritare ryae. Arisombera oburo bwae mu citara, nawe iŋunyu aryoca no muriro gunu gutakusima.

Okubatijiwa Kwa Yesu

¹³ Mbe niwo Yesu naso:ka Galilaya nakinga Yorodani ku Yoana amubatije.

¹⁴ Nawe Yoana ariga nenda okumuganya na:ika ati, Anye nanye nikenere awe okumbatija, ?ka nawe ouja kwanye?

¹⁵ Yesu naindura namubwira ati, Wori siga ago, okuba nikwo kutyo kuci:ire okuku:misya oburenge:resi bwone. Mbe niwo nekirisya ejae.

¹⁶ Mbe Yesu wejire amara okubatijibwa aonao nasyo:ka mu manji, mbe rora, orwire ndumuswerukira, narora Omwoyo wa Nyamuanga ne:ka rwa injiba namu:jako.

¹⁷ Mbe oburaka mbuso:ka mu rwire nibwaika ati, Unu niwe Omwana wani unu nendere, unu nikonderereywe.