Matayo 26 - INDAGANO INYA:YA

Mbamuroma Yesu okumwita

¹ Ejire Yesu amarisya emisango jinu jo:ne, nababwira abe:igisibwa bae ati,

² Mumenyere ati, jasigarao siku ibiri ni:ba Pasaka, no Mwana wo mu:nu ariromerwa iniku kajo:kubambwa ku musaraba.

³ Mbe niwo abagabisi abakuru na bakaruka ba ba:nu nibekofyanyisya mu cibanja co mugabisi omukuru unu atogwaga Kayafa.

⁴ Nibarwajira aamwi, korereki Yesu bamugwatire bwengebwenge bamwite.

⁵ Nawe niba:ika ati, Citamugwatira ku marya, itaja kubao inyombo mu ba:nu.

Yesu ne:tirirwa amafuta mu Betania

⁶ Mbe Yesu anu ariga:ri mu Betania mu nyumba ya Simoni omugenge,

⁷ Omugasi namu:jako unu ariga ana kayabya ka mafuta go bugusi oburambu muno, namuge:tirira ku mutwe, eyanjire narya.

⁸ Nawe abe:igisibwa bejire barora, nibabiirwa nibabu:sya ati, ?Ganu gafwaki?

⁹ Okuba amafuta ganu kumba gakaka:nirwemo, gakaso:keremo bi:nu byafu byo kuyana abataka.

¹⁰ Yesu ariga amenyere, nababwira ati, ?Omumunya:sisyaki omugasi unu? Okuba ankorera omusango gwo bwana.

¹¹ Okuba abataka nibo muri nabo kusiku, nawe anye mutari nanye kusiku.

¹² Okuba gunu akorera okunyitirira omubiri gwani amafuta, ankorera kutyo okunyira:ba okusi:kwa kwani.

¹³ Ni cimari enibabwira ati, Wo:ne anu Ecigambo cinu eco bwana anu ciryaikwaga mu ca:ro co:ne, cinu omugasi unu ankorera ciryaikwagako okumwicuka.

Yuda Iskariota naromera Yesu iniku

¹⁴ Mbe niwo umwi kwabo rikumi na babiri, unu atogwaga Yuda Iskariota, nagenda ku bagabisi abakuru.

¹⁵ Na:ika ati, ?Omujo:kunana ki, anye nije nibamuyane? Nibamurengera jimpirya makumi gasatu.

¹⁶ Niwao nambiriramo okuyenja omwanya kutyo aramuromera iniku.

Okwiraba kwa Ipasaka

¹⁷ Mbe ku rusiku rwo kwamba orwe mikate jinu jitarimo cifwimbya, abe:igisibwa niba:ja ku Yesu nibabu:sya ati, ?Owenda a:ki anu cirakwira:bira Ipasaka anu urairi:ra?

¹⁸ Na:ika ati, Mugende mu musi ewa igo:yu, mumubwire ati, Omwiigisya a:ika ati, Omwanya gwani gwaja okukinga. Ewao niyo nirari:ra Ipasaka aamwi na be:igisibwa bani.

¹⁹ Abe:igisibwa nibakora rwa kutyo Yesu abaragirira, mbe:ra:ba Ipasaka.

Yesu nary a Ipasaka yo kumarisya

²⁰ Mbe kwejire kwaba kegoro neyanja okurya aamwi na be:igisibwa bae ekumi na babiri.

²¹ Anu bariga bacarya, na:ika ati, Ni cimari enibabwira ati, umwi kwimwe kajo:kundomera iniku.

²² Nibasurumbara muno, nibamba umwiumwi okubu:sya ati, Ratabugenyi, si nanye?

²³ Omwene naindura ati, Oyo ke:nirisya aamwi nanye ku rutuba, niwe arandomera iniku.

²⁴ Omwana wo mu:nu kagenda rwa kutyo andikiriywe, nawe jirimubona omu:nu oyo araromera Omwana wo mu:nu iniku! Kumba kwakabee kwa bwana ku mu:nu oyo, atake:buywe!

²⁵ Yuda unu amuromee iniku, naindura ati, ?Si nanye, Rabbi? Namubwira ati, Rwa kutyo waika.

Yesu natao okusangira okwera

²⁶ Anu bariga bacarya, Yesu nagega omukate, nasi:ma nagubeganya nayana abe:igisibwa, na:ika ati, Nimugege murye. Gunu nigwo omubiri gwani.

²⁷ Nagega ecikombe nasi:ma, nabayana na:ika ati, Nimunywe ku cinu emwe bo:ne.

²⁸ Okuba cinu nigo amanyinga gani aga indagano, ganu agaurura kurwa ba:fu kurwo kwiswaririrwa ebibi:bi.

²⁹ Nawe enibabwira ati, Okwambira rero nitarinywa kata ku matwasyo ganu age mijabibu, kukinga ku rusiku niriya ndiganywa gari maya:ya aamwi nemwe mu bukama bwa Rata.

³⁰ Be:jire bamara okwimba, nibauruka nibagenda ku ci:ma ce Mijeituni.

Yesu nabwira Petero kutyo aramwiga:na

³¹ Mbe niwo Yesu nababwira ati, Emwe bo:ne omujo:kusinirirwa kubwani mu ngeta inu, okuba candikirwe ati, Ndibuma omure:fi, na ji:na:ma ja mwiijo jirinyarambuka.

³² Mbe nawe ariba namara okusu:ka, ndibatangatira okugenda Galilaya.

³³ Nawe Petero naindura namubwira ati, Bo:ne bakasinirirwa kubwao, nawe anye nitakusinirirwa kata.

³⁴ Yesu namubwira ati, Ni cimari enikubwira ati, mu ngeta inu iŋoko eijo:kuba icari kukokoroma, oujo:kunyiga:niramo kwiya kasatu.

³⁵ Petero namubwira ati, Nakabee kunyiire okufwira aamwi na:we, nitakukwiga:na na katyari. Na be:igisibwa bo:ne niba:ika kutyo.

Okusabwa kwa Yesu mu Getesemane

³⁶ Mbe Yesu nagenda nabo nakinga anu atogwaga Getesemane, nababwira abe:igisibwa bae ati, Mwinyanje anu ngende ariya nisabwe.

³⁷ Nagega Petero na ba:na babiri ba Jebedayo, namba okusurumbara no kuwa omwoyo muno.

³⁸ Mbe niwo nababwira ati, Omwoyo gwani guri no butaka bwafu obwo kunyita. Mbe mube anu mutengeje aamwi nanye.

³⁹ Naribata kuto:to nabundara nasabwa na:ika ati, Rata, cikaba citatamisye, ecikombe cinu cinso:keko. Nawe tari rwa kutyo enenda anye, nawe rwa kutyo wendere awe.

⁴⁰ Nasuba ku be:igisibwa bae nabasanga ba:ongee, namubwira Petero ati, Kana! ?Mutakutura kutengeja aamwi nanye nakabee iri saa imwi era?

⁴¹ Mutengeje, musabwe, mutengira mu kusakwa. Omwoyo nigwo ogwenda, nawe omubiri gurengaae.

⁴² Nasuba nagenda orwa kabiri nasabwa na:ika ati, Rata, araba cinu citamisye okunso:kako tari anye nicinywe, cinu owenda cikorwe.

⁴³ Na:ja rindi nabasanga baongee, okuba ame:so gebwe gariga gabondere.

⁴⁴ Nabasiga rindi nagenda nasabwa orwa kasatu, na:ika rindi emisango ejo ejo.

⁴⁵ Mbe e:ya na:ja ku be:igisibwa bae, nababwira ati, Muongere era wori, mwisye Omwoyo. Rora, omwanya gwafugera, Omwana wo mu:nu katu:rwa mu maboko ga be bibi:bi.

⁴⁶ Mwimuke cigende. Rora unu kandomera iniku ajo:kufugera.

Yesu nogwatwa, abe:igisibwa nibe:ruka

⁴⁷ Anu ariga aca:ika, mbe Yuda, niwe oumwi kwikumi na babiri, na:ja ari ne cise cinene bari ne binyambutu na masimbo, nibaso:ka ku bagabisi abakuru na bakaruka ba ba:nu.

⁴⁸ Nawe oyo amuromee iniku ariga abayae ecibarikisyo, na:ika ati, Unu ndanyunya, niwe oyo mumugwate.

⁴⁹ Aonao na:ja ku Yesu, na:ika ati, Murembe, Rabbi. Namunyunya muno.

⁵⁰ Yesu namubwira ati, Musa:ni, ?niki cinu cakure:ta? Mbe niba:ja ku Yesu nibamutako amaboko nibamugwata.

⁵¹ Mbe, oumwi ku banu bariga na Yesu nagorora okuboko, nasoora ecinyambutu cae natema omugaya wo mugabisi Omukuru, namutemako okutwi.

⁵² Mbe Yesu namubwira ati, Ecinyambutu cao nucisubye anu cariri. Okuba abo abagwata ecinyambutu nibo bari:twa ecinyambutu.

⁵³ ?Tere amwi owitogera ati, nitakutura kusabwa Rata, nande:tera woryanu bamaraika ba:fu basa:gire regioni ekumi ne:biri?

⁵⁴ ?Mbe ka binu byandikirwe jebikumire kutiki okuba ebyaika ati ni busi busi bibe kutyo?

⁵⁵ Mu mwanya ogwo Yesu nabu:sya ebise ati, ?Mwaja ne binyambutu na masimbo okungwata rwo musa:kusi? Nariga ninyanja mu yekaru ku:siku niniigisya, nemwe mutangwatire.

⁵⁶ Nawe binu byone byabao, korereki binu abaragi bandikire bikumire. Mbe niwo abe:igisibwa bae bo:ne nibamusiga mbe:ruka.

Yesu nasirwa imbere ya Kayafa

⁵⁷ Mbe banu bagwatire Yesu, nibamusira ewa Kayafa omugabisi Omukuru, enu bariga be:kofyanyisisye abandiki na bakaruka.

⁵⁸ Nawe Petero namuso:ka inyuma e:cundire kura okukinga mu rugo rwo mugabisi Omukuru nengira munda, nenyanja aamwi na bakosi arore kutyo bira:ba.

⁵⁹ Nawe abagabisi abakuru na ba mu cirwaji bo:ne nibayenja orusingiro rwo rurimi ku Yesu, korereki bamwite.

⁶⁰ Nibaremo:kubona, nakabee ababeeresya babonekere ba:fu.

⁶¹ Be:jire be:ye niba:ja babiri, niba:ika ati, Unu a:ikire ati, Enitura okufumya iyekaru ya Nyamuanga, niniyumbaka mu siku isatu.

⁶² Omugabisi Omukuru nemereguru namubu:sya ati, ?Awe utakuindura musango? ?ni misango ki jinu abakwaika?

⁶³ Nawe Yesu najibira. Omugabisi Omukuru naindura namubwira ati, Enikwirairisya ku Nyamuanga omuanga, ucibwire araba na:we Kristo, Omwana wa Nyamuanga.

⁶⁴ Yesu namubwira ati, Waikire, nawe enibabwira ati, okwambira rero murirora Omwana wo mu:nu eyanjire ku kuboko kwe buryo okwo Buinga ne:jira ku me:re ga ku rwire.

⁶⁵ Mbe niwo omugabisi Omukuru natemura ebifwaro byae, na:ika ati, Afuma Nyamuanga. ?Aba:iki ecenda ba ki rindi? Mbe rora, mwongwa okufuma kwae ori.

⁶⁶ ?Omwiganirisya kutiki? Nibaindura ati, E:ire okufwa.

⁶⁷ Mbe nibamufuburira amafwefu mu busu, nibamubuma ebifu:fi, abandi nibamusasa amai,

⁶⁸ Niba:ika ati, Nucibwire, awe Kristo, ?Niga unu akubuma?

Petero namwiga:na Yesu

⁶⁹ Nawe Petero ariga enyanjire aanja mu nigo. Omuyara namugendako, na:ika ati, Nawe one wariri aamwi na Yesu Omugalilaya.

⁷⁰ Omwene ne:ga:nira imbere ya ba:nu bo:ne, na:ika ati, Cinu owaika anye ntakucimenya.

⁷¹ Nawe e:jire auruka kukinga mu cisuna, omuyara oundi namurora, nababwira banu bariga bari ao ati, Unu one ariga:ri na Yesu Omunajareti.

⁷² Ne:ga:na rindi naraira ati, Omu:nu oyo nitakumumenya.

⁷³ Niguitiŋanao omwanya muto:to, banu bariga bemereguyu awo niba:ja nibabwira Petero ati, Ni cimari awe one uri we:ja:bo, okuba inyaika yao niyo oumenyekerako.

⁷⁴ Mbe niwo namba okwifuma no kuraira ati, Omu:nu uyo nitakumumenya. Ao nao iŋoko nikokoroma.

⁷⁵ Petero ne:cuka omusango gunu Yesu a:ikire ati, Iŋoko eiba icari kukokoroma, oujo-kunyiga:na kwiya kasatu. Nauruka aanja, narira masiga mogomogo.