Matayo 25 - INDAGANO INYA:YA

Ecijekekanyo ca bayara ekumi

¹ Mbe niwo obukama bwa mu rwire burisusanyibwa na bayara ekumi, banu bagegere jitara jebwe nibagenda oktiramira omutwasi wo mwenga.

² Nawe abe:ja:bo abata:nu bariga batamutamu na bata:nu bariga ba bwenge.

³ Okuba abatamutamu bejire bagega jitara jebwe batagegereo amafuta.

⁴ Nawe abo bwenge nibagega amafuta mu cupa jebwe, aamwi na jitara jebwe.

⁵ Nawe omutwasi wo mwenga e:jire ako:rayo, nibaongerera bo:ne nibaongera.

⁶ Nawe mu bwire agati nibao injogere ati, Mbe, omutwasi wo mwenga a:ja! Nimuuruke mujo:kumuramira.

⁷ Abayara barya bo:ne niwo nibe:muka, nibacuma jitara jebwe.

⁸ Abatamutamu nibabwira abo bwenge ati, Muciyaneko amafuta gemwe, okuba jitara jeswe ejisimirira.

⁹ Nawe abo bwenge nibaindura niba:ika ati, Amwi gatakucimara, eswe nemwe, akiri mugende ku baka:ni, mwigurire abe:ne.

¹⁰ Anu bariga bacagenda okugura, omutwasi wo mwenga na:ja. Banu bariga be:ra:bire nibengira nage mu bwenga, nibe:gara orwigi.

¹¹ Wejire be:ya niba:ja na bariya abayara abandi, niba:ika ati, Ratabugenyi, Ratabugenyi, nu:ci:gurireo.

¹² Omwene naindura na:ika ati, Ni cimari enibabwira ati, nitakubamenya.

¹³ Mbe nimutengeje, kwo kuba mutakumenya rusiku nakabee iri saa.

Ecijekekanyo co buni:bi bwo kubikisibwa

¹⁴ Kwo kuba obukama bwa mu rwire burisusana rwo mu:nu unu ariga nenda okugenda mu ca:ro ecindi, nabirikira abagaya bae, nabasigira ebi:nu byae.

¹⁵ Nayana oumwi jitaranta eta:nu, oundi ebiri, oundi imwi, mu:nu wo:ne rwo kutura kwae kutyo kwariga kuri, nagenda.

¹⁶ Aonao unu ayabirwe jitaranta eta:nu nagenda naka:na nabonamo taranta jindi eta:nu.

¹⁷ Nikwo kutyo na unu ayabirwe jitaranta ebiri, nabonamo ebiri jindi.

¹⁸ Nawe unu ariga ayabirwe imwi, nagenda natakura a:si, nabisa itaranta ya esebugenyi.

¹⁹ Mbe jaturao siku nyafu, esebugenyi wa bagaya abo na:ja, nabara nabo.

²⁰ Na uriya ayabirwe jitaranta eta:nu, na:ja nare:ta taranta jindi eta:nu na:ika ati, Ratabugenyi, wansigiye jitaranta eta:nu, rora nabwenemo taranta jindi eta:nu.

²¹ Esebugenyi namubwira ati, Wakondya, uri mugaya wa bwana na mwiikanyibwa. Wariga mwiikanyibwa ku bito:to, ndikutungya byafu. Ingira mu kukonderwa kwa eso bugenyi.

²² Na uriya ariga ayabirwe jitaranta ebiri na:ja na:ika ati, Ratabugenyi, wansigiye taranta ebiri. Rora nabwenemo taranta jindi ebiri.

²³ Esebugenyi namubwira ati, Wakondya, uri mugaya wa bwana na mwiikanyibwa. Wariga mwiikanyibwa ku bito:to, ndikutungya byafu. Ingira mu kukonderwa kwa esobugenyi.

²⁴ Na uriya ayabirwe itaranta eimwi na:ja na:ika ati, Ratabugenyi, nakumenyere uri mu:nu mukomee, ougesa enu utabibire, oukofya enu utanyarambue.

²⁵ Ninu:baya ningenda nimbisa itaranta yao mu maaru. Rora, njii unayo eyao.

²⁶ Esebugenyi naindura namubwira ati, Awe mugaya mubi:bi na murenga, wamenyere ati enigesa enu nitabibire, enikofya enu nitanyarambue.

²⁷ Mbe, kwariga kukwiire okuyana abaka:ni orupirya rwani, korereki nake:jire nakayabirwe eyani no muri:ro gwendemo.

²⁸ Mbe mumutesye itaranta inu anayo, mumuyane unu ana jitaranta ekumi.

²⁹ Okuba unu wo:ne ari ne bi:nu ariyabwa na ka ariba na byafu. Na unu atanabyo, aritesibwa na cinu anaco.

³⁰ No mugaya oyo ate:ire, nimumwese mu cisu:te ca anja. Niyo kuriba okurira no kuguguna ame:no.

Okwaurwa kwa maanga rwa ji:na:ma na jimbusi

³¹ Omwana wo mu:nu ariba:ja mwikusyo ryae aamwi na bamaraika bo:ne, niwo ariyanja ku citebe ca rikusyo ryae.

³² Na maanga go:ne garikumanyibwa imbere yae. Omwene aryauramo rwo mure:fi kutyo ka:ura ji:na:ma na jimbusi.

³³ Na ji:na:ma arijita ku kuboko kwae okwe buryo nawe jimbusi arijita ku kuboko kwae okwe bumosi.

³⁴ Mbe niwo Omukama aribabwira banu bari ku kuboko kwae okwe buryo ati, Mu:je mwingire mu bukama bunu mwabikiywe kuso:ka kumogwa kwa i:si.

³⁵ Okuba nariga no mweko, nimunana ebiryo. Nariga no bwiro nimu:nywesya. Nariga mugenyi nimunkuma.

³⁶ Nariga tuyu nimu:nfwafya, nariga ndwae nimundoja, nariga niboyerwe nimujokundora.

³⁷ Mbe niwo abarenge:resi barimuindura niba:ika ati, Ratabugenyi, ?cakubweneri uri no mweko nicikuri:sya? ?Amwi uri no bwiro nicikunywesya?

³⁸ ?Kamwi cakurorereri uri mugenyi nacikukuma, amwi uri tuyu nicikufwafya?

³⁹ ?Kamwi cakurorereri urwae, amwi uboyerwe, nici:ja okukurora?

⁴⁰ No Mukama ariindura nababwira ati, Ni cimari enibabwira ati, Rwomwo mwakoree oumwi ku ba:na ba:su banu abato:to, nikwo kutyo mwankoree anye.

⁴¹ Mbe niwo aribabwira abo bari ku kuboko kwae okwe bumosi ati, Munso:keko, emwe banu mweimirwe, mugende mu muriro gunu gutakuwao, gunu gwera:bi:ywe Syetani na bamaraika bae.

⁴² Okuba nariga no mweko, mutananire biryo. Nariga no bwiro, muta:nywesisye.

⁴³ Nariga mugenyi mutankumire. Nariga tuyu muta:nfwafifye. Nariga murwae na muboywa, nimurema okundora.

⁴⁴ Mbe niwo abene one bariindura ati, Ratabugenyi, ?cakurorereri uri no mweko amwi uri no bwiro, anwi uri mugenyi, amwi uri tuyu, amwi urwae, amwi mu buboywa, nicirema okukufurubendera?

⁴⁵ Mbe niwo aribaindura ati, Ni cimari enibabwira ati, Rwomwo mutakoree oumwi kwabo abato:to, mutankoree anye.

⁴⁶ Mbe abo barigenda mu nya:ko inyatawao, nawe abarenge:resi barigenda mu buanga bunu butakuwao.