Matayo 24 - INDAGANO INYA:YA

Okusimura kwa Yesu ku ci:ma ce Mijeituni ( Mk. 13 ; Lk. 21 ) Yesu naraga okufumibwa kwa iyekaru

¹ Yesu nauruka mu yekaru, nagenda. Abe:igisibwa bae niba:ja okumweresya inyumbaka ya iyekaru.

² Omwene naindura nababwira ati, ?Mutakurora binu byone? Ni cimari enibabwira ati, Ritarisigara anu ebui kwibui ryeja:bo, rinu ritarifumibwa.

³ Anu ariga eyanjire ku ci:ma ca Mijeituni, abe:igisibwa nibamu:jako bwitebe, mba:ika ati, Cibwire ebyo biribari? ?Ne cibarikisyo co ku:ja kwao, ne co bute:ro bwa maimbo niki?

Obwambiro bwo busungu

⁴ Yesu naindura nababwira ati, Mukabuke mu:nu wo:ne atarija kubayabya.

⁵ Okuba ba:fu bari:ja mwisi:na ryani, niba:ika ati, Anye nanye Kristo, nibayabya ba:fu.

⁶ Muryungwa oburemo ne cirumo co buremo. Mukabuke mutarija ku wa mwoyo, okuba binu bitarirema kubao, nawe obute:ro bucari.

⁷ Okuba riyanga ririja okurwana na riyanga ryeja:bo, no bukama burija okurwana no bukama bweja:bo. Iribao injara na banyamutikima andi na andi.

⁸ Nawe ebyo byone nibwo obwambiro bwo busungu.

⁹ Orwo nirwo baribasira mujo:nyasibwa, baribe:ta. Amaanga go:ne garibasini:ririrwa kurwa risi:na ryani.

¹⁰ Mu siku ijo ba:fu bariyaba, bariromerana iniku no kusokana.

¹¹ Na baragi ba:fu bo rurimi bari:ja, baribayabya ba:fu.

¹² Na kurwo kufura kwo bwikoti, okwenda kwa ba:fu kurinyirira.

¹³ Nawe unu arigumirisya kukinga ku bute:ro oyo niwe arikisibwa.

¹⁴ Ne Bigambo byo bwana ebyo bukama birirasibwa mu ca:ro co:ne okuba rusingiro ku maanga go:ne. Mbe niwo obute:ro nibu:ja.

Jinya:ko ja mu:si ya Israeli

¹⁵ Mbe ecifururusyo co kusimagisya, cinu ca:ikirwe na Danieli omuragi, ariba mwacirora cimereguyu anu e:rere—unu kasomamo asombo:kerwe,

¹⁶ Mbe niwo, banu bari mu Buyaudi be:rukire ku bi:ma.

¹⁷ Unu ari inguru ku nyumba atarija kwika kuso:sya ebinu bya mu nyumba yae.

¹⁸ Na unu ari mwisambu atarisuba kugega ingubo yae.

¹⁹ Jiribabona emwe aba jinda na banu abanenia mu siku ijo!

²⁰ Musabwega, okwiruka kwemwe kutariba mu siku ja imbeo amwi ku rusiku rwa isabato.

²¹ Okuba mu siku ijo iribao nya:ko nene, inu icariga kubao kuso:kerera ku bwambiro bwa i:si kukinga rero, ka itaribao rindi.

²² Ji:siku ijo jija jitabuturwako, atakaonere mu:nu wo:ne. Nawe kurwa abasorwa jiributurwako ji:siku ijo.

²³ Mu siku ijo omu:nu akababwira ati, Rora Kristo ari anu, amwi anu, mutari:kirisya.

²⁴ Okuba bari:ja bakristo bo rurimi na baragi bo rurimi. Barikora ebibarikisyo binene ne birugu:ro, korereki bakatura, bababebeye na basorwa one.

²⁵ Mukabuke, natangata okubabwira.

²⁶ Mbe, bakababwira ati, Ari i:bara, mutajagayo, amwi ati, Ari mu nyumba, mwasiga kwikirisya.

²⁷ Okuba rwo rurabyo kutyo oruso:ka ebuturuka, ndubonekera ebugwa, nikwo kutyo one kuriba oku:ja kwo Mwana wo mu:nu.

²⁸ Okuba anu wo:ne omutumbi guri, niwo jimpungu ejikofyanyisya.

Ebibarikisyo byo kusuba kwo Mwana wo mu:nu

²⁹ Aonao ariba jawa jinya:ko ja mu siku ijo, risu:ba ririba cisu:te, no kwesi kutariseka, na jinjota jiriragara kuso:ka mu rwire, na managa ga mu rwire garisingisibwa.

³⁰ Mbe niwo ciriboneka ecibarikisyo co Mwana wo mu:nu mu rwire, na jiŋanda jo:ne ja mu:si nirwo jiririra jimamu, nijirora Omwana wo mu:nu na:ja ku me:re go rwire na managa na rikusyo ryafu.

³¹ Na arituma bamaraika bae no buraka bunene obwa iŋombi, abo barikofya abasorwa bae kuso:ka mu miyaga ena, kuso:ka ku bute:ro bwo rwire no kukinga ku butero bwarwo.

Omwanya gwo kusuba kwae gutakumenywa

³² Mwiigirire ku mutini ecijekekanyo cagwo. Ritabi ryagwo wora ryatinda na masya okusebuka nimumenya ati omwaka guri yei.

³³ Nikwo kutyo emwe one, mukarora ebyo byone, mumenye ati, ari yei, ku rwigi.

³⁴ Ni cimari enibabwira ati, Riimbo rinu ritariwao kukinga byone anu birikumirira.

³⁵ Orwire na i:si biriwao, nawe emisango jani jitariwao.

³⁶ Nawe ebyo rusiku rurya na isaa eyo, atario unu abimenyere, nakabee bari bamaraika ba mu rwire, nakabee ari Mwana, tari Rata enyere.

³⁷ Nawe rwa kutyo ji:siku ja Nuu jariga, nikwo kutyo one kuriba oku:ja kwo Mwana wo mu:nu.

³⁸ Okuba rwa kutyo bariga mu siku ijo jatangatiye induruma, nibarya, nibanywa, nibatwara, nibagabura, kukinga ku rusiku runu Nuu engiye mu ngaraba.

³⁹ Bariga batamenyere kukinga induruma niija, ni:bagega bo:ne. Nikwo one kuriba oku:ja kwo Mwana wo mu:nu.

⁴⁰ Mu magoro ago, aba:nu babiri bariba bari mwisambu, oumwi arigegwa, oundi nasigwa.

⁴¹ Abagasi babiri baribaga nibasya ku rubui, oumwi arigegwa, oundi nasigwa.

Ecijekekcmyo co mugaya omwiikanyibwa

⁴² Mbe nimutengeje, okuba mutakumenya rusiku runu Esobugenyi ari:jiramo.

⁴³ Nawe mumenye cinu ati, omwene nyumba kumba aja:menyere omwanya gunu omwifi ke:jiramo, akatengejere, atakasigire inyumba yae okufumurwa.

⁴⁴ Mbe emwe one mumari:rire, okuba mu mwanya gunu mutakwiganirisisyamo, Omwana wo mu:nu nigwo ke:jiramo.

⁴⁵ ?Mbe niga omugaya oyo omwiikanyibwa no wo bwenge, esebugenyi unu ateeo okukurira aba mu nyumba yae okubayanaga ebiryo byebwe mu mwanya gwabyo?

⁴⁶ Ana ribando omugaya oyo esebugenyi aka:ja namusanga nakora kutyo.

⁴⁷ Ni cimari enibabwira ati, arimutungya ebi:nu byae byone.

⁴⁸ Ka nawe omugaya oyo omubi:bi aryaika mu mutima gwae ati, Ratabugenyi ako:ra.

⁴⁹ Aryamba okubuma abagaya be:ja:bo, no kurya no kunywa aamwi na bakorwa.

⁵⁰ Mbe, esebugenyi wo mugaya oyo ari:jira ku rusiku runu atakurindiriramo, na mu saa inu atakumenya.

⁵¹ Arimutemamo masinja gabiri, arimuyana omugabo gwae aamwi na bo rurimi. Nimwo kuriba okurira no kuguguna ame:no.