Matayo 21 - INDAGANO INYA:YA

Yesu nengira Yerusalemi ari ku sikiri

¹ Bejire bafugera yei na Yerusalemi, nibakinga Betifage ku Ci:ma ce Mijeituni, niwo Yesu natuma abe:igisibwa babiri.

² Nababwira ati, Mugende mu musi gunu musomekene, aonao omujo:rora i:sikiri isibikire no mwana wayo aamwi nayo. Mujisibure, mujinde:tere.

³ Ake:fura omu:nu nababwira omusango, muje mwaike ati, Ratabugenyi niwe ajikenere. Mbe aonao kajo:jituma.

⁴ Eco co:ne cabeeo, korereki cikumire cinu ca:ikirwe no muragi ati,

⁵ Mumubwire omuyasya wa Sayuni ati, Rora Omukama wao kaku:jako, ni mwororo, Arinyire ku sikiri na ku kanyara Omwana wa i:sikiri.

⁶ Abe:igisibwa nibagenda, nibakora rwa kutyo Yesu abaragiriye.

⁷ Nibare:ta i:sikiri no mwana nibajitako emyenda jebwe, najinyanjako.

⁸ Aba:nu ba:fu aba mu cise niba:nja emyenda jebwe mu njira abandi nibatema amatabi ga mati nibaga:nja mu njira.

⁹ Ebise binu byariga bimutangatiye, na binu byaso:kaga inyuma, nibimwaya nibyaika ati, Osana ku mwana wa Daudi. Ana ribando unu ka:ja mwisi:na rya Ratabugenyi, Osana inguru mu rwire.

¹⁰ Mbe ejire engira mu Yerusalemi, omusi gwone nigukangabara nibabu:sya ati, ?Unu niga?

¹¹ Ebise nibyaika ati, Unu niwe Yesu omuragi wa Najareti ya Galilaya.

Yesu nairisya abaka:ni mu yekaru

¹² Yesu nengira mu yekaru ya Nyamuanga, nairisyamo bo:ne banu bariga nibaka:na no kugura mu yekaru, nafumbika jimeja ja banu bariga mba:sakanya jimpirya, ne bitebe bya banu bariga mbaka:na ebiguti.

¹³ Nababwira ati, Candikirwe ati, Inyumba yani iritogwa nyumba ya kusabirwamo, nawe kemwe omuikora kuba nsenga ya basa:kusi.

¹⁴ Abaofu na barema nibamu:jako mu yekaru, nabaosya.

¹⁵ Nawe abagabisi abakuru na bandiki bejire barora ebirugu:ro binu akorere, na ba:na banu bamwaisisye mu yekaru ati, Osana ku mwana wa Daudi, nibabiirwa.

¹⁶ Nibamubu:sya ati, ?Oungwa banu kutyo aba:ika? Yesu nababwira ati, Enimgwa. ?Mucariga kusoma ati, Mu kanwa ka ba:na bato:to na ba kwibe:re wakumisisye okukuya.

¹⁷ Nabasiga naso:ka mu musi nagenda Betaniya nama:ma eyo.

Yesu nafumi:risya omutini

¹⁸ Mbe katondo e:jire asuba mu musi, omweko nigumuruma.

¹⁹ Narora omutini gumwi ku mbari ya injira, nagugendako nasanga gutariko ci:nu, tari masya gendeko era. Nagubwira ati, Utarisuba kutwasya matwasyo kajanende. Aonao omutini niguotoka.

²⁰ Abe:igisibwa bejire barora nibarugu:ra, niba:ika ati, ?Omutini gwaotoka aonao kutiki?

²¹ Yesu naindura nababwira ati, Ni cimari enibabwira ati, Mukaba no kwikirisya, kwi-tima:ta uri, mutakorega cinu era eco mutini, nawe muribwira eci:ma cinu ati, Weŋeŋibwe weswe mu nyanja, ebikorwa.

²² Na binu byone murendaga nimu-sabwa mwikirisisye, muribiyabwa.

Abagabisi mbabu:sya Yesu enu obuinga bwae bwaso:kere

²³ Nengira mu yekaru, abagabisi abakuru na bakaruka ba ba:nu nibamu:jako ne:igisya nibabu:sya ati, ?Ni buinga ki bunu obukukosya binu? ?Na unu akuyae obuinga bunu niga?

²⁴ Yesu naindura nababwira ati, Anye one siga mbabu:sye musango gumwi. Mukambwira, anye one enijo:babwira emwe obuinga bunu obunkosya binu.

²⁵ ?Okubatija kwa Yoana kwaso:kere a:ki? ?Mu rwire, tere mu ba:nu? Nibabu:syanya abene:ra, niba:ika ati, Araba ca:ika ati, Mu rwire, kajo:cibu:sya ati, ?Mbe niki cinu cakorere nimurema okumwikirisya?

²⁶ Nawe araba ca:ika ati, Mu ba:nu, ecu:baya aba:nu, okuba bo:ne bamuteeko mwoyo ati Yoana ni muragi.

²⁷ Nibaindura Yesu ati, Citakumenya. Omwene one nababwira ati, Anye one ntakubabwira obuinga bunu enikorera binu.

Ecijekekanyo ca bamura babiri

²⁸ ?Omwiganirisya kutiki? Ariga ario mu:nu unu ariga na ba:na babiri. Na:ja ku wo kwamba na:ika ati, Mwana wani, rero uje ukore mirimu mwisambu rye mijabibu.

²⁹ Naindura na:ika ati, Nitakwenda. E:jire e:ya, ne:garura nagenda.

³⁰ Na:ja ku wa kabiri, na:ika kutyo one. Omwene naindura ati, Siga nigende, mukaruka, Naremo:genda.

³¹ ?Kwabo bo:ne niga unu akoree esemwene binu endere? Niba:ika ati, Owo kwamba. Yesu nababwira ati, Ni cimari enibabwira ati, Abatobesya na bamaraya ababatangatira emwe okwingira mu bukama bwa Nyamuanga.

³² Okuba Yoana abe:jireko emwe mu njira yo burenge:resi, kemwe mutamwikirisisye, nawe abatobesya na bamaraya bamwikirisisye. Nemwe mwejire mwarora kutyo, mweya nimurema okuta no kwikirisya.

Ecijekekanyo ca barimi ababi:bi

³³ Nimungwe ecijekekanyo ecindi. Ariga:rio mwenemusi oyo ayambire risambu rye mijabibu. Narisitira orugo, nasimbamo rinokero, nombakamo obutingo. Naragana na barimi, nagenda orugendo.

³⁴ Mbe, jisiku ja matwasyo je:jire jafugera, natuma abagaya bae ku barimi abo, babayane amatwasyo gae.

³⁵ Nawe abarimi nibagwata abagaya bae, oumwi nibamubuma, oundi nibamwita, oundi nibamurasira mabui.

³⁶ Natuma rindi abagaya ba:fu kukira abo kwamba. Abo one nibabakora kutyo.

³⁷ E:jire e:ya nabatumira Omwana wae, na:ika ati, Abajo:mubara Omwana wani.

³⁸ Nawe abarimi be:jire bamurora, niba:ikana abene:ra ati, Unu niwe omuri wo mwandu. Mu:je cimwite, rirye omwandu gwae.

³⁹ Mbe nibamugwata nibamuirisya mwisambu rye mijabibu nibamwita.

⁴⁰ ?Mbe omwene:sambu rye mijabibu ariba:ja, aribakora kutiki abarimi abo?

⁴¹ Nibamubwira ati, Ababi:bi abo aribasimagisya kubi:bi, na risambu rye mijabibu aritamo barimi bandi banu baramuyanaga amatwasy mu siku jago:o.

⁴² Yesu nababu:sya ati, ?Mucariga kusoma mu binu byandikirwe ati, Ribui rinu abombasi baremere, niryo ryabee rinene rya ku sonde. Cinu caso:kere ku Ratabugenyi, ka ni cirugu:ro mu me:so geswe.

⁴³ Kwenikora nimbabwira ati, Obukama bwa Nyamuanga, buriso:sibwa kwimwe, buriyanwa eyanga rinu eritwasya amatwasyo gabwo.

⁴⁴ Na unu wo:ne kagwa kwibui rinu arifunikafunika, nawe unu wo:ne ririmugwirako, ririmufwonyorafwonyora.

⁴⁵ Abagabisi abakuru na Bafarisayo, be:jire bongwa ebijekekanyo byae, nibamenya ati nibo ka:ika.

⁴⁶ Nawe wejire benda okumugwata, nibo:baya ebise, okuba bariga bamuteeko mwoyo ati ni muragi.