Matayo 20 - INDAGANO INYA:YA

Abakosi ba mwisambu rye mijabibu

¹ Okuba obukama bwa mu rwire obususana no mwenemusi unu amwejere katondo, okukoka abarimi ba mwisambu ryae rye mijabibu.

² Ejire amara okuragana na barimi rusiku rumwi siringi, nabatuma mwisambu ryae rye mijabibu.

³ Nauruka uti saa esatu, narora abandi bemereguyu mwika:niro baoere:ra.

⁴ Nababwira ati, Emwe one mugende mwisambu ryani rye mijabibu, na cinu cire:ya nje mbayane. Nibagenda.

⁵ Nauruka rindi uti saa eta:nu na imwi na rindi uti saa eta:nu ne:na, nakora kutyo.

⁶ Nasubouruka uti saa ekumi na imwi, nasanga abandi bemeruguyu era, nababu:sya ati, ?Niki cinu cabemeregusyu anu esu:ba tubi muoere:ra?

⁷ Nibamubwira ati, Okuba atario unu acikoka. Nababwira ati, Emwe one mugende mwisambu ryani rye mijabibu, na cinu cire:ya omujo:bona.

⁸ Wejire kwaba ke:goro, omwene:sambu rye mijabibi namubwira omu:nu wae ati, Birikira abarimi, ubayane omuyero gwebwe, wambire ku ba ku bute:ro kukinga ku bo kwamba.

⁹ Bejire ba:ja aba saa ekumi na imwi, nibayabwa mu:nu wo:ne siringi imwi imwi.

¹⁰ Abo kwamba bejire ba:ja, mbetogera ati, ecijo:yanwa nyafu, ka:bo one nibayabwa mu:nu wo:ne siringi imwi imwi.

¹¹ Bejire bamara okuyabwa, nibetoŋanira ku mwenemusi,

¹² Niba:ika ati, Aba:nu ba ku bute:ro, banu bakora saa imwi era, ka:we wabariŋanya neswe banu ce:komesya mu nya:ko no mumwi nguco:ca.

¹³ Naindura namubwira oumwi kwabo ati, Musa:ni, ntakukoree kubi:bi. ?Cari citaragene nanye isiringi?

¹⁴ Gega eyao ugende, enenda okuyana omusingirisi rwawe.

¹⁵ ?Kutanyiire anye kukorera ebyani rwa kutyo enenda? ?Tere amwi eri:so ryao ni:bi:bi okuba anye ndi wa kisi?

¹⁶ Mbe nikwo kutyo aba inyuma nibo bariba bo kwamba, na bo kwamba nibo bariba ba inyuma.

Yesu nasuba okwaika okufwa no kusu:ka kwae

¹⁷ Anu Yesu ariga acarinya okugenda Yerusalemi, nagega abe:igisibwa ekumi na babiri bwitebe, nababwiririra mu njira ati,

¹⁸ Mbe rora ecirinya okugenda Yerusalemi. Omwana wo mu:nu aritu:rwa mu maboko ga bagabisi abakuru na bandiki, barimutemera eci:na e:twe.

¹⁹ Barimusira ku ba maanga bamujimye no kumusanya jisanyu, no kumubamba ku musaraba. Na ku rusiku rwa kasatu arisu:ka.

Yoana na Yakobo mbayenja obukuru

²⁰ Mbe niwo nyira aba:na ba Jebedayo na:ja aamwi na ba:na bae, namuramya namusabwa omusango.

²¹ Namubu:sya ati, Owenda ki? Namubwira ati, Ragirira aba:na bani banu benyanje, oumwi ku kuboko kwao okwe buryo no undi ku kwe bumosi, mu bukama bwao.

²² Yesu naindura ati, Mutakumenya cinu omusabwa. ?Omutura okunywa ku cikombe cinu anye ndinywako, no kubatijibwa okubatija kunu anye ndibatijibwa? Nibamubwira ati, Ecitura.

²³ Nababwira ati, Ni cimari murinywa ku cikombe cani, nawe okwinyanja ku kuboko kwani okwe buryo no kwe bumosi kutari kwani okukugaba, tari abo Rata e:ra:biye.

²⁴ Na barya ekumi bejire bongwa nibabiirirwa ababiri abo aba inda imwi.

²⁵ Yesu nababirikira na:ika ati, Mumenyere ati, abatungi ba maanga ababatunga na bakuru bebwe ababatungira managa.

²⁶ Nawe bitariba kutyo mwimwe, nawe unu wo:ne kenda okuba mukuru mwimwe, arabaga mufurubendi wemwe.

²⁷ Na unu wo:ne kenda okuba wo kwamba mwimwe, arabaga mugaya wemwe.

²⁸ Rwa kutyo Omwana wo mu:nu ate:jire kufurubenderwa, tari okufurubenda no kuso:sya obuanga bwae korereki acungure ba:nu ba:fu.

Abaofu babiri nibe:gurwa ame:so

²⁹ Anu bariga bacaso:ka mu Yeriko, ecise cinene nicimuru:ba.

³⁰ Mbe abaofu babiri banu bariga benyanjire ku mbari ya injira bejire bongwa ati, Yesu niwe kaitiŋana, niba:nikirisisya inguru niba:ika ati, cifwire ecigongo, Ratabugenyi, Awe Omwana wa Daudi.

³¹ Ebise nibibagonya bajibire, nawe abene nibeyongesya okwanikirisisya inguru niba:ika ati, Cifwire cigongo, Ratabugenyi, Awe Omwana wa Daudi.

³² Yesu nemereguru na:ika ati, Omwenda mbakore kutiki?

³³ Nibamubwira ati, Ecenda ame:so geswe garore.

³⁴ Yesu nabafwirwa ecigongo, nakunia ku me:so gebwe. Aonao ame:so gebwe nigarora, nibamuru:ba.