Matayo 2 - INDAGANO INYA:YA

Abengeso nibamuyenja Yesu

¹ Wejire Yesu e:burwa mu Beteleemu ya Buyaudi, mu siku jo mukama Erode, mbe abengeso banu baso:kere ebuturuka nibakinga Yerusalemi.

² Nibaika ati, Ari a:ki unu e:buywe Omukama wa Bayaudi? Okuba carorere injota yae ebuturuka, nici:ja okumuramya.

³ Nawe Omukama Erode ejire ongwa nawa omwoyo na ba Yerusalemi bo:ne aamwi nage.

⁴ Nakofya abagabisi abakuru bo:ne na bandiki ba ba:nu, nababu:sirisya ati, ?Kristo ariburirwa a:ki?

⁵ Mbamubwira ati, Mu Beteleemu ya Buyaudi, kwo kuba nikwo kutyo byandikirwe no muragi ati,

⁶ Na:we Beteleemu mu ca:ro ca Yuda, utari muto:to mu bakuru ba Yuda. Okuba Omutungi ariso:ka mwawe Unu arire:ba aba:nu bani.

⁷ Mbe niwo Erode nabirikira abengeso bwitebe, nababu:sirisya muno omwanya gunu injota yabonekeemo.

⁸ Nabatuma Beteleemu na:ika ati, Mugende muyenjeyenje muno Omwana oyo, nawe mukamubona mu:je mumbwire, korereki anye one nije okumuramya.

⁹ Wejire bongwa ebyo mukama nibe:muka, mbe rora, injota eyo baroree ebuturuka ni:batangatira ni:ja niimereguru anu Omwana ariga:ri.

¹⁰ Wejire barora injota nibakonderwa ekonderwa ryafu butamire.

¹¹ Mbengira mu nyumba, mbarora Omwana na Maryamu nyiramwene, nibafukama nibamuramya, nibasurumura jinsagwa jebwe, nibamufu:wa emigemu ja jaabu no mugaju na mafuta amarange.

¹² Wejire bakengibwa na Nyamuanga mu ciro:to ati, musige kusuba ku Erode, nibasuba ewabo nibatura ku njira indi.

¹³ Mbe wejire bagenda, mbe rora, maraika wa Ratabugenyi namusoromokera Yusufu mu ciro:to na:ika ati, Imuka, ugege Omwana na nyiramwene, wirukire Misiri, ubeyo kukinga runu ndikubwirira, kwo kuba Erode kajo:kuyenja Omwana amwite.

¹⁴ Wejire arafya, nagega Omwana na nyiramwene mu ngeta nagenda Misiri.

¹⁵ Naba eyo kukinga Erode anu afwiriye, korereki cikumire cinu Ratabugenyi a:ikiriye mu muragi ati, Nabirikiye Omwana wani okuso:ka Misiri.

¹⁶ Mbe Erode wejire arora ati abengeso bamujimya, najira risungu ryafu, natuma aba:nu okwita aba:na be cisambaya banu bariga mu Beteleemu na mu mbibi jagwo jo:ne, banu bamarire myaka ebiri na banu bariga bacari kujimara, rwo mwanya gunu ababu:sirisisyemo abengeso kutyo gwariga guri.

¹⁷ Mbe niwo cakumiye eco ca:ikirwe no muragi Yeremiya na:ika ati,

¹⁸ Oburaka bungwiriywe mu Rama, Okukunga no kurira jimamu, Raeli naririra aba:na bae, Atakwenda kusi:ri:sibwa kwo kuba batacariwo.

Mbasuba Najareti

¹⁹ Erode wejire afwa, maraika wa Ratabugenyi nasoromokera Yusufu mu ciro:to mu Misiri,

²⁰ Na:ika ati, Imuka, ugege Omwana na nyiramwene, ugende mu ca:ro ca Israeli, kwo kuba banu bayenjaga Omwana okumwita bafu:ye.

²¹ Nemuka nagega Omwana na nyiramwene naja mu:si ya Israeli.

²² Wejire ongwa ati Arikelao atungire Buyaudi kubwa Erode esemwene, no:baya okusubayo. Nakengibwa na Nyamuanga mu ciro:to, nabarama nakinga mu mbara ja Galilaya.

²³ Wejire bakinga nibe:kara mu ruguyo runu rwatogwaga Najareti; korereki bikumire binu byaikirwe na baragi, ati, Aritogwa Munajareti.