Matayo 19 - INDAGANO INYA:YA

Yesu nasuba Bayaudi

¹ Ejire Yesu amara emisango ejo, naso:ka Galilaya nagenda mu ca:ro ca Buyandi, ku ngego ya Yorodani.

² Ebise byafu nibimuru:ba, nabaosisya eyo.

Inyaruba yo buta:ni

³ Abafarisayo nibamu:jako nibamusaka, nibamubu:sya ati, ?Omu:nu e:kirisibwe okuirisya omugasi wae kubwe cifuno co:ne co:ne?

⁴ Naindura na:ika ati, ?Mutakusoma ati, unu abakorere ku bwambiro akorere omurume no mugasi?

⁵ Na:ika ati, Omu:nu kwarakoraga nasiga esemwene na nyira agwatane no mugasi wae, na babiri bo:ne barabaga mubiri gumwi.

⁶ Batakuba babiri rindi, nawe ni mubiri gumwi. Mbe, binu Nyamuanga agwatanyisye omu:nu atarija kubita:nya.

⁷ Nibamubu:sya ati, ?Kubaki Musa aragiriye okumuyana inyaruba yo buta:ni, korereki amusige?

⁸ Nababwira ati, Kurwo bukomee bwe mitima jemwe Musa kwakorere ne:kirisya okuirisyaga abagasi bemwe, nawe kuso:ka ku bwambiro bitariga kutyo.

⁹ Anye enibabwira ati, Unu arairisyaga omugasi wae tari bamugwatire no murume oundi, akatwara oundi, kaba muromesi. Na oyo katwara unu airisibwe one kaba muromesi.

¹⁰ Abe:igisibwa bae nibamubwira ati, Ebigambo byo mu:nu no mugasi wae bikaba kutyo, kutakondere okufwara.

¹¹ Nawe nababwira ati, Aba:nu bo:ne batakutura kwikirisya omusango gunu, tari banu baciyabirwe.

¹² Okuba bario abajigaru banu be:buywe bari kutyo kuso:ka munda ja banyiramwene. Bario abajigaru banu banauywe na ba:nu. Ka bario abajigaru banu be:jiga:si-sye abe:ne kurwo bukama bwa mu rwire. Unu katura okwikirisya e:kirisye.

Yesu nabayana aba:na ribando

¹³ Mbe niwo nibamure:tera aba:na abato:to korereki abateko amaboko, asabwe. Abe:igisibwa bae nibabagonya.

¹⁴ Nawe Yesu na:ika ati, Mubasige aba:na abato:to ba:je kwanye, mutabaganya, okuba abe:ja:bo banu, obukama bwa mu rwire ni bwebwe.

¹⁵ Nabatako amaboko, naso:kayo.

Omumura omuni:bi

¹⁶ Mbe rora, omu:nu umwi namu:jako namubu:sya ati, Omwiigisya wo bwana, ?nikore musango ki gwo bwana korereki nibone obuanga bunu butakuwao?

¹⁷ Namubwira ati, Ountogera ki wo bwana? Atario wa bwana tari Nyamuanga era. Nawe ukenda okwingira mu buanga, gwata ebiragiro.

¹⁸ Namubu:sya ati, Ni bi:ya? Yesu namubwira ati, Ute:taga, Utaromeraga, Ute:baga, Utabeeresyaga.

¹⁹ Ubarega esomwana na nyokomwana, Umwendega omwikasyanya wao rwa kutyo owiyenda omwene.

²⁰ Omumura oyo namubwira ati, Ebyo byone ndabigwatire kuso:ka ku buto:to bwani. ?Niki cinu cangerukako rindi?

²¹ Yesu namubwira ati, Araba owenda okuba unu aku:miye, genda uka:ne binu unabyo, ugabire abataka, uriba no buni:bi mu rwire. Niwo u:je undu:be.

²² Omumura oyo ejire ongwa omusango ogwo, nagenda asurumbae, okuba ariga na buni:bi bwafu.

²³ Yesu nabwira abe:igisibwa bae ati, Ni cimari enibabwira ati, kukomee omuni:bi okwingira mu bukama bwa mu lwire.

²⁴ Nababwira rindi ati, Ni kwangu ingamira okuitiŋana mwiundu rya insinga kukira omuni:bi okwingira mu bukama bwa Nyamuanga.

²⁵ Abe:igisibwa bae bejire bongwa nibarugu:ra muno, niba:ika ati, ?Ka niga unu katura okukisibwa?

²⁶ Yesu nabarore:rera, nababwira ati, Ku ba:nu eco cita:mi:sye, nawe Nyamuanga katura byone.

²⁷ Petero naindura na:ika ati, Rora, eswe casigire byone nicikuru:ba. Mbe ciribonamo:ki?

²⁸ Yesu nababwira ati, Ni cimari enibabwira ati, Mu kwiburwa kwa kabiri, orwo Omwana wo mu:nu ariyanja ku citebe ca rikusyo ryae, emwe one banu mwandu:bire muriyanja ku bitebe ekumi na bibiri nimutemera eci:na jiŋanda ekumi ne:biri eja Israeli.

²⁹ No mu:nu wo:ne unu asigire inyumba, amwi bamura ba:bo, amwi bayara ba:bo, amwi esemwene, amwi nyiramwene, amwi ba:na, amwi busi, kurwa risi:na ryani, ariyabwa kwiya egana, no kurya omwandu obuanga bunu butakuwao.

³⁰ Nawe aba:fu abo kwamba nibo bariba aba inyuma na ba inyuma nibo bariba abo kwamba.