Matayo 16 - INDAGANO INYA:YA

Abafarisayo nibenda ecibarikisyo

¹ Abafarisayo na Basadukayo niba:ja okumusaka, nibamusabwa abe:resye ecibarikisyo co kuso:ka mu rwire.

² Omwene naindura nababwira ati, Wora kwaba kegoro, omwaika ati, Okujo:kuba kisi, okuba orwire rutukuye.

³ Na katondo ati, Rero, oruja okubao orwijogoro okuba orwire rutukuye ka rutingire. Emwe ba rurimi, mumenyere okubarikisya orususo rwo rwire, nawe ebibarikisyo bya magoro mutakutura kubarikisya.

⁴ Aba riimbo ribi:bi ne ryo buromesi abayenja ecibarikisyo. Nawe batariyabwa cibarikisyo, tari ecibarikisyo ca Yona.

Yesu na:ika ecigambo ce cifwimbya

⁵ Abe:igisibwa bae nibambuka ku ngego yenderya nibarabirwa okugega emikate.

⁶ Yesu nababwira ati, Mukabuke mwikenge ecifwimbya ca Bafarisayo ne:ca Basadukayo.

⁷ Nibabambasyanya abene:ra niba:ika ati, Okuba citagega emikate.

⁸ Yesu namenya nababwira ati, Emwe abo kwikirisya okuto:to, ?Niki cinu omukora nimubambasyanya emwe abene:ra, okuba mutagega emikate?

⁹ ?Mucari kusombo:kerwa? ?Amwi mutakwicuka emikate eta:nu ka bariya ebisira ebita:nu ni bi:bo biringa binu mwabojeemo?

¹⁰ ?Amwi mutakwicuka ebisira ebina, ni bitukuru biringa binu mwabojeemo?

¹¹ ?Niki cinu ecibabusya okusombo:kerwa ati, nitababwira bya mikate? Nawe mwikenge ecifwimbya ca Bafarisayo ne:ca Basadukayo.

¹² Mbe niwo niba-sombo:kerwa ati, atakwaika cifwimbya ca mikate, tari okwiigisya kwa Bafarisayo na Basadukayo.

Petero na:ika ati Yesu niwe Kristo

¹³ Yesu ejire akinga mu ca:ro ca Kaisaria Filipi, nabu:sya abe:igisibwa bae ati, ?Anye Omwana wo mu:nu, aba:nu abantoga ati, nanye:ga?

¹⁴ Niba:ika ati, Abandi abakutoga ati, Yoana Omubatija. Abandi ati, Eliya. Abandi ati, Yeremia, amwi oumwi ku baragi.

¹⁵ Nababu:sya ati, ?Nawe emwe omuntoga ati ndiga?

¹⁶ Simoni Petero naindura na:ika ati, Awe na:we Kristo Omwana wa Nyamuanga Omuanga.

¹⁷ Yesu naindura namubwira ati, Una ribando Simoni wa Yona, okuba omubiri na manyinga bitakusweruriye eco, tari Rata unu ari mu rwire.

¹⁸ Anye enikubwira ati, Awe na:we Petero, nanye ndyumbaka ikanisa yani ku rutare runu, nakabee jiri emiryango je bwire jitariiiga.

¹⁹ Ndikuyana jifunguro jo bukama bwa mu rwire. Cinu co:ne uraboyaga mu ca:ro ciriboywa mu rwire. Na cinu co:ne urasurumuraga mu ca:ro, arisurumurwa mu rwire.

²⁰ Mbe niwo nabakomeresya abe:igisibwa ati, Mutaja kubwira mu:nu wo:ne ati, Niwe Kristo.

Yesu naraga okufwa no kusu:ka kwae

²¹ Okuso:kerera mu mwanya ogwo Yesu namba okube:resya abe:igisibwa bae ati, ni busi busi agende Yerusalemi, okujo:nya:sibwa kwafu na bakaruka na bagabisi abakuru na bandiki, no kwitwa, no kusu:rurwa ku rusiku rwa kasatu.

²² Mbe Petero namwicundya ku mbari namba okumuganya na:ika ati, Tere, Ratabugenyi, ebyo bitarikubako na katyari.

²³ Yesu nacu:ka nabwira Petero ati, Suba inyuma yani Syetani. Uri ci:ku:juro kwanye, okuba utakwiganirisya ebya Nyamuanga, nawe ebya ba:nu era.

Injira yo kuru:ba Yesu ni yo musaraba

²⁴ Mbe niwo Yesu nababwira abe:igisibwa bae ati, Omu:nu wo:ne akenda okundu:ba e:ganye omwene, e:twike omusaraba gwae, andu:be.

²⁵ Okuba unu wo:ne kenda okukisya obuanga bwae, aribubusya, na unu wo:ne kabusya obuanga bwae kubwani niwe aribubona.

²⁶ ?Okuba omu:nu aribona muri:ro ki, akarya i:si yone, ke:nu nafwirwamo obuanga bwae? Tere amwi omu:nu arigwata ki eco kutambana no buanga bwae?

²⁷ Okuba Omwana wo mu:nu ari:jira mwikusyo rya Esemwene aamwi na bamaraika bae. Mbe niwo ariyana omu:nu wo:ne rwa kutyo ebikorwa byae biri.

²⁸ Ni cimari enibabwira ati, Bario ku banu bemereguyu anu, banu batariraba rufu kata, kukinga runu barirora Omwana wo mu:nu na:ja mu bukama bwae.