Matayo 15 - INDAGANO INYA:YA

Abafarisayo nibatoŋanyibwa kurwe misiro jebwe

¹ Mbe niwo abandiki na Bafarisayo niba:ja ku Yesu banu bariga baso:kere Yerusalemi, niba:ika ati,

² ?Abe:igisibwa bao niki cinu ecikora nibanyamura ebye cikuru? Kwo kuba abarya ebiryo bate:sa:bire.

³ Nabaindura ati, ?Emwe one niki cinu omukora nimunyamura eciragiro ca Nyamuanga ku bye cikuru byemwe?

⁴ Okuba Nyamuanga aragiriye ati, Ubarega esomwana na nyokomwana, na unu arafumaga esemwene amwi nyiramwene, e:twe cimwi.

⁵ Nawe emwe omwaika ati, Unu wo:ne aribwira esemwene amwi nyiramwene ati, Co:ne cinu wakabwenemo omuri:ro kwanye, ni ciyanwa ku Nyamuanga, narema okubara esemwene amwi nyiramwene.

⁶ Mwamarireo eciragiro ca Nyamuanga ku bye cikuru byemwe.

⁷ Emwe ba rurimi! Isaya aragire cimari kwimwe ati,

⁸ Aba:nu banu abambara cibaro ca ku minwa, Nawe omitima jebwe jiri kura nanye.

⁹ Nawe abandamya:ra kutyo, abeigisya ebiragiro bya ba:nu uti kwiigisya kwa cimari.

¹⁰ Nabirikira ecise, nababwira ati, Mungwe musombo:kerwe!

¹¹ Cinu ecijabiyasya omu:nu citari cinu ecingira mu kanwa, nawe cinu eciso:ka mu kanwa, eco nico ecijabiyasya omu:nu.

¹² Mbe niwo abe:igisibwa niba:ja nibamubu:sya ati, ?Umenyere ati Abafarisayo babiiywe bejire bongwa omusango ogwo?

¹³ Nawe Omwene naindura ati, Eciyambwa co:ne cinu Rata wa mu rwire atayambire ciri:ywa.

¹⁴ Mubasige. Abo ni baofu banu abatangasya baofu. Nawe omuofu akatangasya omuofu we:ja:bo, abagwa bo:ne babiri mu ryobo.

¹⁵ Petero namuindura ati, Cisombo:rere ecijekekanyo eco.

¹⁶ Yesu na:ika ati, ?Emwe one mucari kwengeya?

¹⁷ ?Mutakusombo:kerwa ati, co:ne cinu ecingira mu kanwa ecigenda munda nice:swa mu runio?

¹⁸ Nawe binu ebiso:ka mu kanwa nibyo ebiso:ka mu mutima, ka nibyo ebijabiyasya omu:nu.

¹⁹ Okuba mu mutima nimwo ebiso:ka ame:ganirisyo amabi:bi, obwiti, oburomesi, obusengi, obwifi, okubeeresya no kufuma.

²⁰ Ebyo nibyo ebijabiyasya omu:nu, nawe okurya ate:sa:bire kutakujabiyasya mu:nu.

Okwikirisya kwo Mukananigasi

²¹ Yesu naso:kayo, nagenda mu byaro bya Turo na Sidoni.

²² Mbe rora, Omukananigasi naso:ka mu ca:ro eco naragirisisya inguru namubwira ati, Unfwirwe cigongo, Ratabugenyi awe Omwana wa Daudi. Omuyasya wani aungirwe omusambwa.

²³ Nawe Omwene atamuinduye musango. Abe:igisibwa bae niba:ja, nibamwiremberesya ati, Numubwire agende okuba kaciyombera inyuma yeswe.

²⁴ Omwene naindura ati, Nitatumirwe tari ku na:ma jinu jaburire eja mu nyumba ya Israeli.

²⁵ Nawe Omwene na:ja namuramya na:ika ati, Ratabugenyi, nsakira.

²⁶ Naindura ati, Kutari kwa bwana okugega ebiryo bya ba:na no kwesera otubwa.

²⁷ Omugasi uyo na:ika ati, Nikwo kutyo, Ratabugenyi, nawe otubwa one oturya obuungururu bunu oburagara okuso:ka ku meja ya besebugenyi.

²⁸ Mbe niwo Yesu naindura namubwira ati, Omugasi awe, okwikirisya kwao ni kunene. Bibe kwawe rwa kutyo owenda. Omuyasya wae naora kuso:kerera mu mwanya ogwo.

Barwae ba:fu mbaosibwa. Bisira bina mbarisibwa

²⁹ Yesu naso:kayo, nakinga ku mwaro gwa inyanja ya Galilaya, narinya ku ci:ma, nenyanja okwo.

³⁰ Ebise byafu nibamu:jako, barina abatigisi, na baofu, na bajibi, na barema, na bandi ba:fu, nibabatu:ra ku maguru gae, nabaosya.

³¹ Ndijei ebise nibirugu:ra, bejire barora abajibi niba:ika, abarema nibakoba, abatigisi nibaribata, abaofu mbarora. Ebise nibikusya Nyamuanga wa Israeli.

³² Nawe Yesu nabirikira abe:igisibwa bae, na:ika ati, Nabafwirwa aba:nu ecigongo okuba rero camarire nabo siku isatu, na batana ci:nu ca kurya. Okuba nitakwenda kubaraga ke:nu bari no mweko, batefura nibayutukira mu njira.

³³ Abe:igisibwa nibamubu:sya ati, ?Jecibone a:ki emikate myafu mwibara anu jo kwigusya ecise cinene cinu?

³⁴ Yesu nababu:sya ati, ?Murina mikate eringa? Niba:ika ati, Eta:nu ne:biri ne biswi bitya:ri.

³⁵ Naragirira ebise biyanje a:si.

³⁶ Nagega emikate ejo eta:nu ne:biri ne biswi, nasi:ma najibeganya, najiyana abe:igisibwa, abe:igisibwa nibagabira ebise.

³⁷ Nibarya bo:ne nibe:guta nibakofya ebiba:ra binu byasigae mbe:jusya bitukuru bita:nu na bibiri.

³⁸ Na banu bariye bariga barume bisira bina, abagasi na ba:na batabariyweko.

³⁹ Naraga ebise, nasyabara mu bwato, naja nagoba mu ca:ro ca Magadara.