Matayo 13 - INDAGANO INYA:YA

Ebijekekanyo byo Bukama bwa mu Rwire. Ecijekekanyo co mubibi

¹ Ku rusiku urwo Yesu nauruka mu nyumba, neyanja ku njekekera ya inyanja.

² Ebise byafu nibimwikofyanyisya ndijei nasyabara mu bwato neyanja. Ecise co:ne nicimereguru ku njekekera.

³ Nababwira byafu mu bijekekanyo, na:ika ati, Mbe omubibi aurukire naja okubiba.

⁴ Anu ariga acabiba, jimbibo ejindi nijiragara ku njira, jinyonyi nijija njirya.

⁵ Ejindi nijiragara ku rutare, amaaru gatariko ma:fu. Aonao nijimera, okuba amaaru gariga gatariko ma:fu.

⁶ Risu:ba wejire ryaka nijiotoka, okuba jitariga na misi, niju:ma.

⁷ Ejindi nijiragara mu mawa. Amawa nigamera nigajisoritya.

⁸ Ejindi nijiragara mu maaru go bwana, nijitwasya amatwasyo, ejindi egana, ne jindi makumi gata:nu na rimwi, ne jindi makumi gasatu.

⁹ Unu ana matwi go kungwa, nongwe.

¹⁰ Abe:igisibwa bae niba:ja nibamubu:sya ati, ?Niki cinu oukora nuwaika nabo mu bijekekanyo?

¹¹ Nabaindura nababwira ati, Emwe mwayabirwe okumenya ebyo bumbise ebyo bukama bwa mu rwire, nawe abe:ne batayabirwe.

¹² Kwo kuba unu wo:ne ari nabyo, omwene ariyabwa, ka aryongesibwa byafu. Nawe unu atanaco ariso:sibwako na cinu anaco.

¹³ Mbe kwenikora nina:ika nabo mu bijekekanyo, okuba okurora abarora nawe batakubona, no kungwa abongwa nawe batakungwa, nakabee kuri kusombo:kerwa.

¹⁴ Oburagi bwa Isaya bwaku:miye mu bene, bunu obwaika ati, Okungwa muryungwa nawe mutarisombo:kerwa. Okurora murirora nawe mutari:te:ge:resya.

¹⁵ Okuba omutima gwa ba:nu banu gwasitoere, Na matwi gebwe gatakungwa kisi, Na me:so gebwe baongeresisye, Bareme okurora na me:so gebwe no kungwa na matwi gebwe, No kusombo:kerwa no mutima gwebwe, no kucu:ka, nanye nibaonye.

¹⁶ Nawe ame:so gemwe gana ribando okuba agarora, na matwi gemwe okuba agongwa.

¹⁷ Kwo kuba ni cimari enibabwira ati, Abaragi ba:fu na barenge:resi ba:fu bariga mbarigira okurora binu omurora emwe, nawe batabirorere. Mbarigira okungwa binu omungwa nawe batabyunguywe.

¹⁸ Mbe emwe nimungwe ecijekekanyo co mubibi.

¹⁹ Omu:nu wo:ne unu kongwa omusango gwo bukama, akarema okusombo:kerwa, omubi:bi oyo na:ja naciso:syamo cinu cabibirwe mu mutima gwae. Oyo niwe unu abibirwe ku njira.

²⁰ Na oyo abibirwe ku rutare niwe unu kongwa omusango, ne:kirisya aonao nakonderwa,

²¹ Nawe atari na misi munda yae, nako:rao kuto:to. Nawe akabona inya:ko no kunya:sibwa kurwo musango, aonao nayabibwa.

²² Na oyo abibirwe mu mawa, niwe unu kongwa omusango, nawe okurumwarumwa ebye ca:ro no kubebeywa obuni:bi mbi:ganya omusango, nguremo:twasya.

²³ Nawe oyo abibirwe ku maaru go bwana niwe unu kongwa omusango no kugusombo:kerwa. Niwe oyo katwasya amatwasyo, oumwi katwasya egana, oundi makumi gata:nu na rimwi, oundi makumi gasatu.

Ecijekekanyo ca ingano na magorogoro

²⁴ Nabaterao ecijekekanyo ecindi, na:ika ati, Obukama bwa mu rwire bususene no mu:nu unu abibire imbibo yo bwana mwisambu ryae.

²⁵ Mbe nawe aba:nu be:jire bama:ma, na:ja omusoko wae nabibamo amagorogoro mu ngano, nagenda.

²⁶ Wejire jamera no kutinda nja:nurira, niwo ngabonekamo amagorogoro.

²⁷ Abagaya bae niba:ja nibabu:sya omwenemusi ati, ?Ratabugenyi, utabibire imbibo yo bwana mwisambu ryao? ?Mbe ka amagorogoro gaso:kere a:ki?

²⁸ Nababwira ati, Omusoko niwe akorere kutyo. Abagaya mbamubu:syaati, ?Owenda cigende cige:ye?

²⁹ Nawe omwene na:ika ati, Uri, amwi mukaba muce:ya amagorogoro, nimusinduriramo na jingano one.

³⁰ Musige bikure byone kukinga mwigesa. Na mwigesa ndibabwira abagesi ati, Mtangate mugakumanye amagorogoro mugaboe maseko mugo:ce. Nawe jingano mujigesere mu citara cani.

Ecijekekanyo ca ikaradari

³¹ Nabaterao ecijekekanyo ecindi, na:ika ati, Obukama bwa mu rwire bususene na inje ya karadari, inu omu:nu agegere nabiba mwisambu ryae.

³² Nawe ni mbibo no:to kukirwa junbibo jo:ne okuke:ya, nawe ikakura niba nene okukira emikubi jo:ne, ni:ba eti na jinyonyi ja mu rutumba njija nji:kara mu matabi gayo.

Ecijekekanyo ce cifwimbya

³³ Nababwira ecijekekanyo ecindi ati, Obukama bwa mu rwire obususana ne cifwimbya, eco omugasi agegere nacisa:sya mu ndengo esatu ja ji:fu, nijifwimba jo:ne.

³⁴ Yesu abwiriye ebise emisango ejo jo:ne mu bijekekanyo, amwi atari mu cijekekanyo atakababwiriye musango.

³⁵ Korereki cikumire cinu ca:ikirwe no muragi ati, Ndyasama omunwa gwani mu bijekekanyo, Ndigamba binu bibisirwe kuso:ka buyangwa bwa i:si.

Obugajuro bwe cijekekanyo ca magorogoro

³⁶ Mbe niwo Yesu naraga ebise, nengira mu nyumba. Abe:igisibwa bae nibamu:jako niba:ika ati, Cigajurire ecijekekanyo ca magorogoro ga mwisambu.

³⁷ Nabaindura na:ika ati, Unu kabiba imbibo yo bwana niwe Omwana wo mu:nu.

³⁸ Risambu niryo i:si. Imbibo yo bwana nibo aba:na bo bukama, nawe amagorogoro ni ba:na bo mubi:bi.

³⁹ No musoko unu agabibire ni Syetani, na rigesa nibwo bute:ro bwa maimbo, na bagesi ni bamaraika.

⁴⁰ Mbe rwa amagorogoro kutyo abage:a nibago:ca mu muriro, nikwo kutyo kuriba ku bute:ro bwa maimbo.

⁴¹ Omwana wo mu:nu arituma bamaraika bae bariso:sya mu bukama bwae binu ebiyabya byone na bo:ne banu abakora obunyamusi.

⁴² Baribe:sa mu ryobo ryo muriro. Omwo nimwo kuriba okurira no kuguguna ame:no.

⁴³ Mbe niwo abarenge:resi barise:kana rwa risu:ba mu bukama bwa Esemwene. Unu ana matwi go kungwa, nongwe.

Obuni:bi bunu bubisire. Iru:ruyo bugusi bwafu. Riyega rya jiswi

⁴⁴ Rindi obukama bwa mu rwire bususene no buni:bi bunu bubisirwe mwisambu bunu omu:nu ejire abubona nabubisa nakonderwa nagenda naka:na binu ariga anabyo byone nagura risambu eryo.

⁴⁵ Rindi obukama bwa mu rwire obususana no muka:ni unu kayenja jiru:ru jiŋonde.

⁴⁶ Wejire abona ru:ru imwi eyo bugusi bwafu, nagenda naka:na binu ariga anabyo byone, naigura.

⁴⁷ Rindi, obukama bwa mu rwire obususana na riyega rinu ryeserwe mu nyanja nirikofya jiswi ja jinyami jo:ne.

⁴⁸ Ryejire ryejura, nibarikururira ku njekekera, nibenyanja, nibajikumanya ejo bwana mu nsero, nawe jimbi:bi nibaje:sa.

⁴⁹ Nikwo kutyo kuriba ku bute:ro bwa maimbo. Bamaraika bari:ja, bariba:ura ababi:bi nibabaso:sya mu barenge:resi.

⁵⁰ Nibabe:sa mu ryobo ryo muriro. Omwo nimwo kuriba okurira no kuguguna ame:no.

⁵¹ Yesu nababu:sya ati, ?Mwasombo:kerwa omusango gunu? Nibe:kirisya ati, Yee!

⁵² Nababwira ati, Omwandiki wo:ne unu e:igisibwe ebyo bukama bwa mu rwire niwe kasusana no mwenemusi unu kaso:sya mwibikiro ryae ebi:nu ebiya:ya ne bya kara.

Yesu naremwa mu ca:ro ca:bo

⁵³ Ejire Yesu amarisya ebijekekanyo binu, naso:kayo.

⁵⁴ Nakinga mu ca:ro ca:bo nabeigisya mu rikofyanyisyo ryebwe, ndijei nibarugu:ra, niba:ika ati, ?Aso:sisye a:ki amenge ganu, ne birugu:ro binu?

⁵⁵ ?Unu tari niwe Omwana wo mubuya? ?Nyiramwene tari niwe katogwa Maryamu? ?Na bamura ba:bo tari Yakobo, na Yose, na Simoni, na Yuda?

⁵⁶ ?Na bayara ba:bo bo:ne citari nabo? ?Mbe ka abwene a:ki binu byone?

⁵⁷ Nibamubiirirwa, nawe Yesu nababwira ati, Omuragi atakuburwa cibaro, tari mu ca:ro ca:bo na mu musi gwabo.

⁵⁸ Ka one atakorere eyo ebirugu:ro byafu kurwo bute:kirisya bwebwe.