Matayo 12 - INDAGANO INYA:YA

Abe:igisibwa mbafuna obweke ku sabato

¹ Mu magoro ago Yesu naitiŋana mu masambu ku rusiku rwa isabato. Abe:igisibwa bae nibarumwa omweko, nibamba okutemamo obweke, nibarya.

² Nawe Abafarisayo bejire barora, nibamubwira ati, Rora, abe:igisibwa bao abakora eco musiro okukorera ku sabato.

³ Omwene nababu:sya ati, ?Mutakusomaga Daudi kutyo akorere, ejire omweko gwamuruma, na banu ariga:ri nabo.

⁴ Kutyo engiye mu nyumba ya Nyamuanga, narya emikate jo kweresya, jinu jasisyaga omwene obutajirya, nakabee na banu ariga:ri nabo, tari abagabisi era?

⁵ ?Tere amwi mutakusomaga mu biragiro, abagabisi mu yekaru ku sabato abanyamura isabato, ka nawe hatari na cikayo?

⁶ Nawe enibabwira ati, Ariwo anu unu kakira iyekaru obukuru.

⁷ Nawe mwakabee mumenyere obugajuro bwa cinu ati, Enenda ecigongo amwi nitakwenda co:go, mutakabateeko cikayo banu batakaire.

⁸ Okuba Omwana wo mu:nu niwe Omukuru wa isabato one.

Omu:nu afu:ye okuboko naosibwa ku sabato

⁹ Naso:kayo nengira mu rikofyanyisyo ryebwe.

¹⁰ Mbe ariga:rimo omu:nu afu:ye okuboko. Nibamubu:sya, niba:ika ati, ?Omu:nu e:kirisibwe okumuosya omurwae ku sabato? Wenda bajo:mubu:ra.

¹¹ Nababu:sya ati, ?Niga mwimwe unu ana ina:ma eimwi, ikagwa mu ryobo ku sabato, karemo:igwata no kuiso:syamo?

¹² ?Omu:nu atakukira muno ina:ma? mbe, kutaganyisye okukora ebyo bwana ku sabato.

¹³ Niwo namubwira omu:nu oyo ati, Gorora okuboko. Nakugorora, nikuora nikuba rwo kundi.

¹⁴ Nawe Abafarisayo nibauruka, nibamuromera iniku kutyo baramusimagisya.

¹⁵ Yesu okuba ariga amenyere, naso:kayo. Aba:nu ba:fu nibamuru:ba, nabaosya bo:ne.

¹⁶ Nabakomeresya basiga kumukumusya.

¹⁷ Korereki cikumire cinu ca:ikirwe no muragi Isaya ati,

¹⁸ Rora omukosi wani unu nasorere. Niwe omwendwa wani unu omwoyo gwani gukondereywe. Ndimutako omwoyo gwani, arigambira abamaanga eci:na.

¹⁹ Atariyomba amwi atarikunga amwi atariwo mu:nu unu aryungwa oburaka bwae ku njira.

²⁰ Risa:ru rinu ryatikire ataririfuna, Amwi orutambi runu ruce:tu:ta atarirusimya Kukinga anu arire:ta eci:na mu kuiga.

²¹ Na bamaanga bari:ikanya risi:na ryae.

Ecibi:bi co kumufuma Mwoyo Mweru

²² Mbe niwo nibamure:tera omu:nu unu ariga aungirwe omusambwa, ari muofu ka:ri mujibi. Namuosya kukinga oyo ariga:ri muofu na mujibi na:ika no kurora.

²³ Ebise nibitaŋaŋara byone niba:ika ati, ?Unu atari Omwana wa Daudi?

²⁴ Nawe Abafarisayo bejire bongwa, niba:ika ati, Oyo atakuirisya emisambwa, tari kurwa Belizebuli, Omukuru we misambwa.

²⁵ Yesu namenya ame:ganirisyo gebwe nababwira ati, Obukama bwone bukasokana obwene obusimagira. No musi gwone amwi nyumba ikasokana eyene itari:mereguru.

²⁶ Na Syetani akairisya Syetani ke:soka omwene. ?Obukama bwae obwimereguru kutiki?

²⁷ Araba anye eniirisya emisambwa kurwa Belijebuli, aba:na bemwe abajiirisya kurwa ga? Kwobarikora nibaba baramusi bemwe.

²⁸ Nawe anye nikaba niirisya emisambwa kurwo Mwoyo wa Nyamuanga, mbe obukama bwa Nyamuanga bwabe:jiye.

²⁹ ?Amwi omu:nu katura kutiki okwingira mu nyumba yo mu:nu wa managa nasa:kura ebi:nu byae, tari atangatire kumuboya owa managa? Niwo nasa:kura inyumba yae.

³⁰ Unu atari aamwi nanye ni musoko wani. Na unu atakukofya aamwi nanye kanyarambura.

³¹ Kwenikora nimbabwira ati, Aba:nu bari:swaririrwa ecibi:bi co:ne no kufuma Nyamuanga kwone, nawe okufuma Omwoyo Mweru batari:swaririrwa.

³² Unu wo:ne ka:ika omusango gwo kufuma Omwana wo Munu ari:swaririrwa, nawe unu wo:ne ka:ika omusango gwo kufuma Omwoyo Mweru, atari:swaririrwa nakabee ari mu magoro ganu, nakabee ari mu magoro ganu gari:ja.

³³ Mukorega riti kuba rya bwana na matwasyo garyo one ga bwana, amwi mukorega riti kuba ebi:bi na matwasyo gendeko one kuba mabi:bi. Okuba riti ryone erimenyeka ku matwasyo garyo.

³⁴ Emwe orwiburo rwa ji:miri, ?omutura kutiki kwaika ebyo bwana mukaba muri babi:bi? Okuba omunwa ogwaika mu binu ebi:jura mu mutima.

³⁵ Omu:nu wo bwana kaso:sya ebyo bwana mwibikiro ryae ryo bwana, nawe omubi:bi kaso:sya abibi:bi mwibikiro ryae ribi:bi.

³⁶ Mbe enibabwira ati, Ecigambo co:ne co buyagayaga cinu aba:nu aba:ika, barica:ikira ku rusiku rwo kuramurwa.

³⁷ Okuba ku nyaika yao nikwo uribarirwa oburenge:resi na ku nyaika yao nikwo uritemerwa eci:na.

Ecibarikisyo ca Yona

³⁸ Mbe niwo abandiki abandi na Bafarisayo nibamuindura mba:ika ati, Omwiigisya, ecenda uce:resye ecibarikisyo cicirore.

³⁹ Omwene naindura nababwira ati, Riimbo ribi:bi ne ryo buromesi eriyenja ecibarikisyo, nawe batariyabwa ecibarikisyo, tari ecibarikisyo co muragi Yona.

⁴⁰ Kwo kuba rwa Yona kutyo amarire siku isatu mu mwisi na mu ngeta ari munda ya ikungurutare nyaburiko Omwana wo mu:nu arimara siku isatu mu mwisi na mu ngeta ari munda ya i:si.

⁴¹ Aba:nu ba Ninawi bari:mereguru mu kuramurwa aamwi na riimbo rinu bariri:tira eci:na, okuba abene batee kurwo kusimura kwa Yona. Mbe rora unu akirire Yona ari anu.

⁴² Omukama omugasi wa mu marimbe ari:mereguru mu kuramurwa aamwi na riimbo rinu ariri:tira eci:na. Okuba omwene aso:kere ku bute:ro bwa i:si ongwe obwenge bwa Suremani. Mbe rora, unu akirire Suremani ari anu.

Okwirosya era kutari kukisibwa

⁴³ Omusambwa omujabi wora gwaso:ka mu mu:nu, nigutura mu mbara jinu jitana manji, niguyenja wo kwisisya Omwoyo niguburwa.

⁴⁴ Niwo nigwaika ati, Nje nisube mu nyumba yani omwo naso:kere. Nigukingamo niguisiŋana iri tuyu, yeereywe, icumacumirwe.

⁴⁵ Mbe nigugenda nigure:ta emisambwa ejindi eta:nu ne:biri jinu jikirire ogwo okubiya, nijingira niji:kara omwo. Ebyo runyuma byo mu:nu oyo ebibiya kukira ebya kambere. Nikwo kutyo kuriba kwiimbo rinu ribi:bi.

Nyiramwene na ba:na babo mbayenja Yesu

⁴⁶ Anu ariga aca:ika ne bise, mbe, nyiramwene na ba:na ba:bo, bariga be:mereguyu anja, nibenda okwaikana nage.

⁴⁷ Omu:nu umwi namubwira ati, Rora, nyokomwana na bamura banyu be:mereguyu aanja, bendere okwaikana na:we.

⁴⁸ Omwene naindura oyo amubwiriye ati, ?Mai niga? ?Na bamura ba:su mbaga?

⁴⁹ Nagororera abe:igisibwa bae okuboko, na:ika ati, Abo mai na bamura ba:su!

⁵⁰ Kwo kuba unu wo:ne kakora ebyo Rata wa mu rwire kenda, oyo niwe omumura wa:su no muyara wa:su na mai.