Matayo 11 - INDAGANO INYA:YA

Risubyo rya Yesu ku be:igisibwa ba Yoana

¹ Ejire Yesu amara oragirira abe:igisibwa bae ekumi na babiri, naso:kayo nagenda okwiigisya no kurasya mu misi jebwe.

² Nawe Yoana e:jire ongwa mu nyumba yo buboywa ebikorwa bya Yesu, natuma abe:igisibwa bae,

³ Nibamubu:sya ati, ?Awe na:we unu ka:ja, tere cirindirire undi?

⁴ Yesu naindura nababwira ati, Mugende mumubwire Yoana binu omungwa na binu omurora.

⁵ Abaofu abarora, abarema abaribata, abagenge abaosibwa, abe:gare ba matwi abongwa, na bafu:ye abasu:rurwa, na bataka abasimurirwa ebigambo byo bwana.

⁶ Na ana ribando unu wo:ne atarinyi-ku:jurako.

⁷ Mbe bejire bagenda, Yesu namba okwaika ne bise ku bya Yoana ati, ?Niki cinu mwajiriye ibara okurora? ?Risa:ru rinu erisingisibwa no muyaga?

⁸ ?Nawe niki cinu mwajaga okurora? ?Omu:nu unu afwae bifwaro bye cire:re? Mbe rora, banu abafwara ebifwaro bye cire: re ababa mu nyumba ja bakama.

⁹ ?Nawe si niki cinu mwajaga okurora ?Omuragi? Yee, enibabwira ati, akirire kata omuragi.

¹⁰ Oyo niwe andikiywe ati, Enituma intumwa yani imbere yao, Unu aricuma injira imbere yao.

¹¹ Ni cimari enibabwira ati, Mwabo abe:burwa na bagasi acariga kuso:kamo mu:nu wa kukira Yoana Omubatija. Nawe omuto:to mu bukama bwa mu rwire ni mukuru kukira oyo.

¹² Kuso:kerera mu siku ja Yoana Omubatija kukinga rero obukama bwa mu rwire ni bwa biiga, na banu abeiganya ababusa:kurira managa.

¹³ Okuba abaragi bo:ne ne biragiro baragaga kukinga ku Yoana.

¹⁴ Mbe araba nimwenda okwikirisya, oyo niwe Eliya unu kenda oku:ja.

¹⁵ Unu ana matwi go kungwa, ongwe.

¹⁶ ?Nawe riimbo rinu nje ndisusanye naki? Erisusana na ba:na abato:to banu benyanjire munu abaka:nira nibabirikirana na be:ja:bo,

¹⁷ Niba:ika ati, Cababumira jikuri kemwe mwaremo:bina. Cabaririra jimamu ka nimurema okurira.

¹⁸ Okuba Yoana ejire atakurya amwi atakunywa, niba:ika ati, Ana musambwa.

¹⁹ Omwana wo mu:nu ejire narya no kunywa, niba:ika ati, Ni wa muru:ru unu na ni mukorwa, omusa:ni wa batobesya na be bibi:bi! Nawe obwengeso obuyabwa oburenge:resi kurwe bikorwa byabwo.

Intambara ku misi jinu jitatee

²⁰ Niwo namba okugonya emisi munu akoree ebirugu:ro byae byafu okuba jitatee.

²¹ Jirikubona, awe Korajini! Jirikubona, awe Betesaida! Kwo kuba ebye birugu:ro binu byakoreywe mwimwe kumba byakoreywe mu Turo na Sidoni, kumba jiratee kara bafwae amagunira na rifu.

²² Nawe anye enibabwira ati, ku rusiku rwo kuramurwa, Turo na Sidoni jiriba no kwigumirisya kukira emwe.

²³ Na:we Kaperinaumu, ?Urigungurumusibwa kukinga ku rwire? Uritebesibwa ebwire, okuba ebirugu:ro binu byakoreywe mwawe, kumba byakoreywe mu Sodoma, kumba gucarigao naka wori.

²⁴ Nawe enibabwira ati, ku rusiku rwo kuramurwa, i:si ya Sodoma iriba no kwigumirisya kukira awe.

²⁵ Mu magoro ago Yesu naindura na:ika ati, Enikusi:ma, Rata, Esebugenyi wo rwire na i:si, okuba wababisire abo bwenge na bengeso emisango jinu, nubaswerurira aba:na barera.

²⁶ Nimwomwo Rata, okuba kutyo nimwo byasi:miywe imbere yao.

²⁷ Rata ananire byone. Atariwo unu amenyere Omwana, atari Rata, amwi atariwo unu amenyere Rata, atari Mwana, na unu wo:ne Omwana kenda kamuswerurira.

²⁸ Mu:je kwanye, emwe bo:ne banu muigirwe no kusitoererwa nanye enijo:bafuŋamya.

²⁹ Mwitwike ingurwema yani, mwiigirire kwanye, okuba anye ndi mufura na mwororo mu mutima, nemwe omubona ecifuŋamyo ce myoyo jemwe.

³⁰ Okuba ingurwema yani ni nyororo, no mugugu gwani ni mwangu.