Matayo 10 - INDAGANO INYA:YA

Yesu natuma abe:igisibwa bae ku rugeso

¹ Nabirikira abe:igisibwa bae ekumi na babiri, nabayana obuinga ku misambwa emijabi okujiirisya, no kuosya jindwara jo:ne no burwaririsi bwone.

² Amasi:na ga jintumwa ni ganu, Owo kwamba Simoni unu atogwaga Petero, na Andereya wabo, Yakobo wa Jebedayo na Yoana wabo.

³ Filipo na Batolomayo, Tomaso na Matayo omutobesya, Yakobo wa Alifayo na Lebayo unu atogwaga Tadayo.

⁴ Simoni Omukananayo, na Yuda Isikariote, unu amuromee iniku.

⁵ Yesu nabatuma abo ekumi na babiri, nabaragirira ati, Mutaja kugenda mu njira ja bamaanga nakabee kuri kwingira mu misi ja Basamaria.

⁶ Nawe akiri mugende ku na:ma jinu jaburire eja mu nyumba ya Israeli.

⁷ Mbe murabaga nimuribata nimusimura ati, Obukama bwa mu rwire bwafugee.

⁸ Muosyega abarwae, mwesyega abagenge, musu:rurega abafu:ye, muirisyega emisambwa. Mwayabirwe kutyo era, emwe one muyanega kutyo era.

⁹ Mutagegaga jaabu amwi jimpirya amwi jiyera mu nsagwa jemwe.

¹⁰ Amwi mutagegaga nsagwa ya rugendo nakabee jiri kanju ebiri, nakabee biri bikwirya, nakabee iri isimbo, kwo kuba unu kakora emirimu e:ire okuyabwa ebiryo byae.

¹¹ Nawe Omusi gwone amwi ruguyo rwone murengiragamo mubu:syebu:syega unu e:ire, muma:me omwo kukinga anu muriso:kerayo.

¹² Murengiraga mu nju mwake:syamo.

¹³ Ikaba nyumba i:ire, omurembe gwemwe gube ku nyumba eyo. Nawe ikaba ite:ire, omurembe gwemwe gubasubire.

¹⁴ No mu:nu wo:ne akarema okubakuma, amwi kungwa emisango jemwe, mukaso:ka mu nyumba eyo amwi mu musi ogwo, mukunune oruteri rwa mu bigere byemwe.

¹⁵ Ni cimari enibabwira ati, ku rusiku rwa intambara i:si ya Sodoma na Gomora iri:gumirisyamo kukira omusi ogwo.

¹⁶ Mbe nabatuma rwa ji:na:ma agati ye misege. Mubega no bwenge rwa jinjoka no bwororo rwa jinjiba.

¹⁷ Nawe mwikenge aba:nu, kwo kuba baribasira mu bi:na, baribabuma mu mekofyanyisyo gebwe.

¹⁸ Murisirwa imbere ya basi:ba na bakama kubwani kuba rusingiro ku bene na ku bamaanga.

¹⁹ Nawe runu baribasira; mutariwa mwoyo ati ciryaika ki? amwi ati, Cirigamba kutiki? kwo kuba muriyabwa mu mwanya ogwo binu muryaika.

²⁰ Kwo kuba tari:mwe banu omwaika, nawe Omwoyo wa Esomwana niwe ka:ikirira mwimwe.

²¹ Owa inda imwi arisira owabo okuja okwitwa, ne:semwene arisira Omwana wae, na ba:na bari:mukira abe:busi bebwe nibabe:ta.

²² Aba:nu bo:ne baribasoka emwe kurwa risi:na ryani. Nawe unu ari:kome:sya kukinga ku bute:ro, niwe arikira.

²³ Nawe anu baribanya:sya mu musi ogwo, mwirukire mu gundi, kwo kuba ni cimari enibabwira ati, Mutariswisya misi ja Israeli kukinga anu ari:jira Omwana wo mu:nu.

²⁴ Omwiigisibwa atakukira omwiigisya, amwi omugaya atakukira esebugenyi.

²⁵ Omwiigisibwa kumwiire okuba rwo mwiigisya wae, no mugaya rwa esebugenyi. Bakaba batogere omwenemusi Belijebuli, ?batakukisyao aba mu musi gwae?

²⁶ Mbe, mutabo:bayaga, okuba gutariwo musango gunu gufundikiye gunu gutariswerurwa, amwi citariwo cinu cibisire cinu citarimenyeka.

²⁷ Cinu enibabwirira mu cisu:te, muca:ikirirega mu bweru. Na cinu omungwirwa mu kutwi, muca:ikirirega inguru ku nyumba.

²⁸ Amwi muto:bayaga banu abe:ta omubiri, nawe batakutura kwita omwoyo. Nawe mu:bayega unu katura okusimagisya omwoyo no mubiri byone mu muriro gunu gunyatasima.

²⁹ ?Barukuyure batakukanwa babiri yera eta:nu? Nawe ne ye:ja:bo imwi itakugwa a:si Esomwana atendere.

³⁰ Na jifwiri ja ku mitwe jemwe jibarirwe jo:ne.

³¹ Mbe mutaja ku:baya, emwe mukirire barukuyure aba:fu.

³² Mbe mu:nu wo:ne unu arintogora imbere ya ba:nu, anye one ndimutogora imbere ya Rata unu ari mu rwire.

³³ Nawe unu wo:ne arinyiga:nira imbere ya ba:nu, anye one ndimwiga:nira imbere ya Rata unu ari mu rwire.

³⁴ Mute:ganirisya ati, ne:jire kure:ta murembe mu ca:ro. Nite:jire kure:ta murembe, nawe ne:jire kure:ta ecinyambutu.

³⁵ Kwo kuba ne:jire okuta:nya Omwana ne:semwene, no muyasya na nyiramwene, no muka-mwana na nyabuko.

³⁶ Na baremo bo mu:nu bariba ba mu nyumba yae.

³⁷ Unu kenda esemwene amwi nyiramwene kukira anye atanyiire, na unu kenda omumura amwi omuyasya kukira anye, atanyiire.

³⁸ Na unu atakugega omusaraba gwae nandu:ba inyuma yani, atanyiire.

³⁹ Unu kaonya obuanga bwae aribubusya, na unu kabusya obuanga bwae kubwani aribubona.

⁴⁰ Unu kabakuma emwe, kankuma anye, na unu kankuma anye, kamukuma unu antumire.

⁴¹ Unu kakuma omuragi mwisi:na ryo muragi, ariyabwa omuyero gwo muragi. Na unu kakuma omurenge:resi mwisi:na ryo murenge:resi, ariyabwa omuyero gwo murenge:resi.

⁴² No mu:nu wo:ne akamuyana oumwi kwabo abato:to okunywa ecikombe ca manji era amanyiriye, mwisi:na ryo mwiigisibwa, ni cimari enibabwira ati, omuyero gwae gutarimubura na katyari.