Matayo 1 - INDAGANO INYA:YA

Obwiburwa bwa Yesu Kristo

¹ Ecitabo co bwiburwa bwa Yesu Kristo, Omwana wa Daudi, Omwana wa Iburaimu.

² Iburaimu e:buye Isaka. Isaka ne:bura Yakobo. Yakobo ne:bura Yuda na ba:na ba:bo.

³ Yuda ne:bura Faresi na Zera mu Tamari. Faresi ne:bura Esromu. Esromu ne:bura Aramu.

⁴ Aramu ne:bura Aminadabu. Aminadabu ne:bura Nasoni. Nasoni ne:bura Salimoni.

⁵ Salimoni ne:bura Boaji mu Raabu. Boaji ne:bura Obedi mu Rusi. Obedi ne:bura Yese.

⁶ Yese ne:bura omukama Daudi. Daudi ne:bura Sulemani mu muka Uriya.

⁷ Sulemani ne:bura Reoboamu. Reoboamu ne:bura Abiya. Abiya ne:bura Asa.

⁸ Asa ne:bura Yeosafati. Yeosafati ne:bura Aaji. Aaji ne:bura Ejekiya.

¹⁰ Ejekiya ne:bura Manase. Manase ne:bura Amoni. Amoni ne:bura Yosiya.

¹¹ Yosiya ne:bura Yekoniya na ba:na ba:bo, mu siku jo kusirwa Babuloni.

¹² Wejire bamara okusirwa Babuloni, Yekonia ne:bura Searutieri. Searutieri ne:bura Jerubabeli.

¹³ Jerubabeli ne:bura Abiudi. Abiudi ne:bura Eliakimu. Eliakimu ne:bura Ajori.

¹⁴ Ajori ne:bura Sadoki. Sadoki ne:bura Akimu. Akimu ne:bura Eriudi.

¹⁵ Eriudi ne:bura Eryasari. Eryasari ne:bura Matani. Matani ne:bura Yakobo.

¹⁶ Yakobo ne:bura Yusufu omurume wa Maryamu unu e:buye Yesu unu katogwa Kristo.

¹⁷ Mbe amaimbo go:ne kuso:ka ku Iburaimu okutunga ku Daudi ni maimbo ekumi na gana. No kuso:ka ku Daudi okukinga anu basirirwe Ebabuloni ni maimbo ekumi na gana. No kuso:ka anu basirirwe Ebabuloni kukinga ku Kristo ni maimbo ekumi na gana.

Okwiburwa Kwa Yesu Krista

¹⁸ Okwiburwa kwa Yesu Kristo kwariga kuri kutya. Maryamu nyiramwene, anu ariga acasandwa na Yusufu, bariga bacari kutwarana, nibamurora ajirire inda yo Mwoyo Omweru.

¹⁹ Mbe Yusufu omurume wae kwo kuba ariga murengeresi atendere kumuswasya, neganirisya okumusiga bwitebe.

²⁰ Anu ariga ace:ganirisya ebyo mbe rora, Maraika wa Ratabugenyi namusoromokera mu ciro:to naika ati, Yusufu mwana wa Daudi, uto:baya okumugega Maryamu omugasi wao, kwo kuba inda yae ni ya Mwoyo Mweru.

²¹ Ari:bura Omwana musambaya, na:we urimutoga risi:na ryae yesu, kwo kuba niwe aribakisya aba:nu bae mu bibi:bi byebwe.

²² Ebyo byone byabeeo korereki bikumire binu byaikirwe na Ratabugenyi mu muragi ati,

²³ Mbe rora, omuyarajuma arijira inda ari:bura omwana musambaya, Barimutoga risi:na ryae Imanueli, obugajuro ati, Nyamuanga ari a:mwi neswe.

²⁴ Yusufu wejire arafya mu ntiro nakora rwa kutyo maraika wa Ratabugenyi amuragiriye, nagega omugasi wae,

²⁵ Nawe atamutwae kukinga anu e:buriye Omwana wae wo bubere, namutoga risi:na ryae yesu.