Filemoni 1 - INDAGANO INYA:YA

Okuke:sya no Kusi:ma

¹ Anye Paulo, omuboywa wa Kristo Yesu, aamwi na Timoteo owasu, ku Filemoni, omwendwa no mukosi we:ja:su,

² amwi na Apofia omusubati, na Arikipo omusirikare we:ja:su, na ba ikanisa inu iri mu nyumba yao.

³ Ecigongo no murembe bibega kwimwe, binu ebiso:ka ku Nyamuanga Rata na ku Ratabugenyi Yesu Kristo.

⁴ Enisi:ma Nyamuanga wani kusiku, ninkwaika mu kusabwa kwani,

⁵ Okuba nonguywe okwenda kwao, no kwikirisya kunu unakwao ku Ratabugenyi Yesu na ku be:ru bo:ne.

⁶ Enisabwa ati, okusangira kwo kwikirisya kwao kukorega omurimu mu kumenya omusango gwone ogwo bwana gunu guri mwiswe kurwa Kristo.

⁷ Okuba natendeywe muno no kusi:ri:sibwa kurwo kwenda kwao, mwana wa:su, okuba urafuŋamisye emyoyo ja be:ru.

Ebyo mugaya Onesimo

⁸ Mbe, nakabee ndi no buba:si bwafu mu Kristo bwo kukuragirira binu bi:ire,

⁹ nawe enikuremberesya:ra kurwo kwenda, okuba ndi Paulo omukaruka omukuru, na ka wori ndi muboywa wa Kristo Yesu.

¹⁰ Enikuremberesya kurwo mwana wani unu ne:buriye mu buboywa bwani, niwe Onesimo.

¹¹ Ariga atakukujuna, nawe woryanu kacijuna awe nanye.

¹² Enimusubya kwawe, oyo niwe omwoyo gwani.

¹³ Unu anye nari nendere okuba nage anu, korereki a:furubenderega anye mu mwanya gwao mu buboywa bwe Bigambo byo bwana.

¹⁴ Nawe nitakwenda kukora musango ke:nu nitamenyere kwiganirisya kwao, obufura bwao bwasiga kuba mu kusinyirisibwa, nawe mu kwenda.

¹⁵ Okuba amwi nikwo akorere nakuso:kako omwanya, korereki ubega nage kajanende

¹⁶ Atacari mugaya rindi, nawe kukira omugaya, abee mwana wa:su omwendwa mu mubiri na mu Ratabugenyi, okukira muno kwanye, nawe kwawe kukirao muno.

¹⁷ Mbe, araba oumbara ati ndi we:ja:nyu, umuramire oyo rwanye omwene.

¹⁸ Nawe araba akunyamuriye amwi oumutonga ci:nu, eco nucimbarire anye.

¹⁹ Anye Paulo nandika eco no kuboko kwani, anye omwene ndiriya, nawe nitakukutonga ribanja ryao kwanye, niryo awe omwene.

²⁰ Mbe, mwana wa:su, nibone amabona kwawe mu Ratabugenyi, unsi:ri:sye omwoyo gwani mu Kristo.

Okukomeresya no kuke:sya

²¹ Nakwandikira okuba eniikanya obwororo bwao, okuba nimenyere ati, urikora binu ena:ika no kukirao.

²² Nawe ka rindi uncumacumire awo kusumbira, okuba eniikanya ati ndisubibwa kwimwe kurwo kusabwa kwemwe.

²³ Epafura kakuke:sya, niwe omuboywa we:ja:su mu Kristo Yesu.

²⁴ Na Mariko, na Arisitariko, na Dema, na Luka ababake:sya, nibo abakosi be:ja:su.

²⁵ Ecigongo ca Ratabugenyi Yesu Kristo cibega ne myoyo jemwe.