Ebikorwa 9 - INDAGANO INYA:YA

Yesu nasoromokera Saulo

¹ Nawe Saulo ariga acasinya okubakanga abe:te abe:igisibwa ba Ratabugenyi, nagenda ku mugabisi Omukuru,

² Namusabwa jinyaruba jo kugenda najo Damasiko, ku mekofyanyisyo, korereki akabonayo aba:nu ba Injira eyo, bakaba barume amwi bagasi, abare:te Yerusalemi baboyerwe.

³ Mbe anu ariga acaribata, ajo:kukinga Damasiko, ne:furwa obweru nibumuse:ka:nira okusoka mu rwire, nibumusingira,

⁴ Nagwa a:si, nongwa oburaka nibumubu:sya ati, Saulo, Saulo, ?niki cinu oukora nuunyasya anye?

⁵ Omwene na:ika ati, ?Nawega Ratabugenyi? Omwene na:ika ati, Nanye Yesu unu awe ounyasya.

⁶ Nawe imuka wingire mu musi. Oujo:kubwirwa binu bikwiire okukora.

⁷ Nawe abamura banu aribataga nabo nibe:mereguru nibataŋaŋara, nibongwa oburaka nawe batabwene mu:nu.

⁸ Saulo ne:muka a:si. Wejire e:sya ame:so, atabwene ci:nu. Nibamugwata okuboko nibamusira Damasiko.

⁹ Namara siku isatu atakurora, atakurya, atakunywa.

Anania natumwa ku Saulo

¹⁰ Ariga:rio mwiigisibwa mu Damasiko, risi:na ryae Anania. Ratabugenyi namubwira mu ciroro ati, Anania. Omwene ne:tabwa ati, Ndi anu, Ratabugenyi.

¹¹ Ratabugenyi namubwira ati, Imuka ugende mu njira inu eitogwa Ingororoke, ubu:sye mu nyumba ya Yuda omu:nu risi:na ryae Saulo, owende Tariso, okuba rora, kasabwa.

¹² Arorere mu biroro omumura, risi:na ryae Anania, nengira namutako amaboko arore.

¹³ Nawe Anania naindura ati, Ratabugenyi, nonguywe ebyo mumura oyo ku ba:nu ba:fu, rwa kutyo akoreraga bubi:bi bwafu abe:ru bao banu bari mu Yerusalemi.

¹⁴ Na anu one ano buturo okusoka ku bagabisi abakuru, aboega bo:ne banu abasabwa risi:na ryao.

¹⁵ Nawe Ratabugenyi namubwira ati Genda:ra, okuba oyo ni cikorero ecisorwa cani, asirega risi:na ryani imbere ya bamaanga na bakama, na ba:na ba Israeli.

¹⁶ Okuba ndimweresya ebigambo byafu binu bimwiire okunyasibwa kurwa risi:na ryani.

¹⁷ Anania ne:muka nagenda, nengira mu nyumba, namutako amaboko, na:ika ati, Saulo wa:su, Ratabugenyi antumire, niwe Yesu oyo amakusoromokera mu njira inu wamaturako. Antumire korereki urore, wijusibwe Mwoyo Mweru.

Paulo nabatijibwa, namba okusimura

¹⁸ Aonao nibigwa okuso:ka ku me:so gae uti bikamba, narora. Ne:muka nabatijibwa.

¹⁹ Ejire arya ebiryo, najira amanaga. Nabaga na be:igisibwa banu bariga mu Damasiko siku nyafuo.

²⁰ Aonao nasimura Yesu mu mekofyanyisyo ati, Oyo niwe Omwana wa Nyamuanga.

²¹ Bo:ne banu bamungwaga nibarugu:ra, nibabu:sya ati, ?Tari niwe unu abanyasyaga banu basabwaga risi:na rinu mu Yerusalemi, na ka e:jire anu akorereki abasire baboerwe ku bagabisi abakuru?

²² Nawe Saulo neyongesya okujira amanaga, nabaganda:sya Abayaudi banu bariga be:kae Damasiko, nakomeresya ati, Oyo niwe Kristo.

²³ Mbe wejire jaturao siku nyafu Abayaudi nibarwaja okumwita.

²⁴ Nawe Saulo namenya ina:ma yebwe. Nibamwitende:ra ku marango go musi mu mwisi na mu ngeta, bamwite.

²⁵ Nawe abe:igisibwa nibamugega nibamwisisya ku ndugu ari mu ri:bo.

²⁶ Saulo ejire akinga Yerusalemi, naregeja okusasikana na be:igisibwa. Nibamu:baya bo:ne, bate:kirisisye ati ni mwiigisibwa.

²⁷ Nawe Barinaba namugega, namure:ta ku ntumwa, nabasombo:rera kutyo arorere Ratabugenyi ku njira, na rwa kutyo a:ikire nage, na rwa kutyo asimuraga mwisi:na rya Yesu no buba:si mu Damasiko.

²⁸ Mbe nabaga aamwi nabo mu Yerusalemi, nengiraga no kuuruka.

²⁹ Nasimura no buba:si mwisi:na rya Ratabugenyi Yesu. Na:ika nabambasyanya na Baeburania be Cigiriki. Nawe abene nibayenja obwenge bwo kumwita.

Paulo nagenda Tariso

³⁰ Nawe abairi bejire bamenya nibamuyeregesya Kaisaria, nibamuraga aje Tariso.

³¹ Mbe jikanisa nijibona omurembe mu Buyaudi yo:ne na mu Galilaya na mu Samaria, nijumbakwa mu byo mwoyo nijiribata mu ku:baya Ratabugenyi, na mu kusi:ri:sibwa kwo Mwoyo Mweru, nijiyongesya.

Petero naosya Ainea

³² Mbe Petero anu aitiŋanaga wo:ne wo:ne, natebera okuja ku be:ru banu bariga be:kae mu Luda.

³³ Nasangayo omu:nu risi:na ryae Ainea, unu ariga ama:mire ku buriri emyaka eta:nu ne:satu, ariga afu:ye amaguru.

³⁴ Petero namubwira ati, Ainea, Yesu Kristo akuosya. Imuka, wanje oburiri bwao. Aonao ne:muka.

³⁵ Bo:ne banu bariga be:kae mu Luda na mu Saroni nibamurora nibamuindukira Ratabugenyi.

Tabisa nafwa nasubamo mwoyo

³⁶ Mbe mu Yopa ariga:rio mwiigisibwa umwi, risi:na ryae Tabisa, obugajuro bwaryo ati Dorika (kasosoji). Omugasi uyo ariga e:juye ebikorwa byo bwana ne biyanwa binu aso:syaga.

³⁷ Mbe e:ya mu siku ijo namara nafwa. Wejire bamara okumwosya nibamutera mwisago rya inguru.

³⁸ Na Luda yariga yei na Yopa. Nikwo abe:igisibwa bonguywe ati Petero ariyo, nibamutumira ba:nu babiri, nibamuremberesya ati, utako:ra oku:ja kwiswe.

³⁹ Petero ne:muka nagenda nabo. Wejire akinga nibamusira mwisago rya inguru. Abatumba bo:ne nibe:mereguru yei nage nibarira, nibe:resya jikanju ne bifwaro binu akoraga acari nabo.

⁴⁰ Nawe Petero nabaurusya bo:ne, nafukama nasabwa. Nainduka ku citundu na:ika ati, Tabisa imuka. Omwene ne:sya ame:so. Ejire arora Petero, ne:muka neyanja.

⁴¹ Namuyana okuboko, namwimusya. Wejire amara okubirikira abe:ru na batumba, namuta imbere yebwe ari muanga.

⁴² Omusango gunu nigumenyeka mu Yopa yo:ne. Ba:fu nibe:kirisya Ratabugenyi.

⁴³ Ejire e:ya ne:kara mu Yopa siku nyafuo, mu nyumba ya Simoni, omuyasi wa jinjai.