Ebikorwa 8 - INDAGANO INYA:YA

Abe:kirisya nibanyasibwa nibanyaragana

¹ Ku rusiku orwo nikubao okunya:sibwa kunene ku kanisa inu yariga mu Yerusalemi. Bo:ne nibanyaraganira mu:si ja Buyaudi na Samaria, tari jintumwa era.

² Aba:nu abe:ikanyibwa nibasi:ka Stefano, nibamuririra muno.

³ Nawe Saulo nanyamuraga muno ikanisa, nengira mu nyumba jo:ne nabakurura abarume na bagasi, nabatu:ra mu nyumba yo buboywa.

⁴ Mbe banu banyaragene nibaja ei ne:i, nibasimura ecigambo ca Nyamuanga.

Filipo nasimura mu Samaria

⁵ Filipo natebera mu musi gwa Samaria, nabasimurira Kristo

⁶ Ebise nibitegeresya na mutima gumwi ebyo Filipo a:ikaga, wejire bongwa nibarora ebirugu:ro binu akoraga.

⁷ Okuba mwabo ba:fu bariga ne misambwa emibi:bi, mbe nijibaso:kako, nijikunga na buraka bunene. Na ba:fu banu bariga barwae econdo na barema mbaosibwa.

⁸ Nikubao kukonderwa kwafu mu musi ugwo.

Simoni omurosi nabatijibwa

⁹ Mbe mu musi ugwo ariga:rio mu:nu umwi risi:na ryae Simoni, unu akoraga amaiku, nabataŋaŋasyaga ba:nu ba Samaria, ne:ku:ya ati ni mukuru.

¹⁰ Nibamungwaga bo:ne okwambira ku muto:to kukinga ku mukuru, niba:ika ati, Omu:nu unu ni muike mukuru wa Nyamuanga.

¹¹ Nibamungwaga, okuba abataŋaŋa-syaga na makura gae siku nyafu,

¹² Nawe wejire be:kirisya Ebigambo byo bwana binu Filipo abasimuriye ebyo bukama bwa Nyamuanga, na risi:na rya Yesu Kristo, nibabatijibwa abarume na bagasi.

¹³ Ka na Simoni omwene one ne:kirisya. Ejire amara okubatijibwa, nabaga aamwi na Filipo. Narora ebirugu:ro bya managa ne bibarikisyo ebinene binu byakorwaga, nataŋaŋara.

Petero na Yoana mbalumwa Samaria

¹⁴ Mbe, jintumwa banu bariga bari Yerusalemi, bejire bongwa ati, Abasamaria be:kirisisye omusango gwa Nyamuanga, nibabatumira Petero na Yoana.

¹⁵ Abene nibateberayo, nibabasabirwa bayabwe Omwoyo Mweru.

¹⁶ Okuba ariga acari ku be:kako na umwi, nawe babatijibwe era mwisi:na rya Ratabugenyi Yesu.

¹⁷ Mbe nibabatako amaboko, nibayanwa Mwoyo Mweru.

¹⁸ Nawe Simoni ejire arora ati, bayabwa Mwoyo Mweru kubwo kubaterako amaboko ga jintumwa, nabare:tera jimpirya,

¹⁹ Na:ika ati, Munane anye one obuinga bunu, korereki unu wo:ne niratagako amaboko, ayabwega Mwoyo Mweru.

²⁰ Petero namubwira ati, Nu:fwe na mapirya gao, okuba we:togera ati, eciyanwa ca Nyamuanga ecigurwa na jimpirya.

²¹ Awe utana mugabo nakabee eba:ra mu cigambo cinu, okuba omutima gwao gute:mire imbere ya Nyamuanga.

²² Mbe nu:te obubi:bi bwao bunu, usabwe Nyamuanga, ke:fura amwi nakwiswaririra eri:ganirisyo ryo mutima gwao.

²³ Okuba enikurora uri mu bururu bwa induru, ka uboyerwe mwifu:ta ryo bwiko:te.

²⁴ Simoni naindura na:ika ati, Munsabirwe ku Nyamuanga, byasiga kunkingako ebyo mwaika.

²⁵ Mbe wejire bamara okwaika no kusimura omusango gwa Ratabugenyi, nibasuba Yerusalemi, nibasimura Ebigambo byo bwana mu misi myafu ja Basamaria.

Filipo nabatija omu:nu wa Etiopia

²⁶ Nawe maraika wa Ratabugenyi nabwira Filipo ati, Imuka ugende mu marimbe mu njira inu eitebera okuso:ka Yerusalemi kukinga Gaja, niyo injira ya mwibara.

²⁷ Ne:muka nagenda. Mbe narora omu:nu wa Etiopia, unu ariga omunaure Omukuru mu bukama bwa Kandake, niwe omukamagasi wa Baetiopia. Ariga:ri mubi:ki we bi:nu byae byone, ariga ajiye Yerusalemi okuramya.

²⁸ Mbe nasuba enyanjire mwigari ryae, nasoma ecitabo co muragi Isaya.

²⁹ Omwoyo Mweru nabwira Filipo ati, Fugera ubumbirisyanye na rigari eryo.

³⁰ Filipo nabirima namungwa nasoma ecitabo co muragi Isaya, nabu:sya ati, ?Ousombo:kerwa binu ousoma?

³¹ Omwene na:ika ati, ?Enimenya kutiki nitatangasibwe na mu:nu? Naremberesya Filipo arinye enyanje aamwi nage.

³² Na binu byandikirwe binu ariga nasoma ni binu ati, Agegerwe okujo:kwitwa rwa ina:ma, Na rwo mwana wa ina:ma kutyo eijibira imbere ya banu abaitemako obufufi, Nyaburiko atatanyisye munwa gwae.

³³ Mu kwigairisibwa kwae aramuywe naso:sibwao. ?Niga unu ke:resya orwiburo rwae? Okuba obuanga bwae bwaso:sibwe mu:si.

³⁴ Omunaure naindura Filipo, na:ika ati, Enikusabwa, ?omuragi a:ikire byaga? ?Ni byae omwene, tere amwi ni bya mu:nu undi?

³⁵ Filipo nata:nya omunwa gwae, nambira ku binu byandikirwe ebyo, namusimurira Ebigambo byo bwana ebya Yesu.

³⁶ Mbe anu bariga bacaribata mu njira, nibakinga ku manji. Mbe omunaure na:ika ati, Ngaga amanji, ?niki eco ecinyingirira okubatijibwa? (

³⁷ Filipo na:ika ati, Uke:kirisya no mutima gwao gwone outura. Omwene naindura ati, Namwikirisya Yesu Kristo ati niwe Omwana wa Nyamuanga.)

³⁸ Naragirira rigari okwimereguru. Nibe:ka ku bubiri mu manji, Filipo no munaure, namubatija.

³⁹ Wejire baso:ka mu manji, Omwoyo gwa Ratabugenyi ngumugwafya Filipo, omunaure atasubire kumurora.

⁴⁰ Nawe Filipo abonekee mu Ajoto. Anu aitiŋanaga nasimura mu misi jo:ne ndijei nakinga Kaisaria.