Ebikorwa 7 - INDAGANO INYA:YA

Okusimura kwa Stefano mu ci:na

¹ Omugabisi Omukuru nabu:sya ati, ?Mbe ebyo nikwo kutyo biri?

² Stefano na:ika ati, Bamura ba:su na barata, mutegeresye. Nyamuanga wa rikusyo abonekee saja Iburaimu, anu ariga:ri Mesopotamia, anu ariga atende kwikara Harani.

³ Namubwira ati, So:ka mu:si yanyu na mu ruganda rwanyu, ugende mu:si inu ndikweresya.

⁴ Mbe naso:ka mu:si ya Bakalidayo naja okwikara Harani. Ejire esemwene afwa, namuso:syayo, namure:ta mu:si inu mwikaemo emwe woryanu.

⁵ Nawe atamuyae busi munu, nakabee awo kutaja ecigere, namuraga omurago gwo kumuyana okuitunga, omwene no rwiburo rwae ariba be:ya, namubwira ao acariga kuba na mwana.

⁶ Nyamuanga na:ika ati, Orwiburo rwao bariba bagenyi mu:si ya bandi. Baribakora bagaya, baribakorera kubi:bi myaka magana gana.

⁷ Na riyanga rinu riribakora bagaya, anye ndiriramura, Nikwo kutyo Nyamuanga a:ikire. Ariba be:ya nibaso:kayo nibandamisya anu.

⁸ Namuyana oburagane bwo rutendo. Mbe Iburaimu ne:bura Isaka, namutendera ku rusiku rwa kata:nu na kasatu. Isaka ne:bura Yakobo. Yakobo ne:bura basaja abakuru ekumi na babiri.

⁹ Basaja abakuru nibafuira Yusufu, nibamugusya nasirwa Misiri. Nawe Nyamuanga naba aamwi nage.

¹⁰ Namukisya mu nyako jae jo:ne, namuyana obuganji no bwenge imbere ya Farao omukama wa Misiri. Omwene namukora mutungi wa Misiri no wa inyumba yo:ne.

¹¹ Mbe, injara ni:bao ku:si yo:ne ya Misiri ne ya Kanani, na jinyako nijibao nyafu. Basaja nibaburwa ebiryo.

¹² Nawe Yakobo ejiro:ngwa ati, ebiryo biri Misiri, natuma basaja orwo kwamba.

¹³ No rwa kabiri Yusufu ne:bu:ra ku bamura babo, oruganda rwa Yusufu ndumenyeka ku Farao.

¹⁴ Yusufu natuma aba:nu, nabirikira Yakobo esemwene na bo ruganda rwabo bo:ne, nibaba ba:nu makumi gata:nu na gabiri na ba:nu bata:nu.

¹⁵ Yakobo natebera okuja Misiri, nafwa omwene na basaja,

¹⁶ Nibasirwa Sekemu, nibasi:kwa mu:fwa inu Iburaimu agurire ku ba:na ba Emori mu Sekemu, nagura na jimpirya.

¹⁷ Nawe jejire jafugera jisiku jo murago gunu Nyamuanga amuragire Iburaimu, mbe aba:nu nibeyongesya nibatarara mu Misiri,

¹⁸ Ndijei ne:muka mukama undi mu Misiri unu ariga atamenyere Yusufu.

¹⁹ Oyo nakorera amenge riyanga ryeswe, nakora basaja kubi:bi, naragirira okube:sa aba:na bebwe abarera, korereki basige kurartta.

²⁰ Mu siku ijo Musa ne:burwa, akondee Nyamuanga, narerwa mwanya gwa me:si gasatu mu nyumba Yesemwene.

²¹ Ejire e:swa omuyasya wa Farao namuboja namurera abe mwana wae.

²² Mbe Musa ne:igisibwa mu bwenge bwone bwa Misiri, naba wa managa mu misango na mu bikorwa.

²³ Ejire e:ya myaka makumi gana neganirisya mu mutima gwae okujo:kurora bairi bae nibo aba:na ba Israeli.

²⁴ Ejire arora omu:nu umwi nakorwa kubi:bi, namujunira, namusubisya orusima omu:nu oyo akoreywe kubi:bi namwita Omumisiri.

²⁵ Ne:togera ati, abairi bae abajo:kusombokerwa ati, Nyamuanga kajo:kubayana omweruro mu maboko gae. Nawe batasombokeywe.

²⁶ Mwejo nasanga abandi nibarwana nasaka okubata:nya, na:ika ati, Bamura, emwe muri bamwi. ?Niki cinu omukora nimurwana emwe abene:ra?

²⁷ Nawe unu ariga nakorera kubi:bi owejabo, namuku:ra, na:ika ati, ?Niga unu akuteeo okuba mukuru no muramusi weswe?

²⁸ ?Si owendo:kunyita anye rwa kutyo wame:ta Omumisiri rigoro?

²⁹ Musa ejire ongwa omusango ogwo ne:ruka, naba mugenyi mu:si ya Midiani. Niyo e:buriye aba:na babiri be cirume.

³⁰ Mbe emyaka makumi gana wejire je:ya, maraika wa Ratabugenyi namusoromokera mu rubesi rwo muriro mu kasaka anu ariga:ri mwibara erya ku ci:ma ca Sinai.

³¹ Musa ejire arora, narugu:ra ebiroro ebyo, nawe ejire afugera arore, nongwa oburaka bwa Ratabugenyi,

³² Nibwaika ati, Nanye Nyamuanga wa basaja wanyu, Nyamuanga wa Iburaimu, na Nyamuanga wa Isaka, na Nyamuanga wa Yakobo. Musa nayarara, ata:ya:rire kurore:rera.

³³ Ratabugenyi namubwira ati, Fu:ra ebikwirya mu bigere byao, okuba anu wimereguyu ni si nyeru.

³⁴ Ni cimari narorere okunya:wibwa kwa ba:nu bani banu bari Misiri, ninungwa okwasibwa kwebwe, nini:ka nibaso:sye. Mbe wori enikutuma mu Misiri.

³⁵ Musa niwe oyo bariga baremere niba:ika ati, ?Niga unu akuteeo okuba mukuru no muramusi? Niwe unu Nyamuanga atumire abe mukuru no Mukisya mu kuboko kwa maraika unu amusoromokee mu kasaka.

³⁶ Oyo niwe nabaso:syayo, nakora ebirugu:ro ne bibarikisyo mu ca:ro ca Misiri, na mu Nyanja ya Syamu, na mwibara myaka makumi gana.

³⁷ Oyo niwe Musa unu ababwiriye aba:na ba Israeli ati, Nyamuanga aribe:meregususyu omuragi wo kususana nanye, Unu ariso:ka mu ba:na banyu. Murimungwa oyo.

³⁸ Oyo niwe ariga:ri mu kanisa ibara, aamwi na maraika oyo a:ikaga nage ku ci:ma ca Sinai. Ariga:ri aamwi na basaja. Oyo niwe ayabirwe emisango jo buanga jo kuciyana eswe.

³⁹ Oyo basaja baremere okumungwa, nawe nibamuku:ra, nibasuba Misiri mu mitima jebwe.

⁴⁰ Nibabwira Aroni ati, Nucikorere bamungu bo kucitangatira, okuba Musa oyo, unu aciso:sisye mu ca:ro ca Misiri, citakumenya kutyo a:ma:ba.

⁴¹ Nibakora ecinyara mu siku ijo, nibagabira ecisusano eco, nibakondererwa emirimu ja maboko gebwe.

⁴² Nawe Nyamuanga ne:garura, nabasindika okuramya ecise ca mu rwire, rwa kutyo byandikirwe mu citabo ca baragi ati, ?Angu, emwe aba inyumba ya Israeli, Mwanso:sisyaga anye ebitunganwa ebyo kwitwa ne byogo myaka makumi gana mwibara?

⁴³ Mwagegere riyema rya Moroki, na injota ya mungu wemwe Refani, Nimukoreraga ebisusano ebyo no kubiramyaga. Anye ndibakwengesya nimbambusya Baburoni.

⁴⁴ Na riyema ryo rusingiro ryariga na basaja mwibara, rwa kutyo baragiriywe na unu abwiriye Musa ati, Urikore ririŋene no rususo runu warorere.

⁴⁵ Ndyeryo basaja basigiranaga, nibarire:ta aamwi na Yosua anu bagwatire obutunge bwa ba:maanga banu Nyamuanga airisyaga imbere basaja, kukinga mu siku ja Daudi.

⁴⁶ Niwe Daudi unu abwene obuganji imbere ya Nyamuanga, nasabwa okumubonera awo kwikara Nyamuanga wa Yakobo.

⁴⁷ Nawe Sulemani namumbakira inyumba.

⁴⁸ Nawe Unu ari Inguru atakwikara mu nyumba jinu jombakire na maboko, rwo muragi kutyo ka:ika, ati,

⁴⁹ Orwire nico ecitebe cani ca iŋoma, ne ca:ro niwo awo kuta ebigere byani. ?Ni nyumba ki inu murinyumbakira? ka:ika Ratabugenyi. ?Amwi naaki anu ndisisya omwoyo?

⁵⁰ ?Tari okuboko kwani kunu kwakorere binu byone?

⁵¹ Emwe ba:nu be bica bikome:e, banu mutatenderwe mu mitima na mu matwi, omuingirira Omwoyo Mweru. Rwa kutyo basaja wanyu bakoraga, nemwe one nikwo kutyo omukora.

⁵² ?Ni muragi wuya unu basaja wanyu bata:nyasisye? Mbe be:tire banu bambire okwaika ebyo ku:ja kwo Murengeresi, unu emwe wori Mwaromee iniku no kumwita.

⁵³ Nemwe banu mwayabirwe ebiragiro, rwa kutyo byaragiriywe na bamaraika, na ka mutabigwatire.

Okwitwa kwa Stefano

⁵⁴ Mbe wejire bongwa ebyo, nibarumwa muno mu mitima jebwe, nibamuramira ebyasa.

⁵⁵ Nawe omwene ariga e:juye Omwoyo Mweru, narore:rera nekeneke mu rwire, narora rikusyo rya Nyamuanga, na Yesu emereguyu ku kuboko kwe buryo kwa Nyamuanga.

⁵⁶ Na:ika ati, Enirora orwire rwigukire, no Mwana wo mu:nu emereguyu ku kuboko kwe buryo kwa Nyamuanga.

⁵⁷ Nibamwaya na buraka bunene, nibasiba amatwi gebwe, nibamworomokera na mutima gumwi.

⁵⁸ Nibamuku:rira ku mwira yo musi, nibamubumira amabui. Na banu baroraga nibata emyenda jebwe ku maguru go mumura umwi risi:na ryae Saulo.

⁵⁹ Nibabumira Stefano amabui, omwene nasabwa, na:ika ati, Ratabugenyi Yesu, ramira Omwoyo gwani.

⁶⁰ Nafukama naragirisya na buraka bunene ati, Ratabugenyi, utaja:babarira ecikayo cinu. Wejire amara okwaika ebyo, naongera. Na Saulo one ariga e:kirisisye okwitwa kwae.