Ebikorwa 5 - INDAGANO INYA:YA

Orurimi rwa Anania na Safira

¹ Nawe omu:nu risi:na ryae Anania, agusisye risambu, aamwi no mugasi wae Safira,

² Nabisako ejindi ku jinu jaso:keremo, omugasi wae ariga amenyere, nare:tako ejindi era, najitu:ra mu maguru ga jintumwa.

³ Nawe Petero na:ika ati, Anania, ?Syetani e:jusisyaki omutima gwao okubebeya Omwoyo Mweru, nubisako ku jinu ja:ma:so:kamo mwisambu?

⁴ ?Anu ryariga ritende:gurwa, ryariga ritari ryao? ?Ka:nu ryaka:nirwe ritabee mu managa gao? ?Niki cinu warwajira mu mutima gwao okukora kutya ?Utabebeya ba:nu tari wabebeya Nyamuanga.

⁵ Anania ejire ongwa emisango ejo, nagwa nafwa. Obu:ba bwafu nibubagwata banu bonguywe ebyo.

⁶ Abamura nibe:muka nibamusinga mu ngubo, nibamuurusya anja nibamusi:ka.

⁷ Mbe wejire jaturao saa esatu, omugasi wae nengira atamenyere binu byagwao.

⁸ Petero namubu:sya ati, Nuumbwire, ?mwaka:niremo risambu, nibyo binu byone? Na:ika ati, Yee nibyebyo.

⁹ Mbe Petero namubu:sya ati, ?Mwamaragana atiki okusaka Mwoyo wa Ratabugenyi? Rora, amaguru gebwe banu basi:ka omurume wao gari ku rwigi, abajo:kukugega na:we one.

¹⁰ Aonao nagwa mu maguru gae nafwa. Wejire abamura bengira nibamusanga afu:ye nibamugega nibamuurusya anja nibamusi:ka aamwi no murume wae.

¹¹ Obuba nibubagwata aba mu kanisa bo:ne, na bo:ne banu bonguywe ebyo.

Obuinga bwa ikanisa inyeru

¹² Ebibarikisyo ne birugu:ro byafu nibikorwaga mu ba:nu na maboko ga jintumwa. Bo:ne bariga aamwi mu cisunya ca Sulemani na mwoyo gumwi.

¹³ Nawe mu bandi, ariga atario mu:nu wa kuya:ra kugwatana nabo. Nawe aba:nu nibabaku:ya.

¹⁴ Nawe banu be:kirisisye nibeyongesya oku:ja ku Ratabugenyi, ba:fu abarume na bagasi.

¹⁵ Ndijei nibare:taga abarwae ku njira, nibabataga ku bise:ro na ku mariri, araba Petero aka:ja, rirengesi ryae ribaswikire abandi.

¹⁶ Ke bise nibiso:ka mu misi jinu jisingiye Yerusalemi, nibe:kofyanya nibare:ta abarwae, na banu banya:sibwaga emisambwa emijabi. Mbaosibwa bo:ne.

Okunya:sibwa kwa kabiri

¹⁷ Mbe ne:muka omugabisi Omukuru aamwi na banu bo:ne bariga nage, nibo banu be:kirisisye ebya Basadukayo, nibajira rifuwa ryafu.

¹⁸ Nibagwata jintumwa, nibabatura mu nyumba yo buboywa.

¹⁹ Nawe maraika wa Ratabugenyi ne:gura jinjigi ja inyumba yo buboywa, nabaurusya, na:ika ati,

²⁰ Mugende, mwimereguru mu yekaru, mubabwire aba:nu emisango jo:ne ejo buanga bunu.

²¹ Bejire bongwa binu, nibengira mu yekaru mu ruguru, nibe:igisya. Nawe omugabisi Omukuru na:ja aamwi na banu bariga nage, nibababirikira abe ci:na na bakaruka bo:ne aba Ba:na ba Israeli, nibatuma aba:nu ku nyumba yo buboywa, korereki babare:te.

²² Nawe abarugaruga bejire bakinga batabasangiremo mu nyumba yo buboywa, nibasuba niba:ika ati,

²³ Inyumba yo buboywa casanga i:gaywe kisikisi, na bari:si bemereguyu ku muryango. Nawe cajo:kwigurao, citasangamo mu:nu.

²⁴ Bejire bongwa emisango ejo, Omukuru wa mu yekaru na bagabisi abakuru nibabe:tima:tira ati, Binu jebibe kutiki?

²⁵ Na:ja omu:nu nababwira ati, Aba:nu banu mwamatu:ra mu nyumba yo buboywa, mbe rora, bemereguyu mu yekaru abe:igisya aba:nu.

²⁶ Mbe Omukuru na barugaruga nibagenda, nibabaji:ra nawe batakorere managa, okuba bariga nibo:baya aba:nu, bataja kubarasira na mabui.

²⁷ Bejire babare:ta nibabatura mu ci:na. Omugabisi Omukuru nababu:sya,

²⁸ Na:ika ati, ?Angu citabaganyisye ati, musige kwiigisya mwisi:na eryo? Mbe mwejusisye Yerusalemi okwiigisya kwemwe, omwenda okure:ta amanyinga go mu:nu uyo kwiswe.

Risubyo rya jintumwa mu ci:na

²⁹ Nawe Petero na jintumwa nibaindura niba:ika ati, Kuci:ire okungwa Nyamuanga kukira ba:nu.

³⁰ Nyamuanga wa basaja asu:ruye Yesu, unu emwe mwasungire kwiti no kumwita.

³¹ Oyo Nyamuanga amuku:isisye ku kuboko kwae okwe buryo, abe Mukuru no Mukisya, ayane Israeli okuta no kwiswaririrwa kwe bibi:bi.

³² Eswe neswe abo kwimako ku misango jinu aamwi no Mwoyo Mweru unu Nyamuanga abayae banu abamungwa.

³³ Nawe abene bejire bongwa, nibarumwa muno mu mitima jebwe, nibaroma eci:na co kube:ta.

Obwenge bwa Gamalieli

³⁴ Nawe omu:nu nemereguru mu ci:na, niwe Omufarisayo risi:na ryae Gamalieli, omwiigisya we biragiro we cibaro mu ba:nu bo:ne, naragirira okuurusya jintumwa anja mwanya muto:to.

³⁵ Nababwira ati, Emwe abamura ba Israeli, mwikenge mwijo omwenda okubakorera aba:nu banu.

³⁶ Okuba mu siku ja karao, e:mukire Teuda unu e:ku:isye ati, nanye Omukuru. Na ba:nu abo bamuru:baga be:ire uti magana gana. Oyo ejire e:twa, bo:ne abo be:kirisisye byae nibanyaragana, nibawao.

³⁷ Ejire afwa oyo, ne:mukao Yuda Omugalilaya, mu siku jo kwandikwa rigoti, nakongya ba:nu ba:fu nibamuru:ba. Oyo one nasimagira, nabo be:kirisisye byae nibanyaragana.

³⁸ Mbe woryanu enibabwira emwe ati, Mwaukane na aba:nu banu mubasige. Okuba omusango gunu amwi omurimu gunu araba guso:kere mu ba:nu gurifwa.

³⁹ Nawe araba guso:kere ku Nyamuanga mutakutura kugwita, mwasiga kuba uti omurwana na Nyamuanga.

Okubumwa no kukonderwa kwa jintumwa

⁴⁰ Nibamungwa. Nibabirikira jintumwa nibababuma nibabaraganya bata:ikaga mwisi:na rya Yesu, nibabata:tira.

⁴¹ Mbe nibaso:ka imbere ye ci:na, bakondeywe okuba babarirwe ati be:ire okuswasibwaga kubwa Risi:na rya Yesu.

⁴² Mbe bato:saga okwiigisya kusiku:siku mu yekaru na mu misi no kusimura ati Yesu niwe Kristo.