Ebikorwa 4 - INDAGANO INYA:YA

Okuriya:sibwa kwo kwamba

¹ Anu bariga baca:ika na ba:nu, mbe abagabisi nibabe:jira aamwi no mukuru wa mu yekaru, na Basadukayo,

² Babiiywe muno okuba be:igisyaga aba:nu no kubasimurira ebyo kusu:ruka mu bafu:ye kutyo Yesu asu:rukire.

³ Nibabagwata nibabatura mwiboyero kukinga mwejo katondo, okuba kwariga kwabee kegoro.

⁴ Nawe ba:fu mu banu bonguywe omusango nibe:kirisya. Obukumi bwa bamura nibwiya uti bisira bita:nu.

⁵ Mbe wejire bwaca katondo, abakuru bebwe na bakaruka na bandiki nibekofyanyisya mu Yerusalemi,

⁶ Aamwi na Anasi omugabisi Omukuru, na Kafaya, na Yoana, na Alekisanda, na bo:ne abo ruganda rwo mugabisi Omukuru.

⁷ Nibabata aagati, nibababu:sya ati, ?Emwe mwamakora ebyo mu managa ki, na mwisi:na ryaga?

Okusimura kwa Petero mu ci:na

⁸ Mbe Petero e:juye Mwoyo Mweru, nababwira ati, Emwe abakuru ba ba:nu na bakaruka ba Israeli,

⁹ Cikabu:sirisibwa rero ku cikorwa ce kisi cinu camamukorera omurema, cinu camamuosya,

¹⁰ Mumenye emwe bo:ne aamwi na ba:nu bo:ne ba Israeli ati, mwisi:na rya Yesu Kristo wende Najareti, unu emwe mwamubambire ku musaraba, Oyo Nyamuanga amusu:ruye mu bafu:ye, kubwoyo omu:nu unu e:mereguyu imbere yemwe akobere.

¹¹ Omwene niwe ribui rinu ryagairwe nemwe abombasi, niryo ryabee ekuru erya ku sonde.

¹² Mbe, omweruro gutario mu undi, okuba ritario esi:na rindi emwaro yo rwire, rinu bayabirwe aba:nu, rinu eritura okucikisya.

¹³ Mbe bejire barora obuba:si bwa Petero na Yoana, ka nibamenya ati, ni ba:nu banu bate:igisi:bwe muno, ka batana bwenge, nibarugu:ra, nibabe:te:ge:resya ati bariga aamwi na Yesu.

¹⁴ Ka bejire barora omu:nu unu aosibwe e:mereguyu aamwi nabo batabwene gwa kuroma.

¹⁵ Nawe wejire babaragirira baso:ke mu cirwaji, niba:ikana abene:ra, niba:ika ati,

¹⁶ ?Jecibakore kutiki aba:nu banu? Okuba aba:nu bo:ne banu be:kae mu Yerusalemi bamenyere kisi kisi ati, ecibarikisyo ecikumu:ke cakorerwe nabo cimari, neswe citakutura kuci:ga:na.

¹⁷ Nawe omusango gunu cikorereki gusigega kukumu:ka mu ba:nu, cibakange basigega kwaika mwisi:na eryo ku mu:nu wo:ne.

¹⁸ Nibababirikira, nibabakomeresya basigega kata okwaika nakabee kuri kwiigisya mwisi:na rya Yesu.

¹⁹ Nawe Petero na Yoana nibaindura niba:ika ati, Araba ni kwa kisi imbere ya Nyamuanga okungwa emwe kukira Nyamuanga, muramure emwe abene.

²⁰ Okuba eswe citakutura kusiga kwaika binu carorere no kungwa.

²¹ Mbe nibongesya okubakanga, nibabata:tira, batabwene ca kubendera kurwa ba:nu, okuba bo:ne bariga nibakusya Nyamuanga kwibyo byabeeo.

²² Okuba omu:nu uyo akoreywe ecibarikisyo co kuosibwa, ariga asa:gi:sye myaka makumi gana mu burame bwae.

Abe:kirisya nibasabwa

²³ Bejire bata:tirwa, nibagenda ku be:ja:bo, niba:ika byone binu babwiriywe na bagabisi abakuru na bakaruka.

²⁴ Abo bejire bongwa, niba:nikirisya no buraka bwebwe ku Nyamuanga na mwoyo gumwi, niba:ika ati, Awe Ryami, na:we Nyamuanga unu wakorere orwire na i:si, na inyanja, na byone binu birimo,

²⁵ Unu waikiye mu Mwoyo Mweru mu kanwa ka saja Daudi omukosi wao ati, ?Kubaki amaanga agayomba Na jiŋanda ja ba:nu abe:ganirisya omusango gwa kutyo era?

²⁶ Abakama ba i:si abe:tonda Na batungi abarwaja ebi:na Ku Ratabugenyi na ku Kristo wae.

²⁷ Okuba ni cimari, Erode na Pontio Pilato, aamwi na ba:maanga, na imbaga ya Israeli, be:kofyanyisisye okumurwana Omwana wao omweru, niwe Yesu unu we:tiriye amafuta.

²⁸ Nibakora byone binu awe waragiriye kara no kuboko kwao mu kurwaja kwao.

²⁹ Mbe woryanu, Ratabugenyi, nurore okukanga kwebwe, ubayane abagaya bao okwaika emisango jao no buba:si.

³⁰ Ugorore okuboko kwao okuosya, no kukora ebibarikisyo ne birugu:ro mwisi:na ryo Mukosi wao mweru niwe Yesu.

Abe:kirisya nibasasya ebi:nu byebwe

³¹ Bejire bamara okusabwa, anu bariga be:kofyanyisisye na:tikima. Bo:ne nibe:jura Omwoyo Mweru, niba:ika omusango gwa Nyamuanga no buba:si.

³² Ne cise ca banu be:kirisisye bariga na mwoyo gumwi no mutima gumwi, amwi atabeeo mu:nu unu a:ikaga ati ebi:nu binu anabyo ni byae enyere, nawe bariga basangiye bi:nu byone.

³³ Na jintumwa ba:ikaga na managa ma:fu ebyo kusu:ka kwa Ratabugenyi Yesu. Ecigongo ca:fu niciba kwabo bo:ne.

³⁴ Okuba atabeeo mu bene mu:nu unu akenaga, okuba bo:ne banu bariga bana masambu amwi nyumba, nibajika:namo, nibare:ta obugusi bwabyo binu byaka:nwagamo.

³⁵ Nibabitu:ra mu maguru ga jintumwa, nibagabiraga bo:ne rwa kutyo mu:nu wo:ne ariga akenere.

³⁶ Na Yusufu unu jintumwa jatogere Barinaba, obugajuro bwaryo ati, Omwana wo kusi:ri:sya, niwe Omurawi, unu e:buriywe Kupuro,

³⁷ Omwene ariga ana risambu, narigusya nare:ta jimpirya, najitu:ra mu maguru ga jintumwa.