Ebikorwa 3 - INDAGANO INYA:YA

Petero na Yoana nibaosya omurema

¹ Mbe Petero na Yoana nibarinyagisya mu yekaru mu saa yo kusabwa, niyo saa eta:nu ne:na.

² Ariga:rio omu:nu aremaae kuso:kerera munda ya nyiramwene, oyo agegwaga na ba:nu, nibamuta kusiku ku muryango gwa iyekaru, gunu gwatogwaga Omukonde, korereki asabwega ebiyanwa ku banu bengiraga mu yekaru.

³ Oyo wejire arora Petero na Yoana nibajo:kwingira mu yekaru, nasabwa ayabwe biyanwa.

⁴ Petero namurore:rera nekeneke aamwi na Yoana, na:ika ati, Nucirore:rere.

⁵ Omwene nabarora, ategeree ati abajo:kumuyana eci:nu.

⁶ Nawe Petero na:ika ati, Jimpirya na jijaabu ntanajo, nawe cinu ninaco nico ndakuyana. Mwisi:na rya Yesu wende Najareti, imuka uribate.

⁷ Namugwata ku kuboko kwe buryo, namwimusya. Aonao ebigere byae ne bisugunyu byae nibijira amanaga.

⁸ Ne:muka bwangwe nemereguru, naribata. Nengira aamwi nabo mu yekaru naribata, ne:jungajunga, naku:ya Nyamuanga.

⁹ Aba:nu bo:ne nibamurora naribata naku:ya Nyamuanga,

¹⁰ Nibamumenya ati, niwe enyanjaga ku muryango Omukonde ogwa iyekaru, nasabwaga ebiyanwa, nibataŋaŋara muno no kurugu:ra binu byamubwene.

¹¹ Mbe ejire agwatirirana na Petero na Yoana, aba:nu bo:ne mbababirimira aamwi mu cisunya cinu ecitogwa eca Suremani, nibarugu:ra muno.

Okusimura kwa kabiri kwa Petero

¹² Petero ejire arora ejo, naindura aba:nu ati, Emwe bamura ba Israeli, ?niki cinu ecikora nimurugu:rira emisango jinu? ?Kubaki omucirore:rera nekeneke uti ni managa geswe amwi burengeresi bweswe nibwo bwakora omu:nu unu naribata?

¹³ Nyamuanga wa Iburaimu na Isaka na Yakobo, niwe Nyamuanga wa basaja, akusisye Omwana wae Yesu, oyo emwe mwagwatire, nimumwiga:na imbere ya Pilato, nakabee ariga atemere eci:na co kumuta:tira.

¹⁴ Nawe emwe mwega:nire Oyo Mweru no Murengeresi, nimwenda okusurumurirwa omwiti,

¹⁵ Nimumwita Omusimuka wo Buanga oyo Nyamuanga asu:ruye mu bafu:ye, neswe riri bo kwimako ebyo.

¹⁶ Na kurwo kwikirisya risi:na ryae, ka risi:na ryae ryamuyana amanaga omu:nu unu omurora no kumumenya. No kwikirisya kunu kuri ku Mwene nikwo kwamuyana omu:nu unu obuanga bunu buku:miye imbere yemwe bo:ne.

¹⁷ Mbe woryanu, ba:na ba:su, nimenyere ati, mwakorere ebyo mu butamenya, na bakuru bemwe one bakorere kutyo.

¹⁸ Nawe Nyamuanga a:ikire ebyo kara mu kanwa ka baragi bo:ne ati, Kristo wae arinya:sibwa. Mbe aku:misisye ebyo.

¹⁹ Mbe nimute mucu:ke, ebibi:bi byemwe korereki bisimibwe, amagoro go kufuŋama gaje okuso:ka imbere ya Ratabugenyi.

²⁰ Omwene atume Kristo Yesu oyo asimuywe kwimwe kara,

²¹ Oyo e:ire aramirwe mu rwire kukinga gaje amagoro go kukorwa byone bibe biya:ya, binu Nyamuanga a:ikiriraga mu kanwa ka baragi bae abe:ru kuso:kerera ku bwambiro.

²² Okuba Musa a:ikire ati, Ratabugenyi Nyamuanga wemwe aribe:namusisya omuragi wo kususana nanye, Unu ariso:ka mu ba:na banyu Oyo murimungwaga mu byone binu aribabwira.

²³ Mbe, mu:nu wo:ne unu atarimungwa omuragi oyo, arisimagisibwa no kwaurwa mu ba:nu bae.

²⁴ Mbe na baragi bo:ne okwambira ku Samweli na banu basingiye inyuma yae, bo:ne banu ba:ikire, baragire ebya jisiku jinu.

²⁵ Emwe muri ba:na ba baragi, na bo buragane bunu Nyamuanga aragene na basaja wanyu, nabwira Iburaimu ati, Jiŋanda jo:ne ja mu ca:ro jiriyanirwa ribando mu rwiburo rwao.

²⁶ Nyamuanga ejire amara okusu:rura Omwana wae Yesu, namba okumutuma kwimwe, abayane ribando, acu:sye buri mu:nu mu bibi:bi byae.