Ebikorwa 26 - INDAGANO INYA:YA

Paulo imbere ya Agiripa

¹ Agiripa nabwira Paulo ati, We:kirisibwa obwaika ebyao. Mbe niwo Paulo nagorora okuboko na:ika ebyae ati,

² Awe omukama Agiripa, enikonderwa okuroma ebyani imbere yao rero ku bigambo binu byone Abayaudi abambu:ra.

³ Enikonderwa muno okuba awe umenyere jintungwa na jimamba jo:ne jinu jiri mu Bayaudi. Kwenikora ninkuremberesya, wigumirisye okuntegeresya.

⁴ Mbe Abayaudi bo:ne bamenyere jintungwa jani kuso:ka mu buto:to bwani, kutyo nambire okukoraga mu Yerusalemi mwiyanga ryasu.

⁵ Banu bakenda okwaika, bamenyere kuso:ka kara ati, nariga ndi Mufarisayo kurwo kuru:ba oruba:ra orukomee koco koco orwa idini yeswe.

⁶ Woryanu nimereguyu okuramurwa kurwo kwiikanya kunu Nyamuanga aragire ku basaja.

⁷ Nikwo okwiikanya kunu jiŋanda jeswe ekumi ne:biri abe:ikanyaga okukingako, nibakome:raga okukorera Nyamuanga mu mwisi na mu ngeta. Mbe kurwo kwiikanya okwo Abayaudi nikwo abambu:ra. Nikwo kutyo, omukama.

⁸ ?Niki cinu ecikora nimwiganirisya ati, ni cigambo cinu citakwikirisibwa Nyamuanga okusu:rura bafu:ye?

⁹ Ni cimari anye omwene ne:ganirisyaga ati, kunyiire okukoraga emisango myafu jinu ejiyajana na risi:na rya Yesu Munajareti,

¹⁰ Ninkoraga kutyo mu Yerusalemi, nimboyaga abe:ru ba:fu mwiboyero okuba nariga nayabirwe amanaga ku bagabisi abakuru. Ka anu be:tirwe, anye nini:kirisya ati be:twe.

¹¹ Ka nimbatongeraga kwiya ka:fu mu mekofyanyisyo go:ne, nimbasinyirisyaga okufuma. Nimbabiirirwa muno muno, nimbanyasyaga nindobosya mu misi je bugenyi.

¹² Mbe anu nariga nicakora ebyo, ningenda Damasiko, ndina managa ne bira:giro binu byaso:kere ku bagabisi abakuru.

¹³ Mbe omukama, nariga mu njira mwiyangwe, nindora obweru bunu bwaso:kere mu rwire bukirire okuse:ka:na kwa risu:ba, niburabangirya nibusingira anye na banu bariga mbaribata nanye.

¹⁴ Nicigwa a:si bo:ne, ninungwa oburaka nibwaika nanye mu nyaika ye Cieburania ati, Saulo, Saulo? niki cinu oukora nunya:sya anye? Ni kukomee awe okubara omugere ku migera.

¹⁵ Anye nina:ika ati, ?Na:we:ga, Ratabugenyi? Ratabugenyi na:ika ati, Nanye Yesu unu awe ou:nya:sya.

¹⁶ Nawe imuka wimereguru, okuba nikwo nakora ninkusoromokera korereki nikwaure ubega mukosi no wo kwimako ku binu warora, na kwibyo ndakusoromokeragamo.

¹⁷ Ndakukisyaga mu ba:nu na mu bamaanga, eyo ndakutumaga.

¹⁸ Korereki wigure ame:so gebwe, baso:ke mu cisu:te baindukire obweru, baso:ke mu managa ga Syetani baindukire Nyamuanga, korereki bayabwe okwiswaririrwa ebibi:bi no mwandu mu banu be:sibwe kurwo kunyikirisya anye.

¹⁹ Mbe omukama Agiripa, nitaremere kworobera ebiroro binu byaso:kere mu rwire.

²⁰ Nawe nambiye ku bende Damasiko, nimbasimurira na ba mu Yerusalemi, ne ca:ro co:ne eca Buyaudi, nindobosya ku bamaanga, ati, bate baindukire Nyamuanga, bakorega ebikorwa binu bi:ire okuta.

²¹ Kwobakorere Abayaudi nibangwata mu yekaru, nibenda okunyita.

²² Mbe okuba nasakirwaga na Nyamuanga na kukinga rero rinu, kwenikora nini:mereguru nimbabwira abato:to na bakuru, nitakwaika musango gundi, tari jinu abaragi na Musa baragire kutyo jiriba.

²³ Ati kumwiire Kristo okunya:sibwa, no kutangata okusu:ka mu bafu:ye korereki e:resye aba:nu na bamaanga obweru.

²⁴ Anu ariga aca:ika kutyo mbe Fesito na:ika na buraka bunene ati, Paulo, si wasara. Okusoma kwafu kwakusasi:sye.

²⁵ Nawe Paulo na:ika ati, Nitasarire, awe Fesito owe cibaro, nawe enaika ebye cimari nebyo bwenge buku:miye.

²⁶ Okuba omukama unu enaikira imbere yae no buba:si, niwe amenyere emisango jinu, okuba nimenyere ati, emisango ejo jitabisirwe ku mwene na gumwi, okuba ebyo bitakoreywe ku mbari.

²⁷ Mbe omukama Agiripa, ?Owikirisya abaragi? Nimenyere ati owikirisya.

²⁸ Agiripa nabwira Paulo ati, Mu bigambo bito:to owenda okunkora Mukristo.

²⁹ Paulo na:ika ati, Enisabwa Nyamuanga ati, mu bito:to amwi mu byafu, tari awe era, nawe na bo:ne banu abanyungwa rero babe rwanye, tari okuboywa kunu.

³⁰ Ejire amara okwaika ebyo, omukama ne:muka aamwi no musi:ba na Bereniki na banu bariga benyanjire aamwi nabo.

³¹ Wejire be:yaura, niba:ikana abene:ra, niba:ika ati, Omu:nu unu atakorere cinu ci:ire okumwita nakabee kuri kumuboya.

³² Agiripa nabwira Fesito ati, Omu:nu unu ari e:ire okusurumurwa, aja atendere okuramurwa na Kaisari.