Ebikorwa 24 - INDAGANO INYA:YA

Paulo mu ci:na ca Feliki

¹ Wejire jaturao siku ita:nu, omugabisi Omukuru Anania natebera aamwi na bakaruka abandi no mwaiki risi:na ryae Teritulo. Abo nibe:resya omusi:ba ebyo abamubu:ra Paulo.

² Teritulo wejire abirikirwa, namba okumubuma, na:ika ati, Awe Feliki owe cibaro, eswe ecibona omurembe muno kwawe, ka binu byabiyaga mwiyanga ryeswe wabikoraga kisi kurwo kurinda kwao.

³ Kwecikora nicikonderwa wo:ne wo:ne no kusi:ma kwafu kusiku.

⁴ Nawe nitakwenda kukunya:sya muno, enikuremberesya ucungwe kurwo bwira bwao.

⁵ Okuba cabwene omu:nu unu ni murangirangi, kasokanya mu Bayaudi bo:ne aba mu ca:ro co:ne, ka ni mutangasya mukuru wa banu abatogwa Abanajareti.

⁶ Aregejere okujabiasya iyekaru, nicimugwata, [nicenda okumuramura rwe biragiro byeswe kutyo biri.

⁷ Nawe Lusia Omukuru wa basirikare na:ja namuso:sya mu maboko geswe na managa ma:fu.

⁸ Naragirira banu abamubu:ra baje kwawe.] Awe omwene ukamubu:siri-sya, outura okumenya binu byone ecimubu:ra eswe.

⁹ Na Bayaudi one nibamubu:ra, niba:ika ati, nikwo kutyo biri.

Okuroma kwa Paulo imbere ya Feliki

¹⁰ Mbe omusi:ba ejire amusomeresya no kuboko ati a:ike, Paulo naindura ati, Eniroma kwawe no mwoyo gusi:ri:kire, okuba nimenyere ati, uri muramusi wa rianga rinu myaka myafu,

¹¹ Outura okumenya ati, jicari kuturao siku ikumi ne:biri kuso:ka anu narinyire Yerusalemi okuramya.

¹² Batansangire mu yekaru nimbambara na mu:nu amwi niyogya cise, nakabee ari mu mekofyanyisyo, nakabee ari mu musi.

¹³ Amwi batakutura kukomeresya binu abambu:ra woryanu.

¹⁴ Nawe eni:gamba kwawe ati, Enikorera Nyamuanga wa basaja mu Njira inu abatoga ya be:kotya, nini:kirisya byone binu byandikirwe mu bira:giro na mu baragi.

¹⁵ Ndi no kwiikanya ku Nyamuanga, rwa bene one kutyo abe:ikanya, ati, kuribao okusu:ka kwa barenge:resi na banu batari barenge:resi.

¹⁶ Eni:kome:sya mwibyo nibega no mutima gunu gutariko esoro imbere ya Nyamuanga na ba:nu siku jo:ne.

¹⁷ Mbe emyaka wejire jaturao myafu, nini:ja okure:tera aba rianga ryasu ebiyanwa ne byo kuso:sya.

¹⁸ Anu nariga nicakora ebyo, Abayaudi abandi banu baso:kere Asia nibansanga ne:si:bwe mu yekaru, nitari na cise nakabee iri njogere.

¹⁹ Abo be:ire okubao anu bambu:re araba bari ne cigambo kwanye.

²⁰ Amwi aba:nu banu ba:ike abene ecikayo cinu babwene runu anye ne:mereguyu mu cirwaji,

²¹ Tari kurwo buraka bunu na:ikiriye inguru nibe:mereguyumo ati, Kurwo kusu:ka kwa bafu:ye nikwo omundamura rero rinu.

²² Nawe Feliki nabako:syao okuba ariga amenyere kisikisi ebya Injira eyo, na:ika ati, Ariba atebera Lusia Omukuru wa basirikare, niwo ndibutura eci:na cemwe.

²³ Naragirira Omukuru wa basirikare egana amurinde, no kumuyana omwanya, asige kuingirira abasa:ni bae okumufurubendera amwi kumu:jako.

Feliki kutyo atemere okwikirisya

²⁴ Nawe jisiku jejire jaturao, Feliki na:ja no mugasi wae Durusila, unu ariga:ri Muyaudigasi, nabirikira Paulo, namutegeresya ebyo kwikirisya Yesu Kristo.

²⁵ Wejire amutondera ebyo burengeresi, nebyo kwibaririra nebya intambara inu eyendo:ku:ja, mbe Feliki no:baya, naindura ati, Wori nugende. Ariba nabona omwanya ndikubirikira.

²⁶ Ariga e:ikanyisye Paulo amuyane jimpirya. Kwakorere namubirikiraga kwiya ka:fu ba:ikane nage.

²⁷ Nawe jejire jawa myaka ebiri, Porikio Fesito na:ja mu cibaro ca Feliki. Mbe Feliki nasiga Paulo aboyerwe, okuba ariga endere Abayaudi bamusi:me.