Ebikorwa 21 - INDAGANO INYA:YA

Orugendo rwa Paulo okuja Yerusalemi

¹ Mbe wejire caragana nabo, niciema amatanga, nicikinga Ko:si na mwijo gumwi era, mwejo nicikinga Rodo. Okuso:ke:yo nicija Patata.

² Wejire cabona ingaraba yo kugenda Foniki, nicisyabaramo nicigenda.

³ Wejire carora Kupuro, niciisiga orubara rwe bumosi, nicigenda Syamu, nicigoba Turo, okuba niyo ingaraba yariga yendere okusyorera ebi:nu.

⁴ Wejire cabonayo abe:igisibwa nicimarayo siku ita:nu ne:biri. Abo nibamubwira Paulo mu Mwoyo ati asige kurinya Yerusalemi.

⁵ Mbe wejire camara jisiku ijo, nici:muka nicigenda. Bo:ne nibaciyeregesya na bagasi na ba:na nibacikingya ku mwira gwo musi, nicifukama ku mwaro nicisabwa niciragana.

⁶ Nicisyabara mu ngaraba, abene nibasuba ika.

⁷ Neswe cejire camara orugendo rweswe okuso:ka Turo, nicikinga Potolema, nicikesya aba:su, nicimara nabo rusiku rumwi.

⁸ Mwejo nici:muka nicikinga Kaisaria, nicingira mu nyumba ya Filipo, omusimusi wa Ebyobwana, niwe oumwi ku bariya abata:nu na babiri, niciba ewae.

⁹ Oyo ariga na bayasya bana bayarajuma, banu bariga mbaraga.

¹⁰ Wejire cako:rayo siku nyafu, omuragi risi:na ryae Agabo natebera okuso:ka Buyaudi,

¹¹ Ejire acikingako, nagega rikebete rya Paulo, ne:boya amaguru gae na maboko gre, na:ika ati, Nikwo kutya Mwoyo Mweru ka:ika ati, Kutyo Abayaudi ba mu Yerusalemi barimuboya owa rikebete rinu, barimuta mu maboko ga bamaanga.

¹² Wejire congwa ebyo, eswe na ba:nu bendao, nicimuremberesya asige kurinya okuja Yerusalemi.

¹³ Mbe niwo Paulo naindura na:ika ati, ?Niki cinu omukora, nimurira no kunyita omutima? Okuba tari ati, nimaririye oku-boywa:ra, nawe nimaririye okufwira mu Yerusalemi one kurwa risi:na rya Ratabugenyi Yesu.

¹⁴ Wejire arema okungwa, nicijibira nica:ika ati, Binu Ratabugenyi kenda bikorwe.

¹⁵ Jisiku ejo jejire jawa, niciboyera, nicirinya okuja Yerusalemi.

¹⁶ Na be:igisibwa abandi aba Kaisaria nibagenda aamwi neswe, nibacisira ewa Munasoni wende Kupuro, omwiigisibwa wa kara, nicisikirira ewae.

Paulo mu Yerusalemi

¹⁷ Wejire cakinga mu Yerusalemi, aba:su nibaciramira no kukonderwa.

¹⁸ Mwejo Paulo nengira ewa Yakobo aamwi neswe, na bakaruka bo:ne bariga bario.

¹⁹ Ejire amara okubake:sya, nabatondera cimwi-cimwi binu Nyamuanga akoraga mu bamaanga mu mirimu jae.

²⁰ Abene bejire bongwa nibakusya Nyamuanga. Nibamubwira ati, Mwana wa:su, ourora kutya ni bisira byafu mu Bayaudi banu be:kirisisye, nabo bo:ne barina rifuwa ku bira:giro.

²¹ Abo barabwiriywe ebyao ati, awe owiigisya Abayaudi banu be:kae mu bamaanga, basige ebya Musa, nuwaika ati, basige no kutenda aba:na bebwe, nakabee kuri kuribatira mu ntungwa.

²² ?Kambe wori cinu ciire niki. Okuba ni cimari batakutasya kungwa ati wejire.

²³ Mbe nu:kore binu cirakubwira. Ciri na bamura bana banu be:boyere ne cirairo.

²⁴ Nu:bagege abo, wiyesye aamwi nabo, ubariire, bamwegwe emitwe jebwe, korereki bo:ne bamenye ati ebyo bakungwagako bitari bya cimari, nawe awe omwene oukoraga kisi no kugwata ebiragiro.

²⁵ Nawe ku ba:maanga banu be:kirisisye, candikire niciramura ati, be:rindega mu byogo binu abatambira ebisusano, ne camba, ne:byo kunyigwa, no buromesi.

²⁶ Mbe niwo Paulo nagega abamura abo. Mwejo wejire be:sibwa, nibengira mu yekaru, nibe:resya ati jisiku jo kwesibwa kwebwe ja:ka:ku:mire, niwo mbatambirwa buri mu:nu citambo cae.

Abayaudi mbaregeja okwita Paulo

²⁷ Mbe siku ita:nu ne:biri jejire jaja okwiya, Abayaudi banu baso:kere mu Asia, nibamusanga mu yekaru, nibasoeresya ecise co:ne, nibamugwata na maboko.

²⁸ Nibamwaisya inguru ati, Emwe bamura ba Israeli, nimucisakire. Unu niwe omu:nu unu ke:igisya aba:nu bo:ne wo:ne wo:ne, ke:igisya kubibi ku ba:nu na ku biragiro na ku nyumba inu. Ka rindi engisisye Abagiriki mu yekaru, najabiasya orubara orweru.

²⁹ Okuba bariga ba:bwene Tirofimo Omuefeso ari nage mu musi, nibe:togera ati, Paulo amwingisisye mu yekaru.

³⁰ Omusi gwone nigukangabara, aba:nu nibe:kofyanya nibagwata Paulo, nibamukurubesya anja ya iyekaru. Aonao jinjigi nji:garwa.

³¹ Mbe, bejire benda okumwita, emisango nijikinga ku mukuru wa basirikare ati, Yerusalemi yo:ne eiyogana.

³² Aonao nagega abasirikare na bakuru bebwe, natebera nababirimira. Wejire barora Omukuru wa basirikare, nibasiga okubuma Paulo.

³³ Mbe niwo Omukuru wa basirikare nafugera namugwata, naragirira ati aboywe nyoro ebiri. Nabu:sya ati, ?Niga unu? ?Akora ci:nu ki?

³⁴ Abandi aba mu cise nibamwaisya inguru niba:ika abandi kutya, abandi kutya. Ejire atamibwa okusombo:kerwa kurwa inyombo, naragirira bamusire ku rusonjo.

³⁵ Wejire akinga ku birinyiro, abasirikare nibamubatura kurwo bururu bwe cise.

³⁶ Okuba ecise ca ba:nu bariga nibaru:ba inyuma, niba:nikirisya niba:ika ati, Mumumareo.

³⁷ Paulo wejire endo:kwingisibwa mu rusonjo, nabu:sya Omukuru wa basirikare ati, ?Eni:kirisibwa okukubwira omusango?

³⁸ Na:ika ati, ?Awe umenyere Cigiriki? ?Tari na:we Omumisiri uriya mu siku jinu jaitiŋene asokanyisye aba:nu bisira bina abaku:ti ba ba:nu nabasira ibara?

³⁹ Nawe Paulo na:ika ati, Anye ndi Muyaudi owende Tariso ya Kilikia, ndi mwinengo wo musi gwo rukuma. Enikuremberesya unane omwanya na:ike na ba:nu banu.

⁴⁰ Wejire amwikirisya, Paulo nemereguru ku birinyiro, naungisya aba:nu no kuboko. Wejire aba:nu bajibira jibi, nasimura mu nyaika ye Cieburania, na:ika ati.