Ebikorwa 2 - INDAGANO INYA:YA

Omwoyo Mweru nabe:kira abe:kirisya

¹ Mbe wejire rwaku:mira orusiku rwa Pentekote, bariga be:kofyanyisye bo:ne aamwi.

² Nibe:fura ecirumo nici:ja okuso:ka mu rwire, uti muyaga ngurunduma na managa, nigwijusya inyumba yo:ne munu bariga benyanjire.

³ Nijibabonekera jindimi ja:ukiremo rwa jimbesi jo muriro, nijibaswisya bo:ne.

⁴ Bo:ne nibe:jura Omwoyo Mweru, nibamba okwaika na jinyaika ejindi, rwa kutyo Omwoyo abayae okuja:ika.

⁵ Mu Yerusalemi bariga be:kaemo Abayaudi, abamura abakome:e mu kuramya banu baso:kere mu maanga go:ne ganu gari emwaro yo rwire.

⁶ Oburaka obwo wejire babungwa, ebise nibikofyanya mbataŋaŋara, okuba bonguywe buri mu:nu niba:ika mu nyaika ye wabo.

⁷ Nibarugu:ra bo:ne, nibajuma, niba:ika ati, ?Angu, bo:ne banu aba:ika batari Bagalilaya?

⁸ ?Ka niki cinu ecikora eswe nicungwa buri mu:nu mu nyaika inu ce:buriywemo?

⁹ Eswe ciri Baparisi, na Bamedi, na Baelamiti, na banu be:kae Mesopotamia, na mu Buyaudi, na mu Kapadokia, na mu Ponto na mu Asia,

¹⁰ na mu Furugia, na mu Pamfulia, na mu Misiri na mu ca:ro ca Libia, cinu cisijene na Kurene, na Barumi abagenyi, Abayaudi na banu baindukire.

¹¹ Na Bakerete na Baarabu, mbe ecungwa niba:ika mu nyaika jeswe ebirugu:ro ebinene bya Nyamuanga.

¹² Nibarugu:ra bo:ne nibe:tima:ta, niba:ikana ati, ?Emisango jinu jiri kutiki?

¹³ Nawe abandi nibabamwaisya, niba:ika ati, Bakorerwe manji ga mijabibu maya:ya.

Okusimura kwa Petero ku rusiku rwa Pentekote

¹⁴ Mbe Petero nemereguru aamwi na bariya rikumi no umwi, na:ikirira inguru, nababwira ati, Emwe bamura ba Buyaudi, nemwe bo:ne banu mwikae Yerusalemi, mumenye omusango gunu, nimutegeresya emisango jani.

¹⁵ Okuba ba:nu banu batakorerwe rwa kutyo emwe omwiganirisya, okuba wori ni saa esatu era ya mu mwisi.

¹⁶ Nawe binu nibyo byaikirwe no muragi Yoeli ati,

¹⁷ Nyamuanga ka:ika ati, Mu siku ja ku bute:ro ndibe:tururira ba:nu bo:ne Omwoyo gwani. Aba:na bemwe be cimura na be ciyara bariraga oburagi, Na bamura bemwe barirora ebiroro Na bakaruka bemwe bariro:ta ebiro:to.

¹⁸ Na mu siku ejo ndibe:tururira abagaya bani abarume na bagasi Omwoyo gwani, na:bo bariraga.

¹⁹ Ndyeresya ebirugu:ro inguru mu rwire, Ne bibarikisyo emwaro ku:si, Nibyo amanyinga, no muriro, no kwitu:ta kwa ingesi.

²⁰ Risu:ba ririba cisu:te, no kwesi kuriba manyinga, Rucari ku:ja orusiku orukuru rwa Ratabugenyi runu ruribu:risibwa.

²¹ Biriba ati, mu:nu wo:ne unu aribirikira risi:na rya Ratabugenyi arikisibwa.

²² Emwe bamura ba Israeli, nimungwe emisango jinu. Yesu wende Najareti, omu:nu unu Nyamuanga abe:resisye emwe mu bikorwa bya managa ne birugu:ro ne bibarikisyo, Nyamuanga akorere na maboko gae aagati yemwe, rwa kutyo emwe one mumenyere.

²³ Oyo aso:sibwe rwa kutyo Nyamuanga atangatire okurwaja rwo bukarae bwae kutyo bwariga buri mu binu ariga amenyere kara, emwe mwamugwatire, nimumubamba no kumwita na maboko ga ba:nu ababi:bi.

²⁴ Oyo Nyamuanga namusu:rura, nasuru:mura okurumwa kwo kufwa, okuba kutaturire kumuremera.

²⁵ Okuba Daudi kamwaika ati, Naroraga Ratabugenyi imbere yani kusiku: siku Okuba ari ku kuboko kwani okwe buryo, nisige kuteratera.

²⁶ Omutima gwani kwogukora nigukonderwa, Orurimi rwani nirusandaba, Ka no mubiri gwani gure:karaga mu kwiikanya.

²⁷ Okuba utarisiga omwoyo gwani ebwire, Amwi utarisiga Omweru wao abore.

²⁸ Wa:mmenyesisye jinjira jo buanga. Urinyijusya okukonderwa imbere yo busu bwao.

²⁹ Bamura, ba:na ba:su, enitura okwaika no buba:si imbere yemwe, eja saja Omukuru Daudi ati afu:ye, nasi:kwa, ne citu:ro cae ciri eweswe na ka wori.

³⁰ Mbe okuba omwene ariga:ri muragi, kandi ariga amenyere ati, Nyamuanga amwirairiye ku cirairo ati, mu rwiburo rwa mu nda yae, arimwinamusya Kristo enyanje ku citebe cae ca iŋoma.

³¹ Okuba atangatire okurora ebya imbere, na:ika ebyo kusu:ka kwa Kristo ati, omwoyo gwae gutasigirwe ebwire, nakabee guri mubiri gwae gutaborere.

³² Mbe Yesu oyo Nyamuanga amusu:ruye, neswe bo:ne ciri bo kumwimako.

³³ Mbe, wejire amara okuku:ibwa ku kuboko kwe buryo okwa Nyamuanga, nayabwa omurago gwo Mwoyo Mweru Kwisemwene, mbe niwo nabe:tururira cinu omurora no kucungwa woryanu.

³⁴ Okuba Daudi atarinyire mu rwire, nawe a:ikire omwene ati, Ratabugenyi amubwiriye Ratabungenyi wani ati, Inyanja ku kuboko kwani okwe buryo,

³⁵ Okukinga ao ndikora abaremo bao okuba rwe citebe ce bigere byao.

³⁶ Mbe, inyumba yo:ne ya Israeli bamenye cimari ati, Yesu oyo mwabambire ku musaraba, Nyamuanga amukorere kuba Ratabugenyi na Kristo.

Aba:nu nibe:kirisya bisira bisatu

³⁷ Mbe wejire bongwa ebyo, emyoyo jebwe nijirumwa, nibabwira Petero, na jintumwa ejindi ati, ?Cikore kutiki, bamura ba:su?

³⁸ Petero nababwira ati, Nimute, mubatijibwe buri mu:nu mwisi:na rya Yesu Kristo, korereki mwiswaririrwe ebibi:bi byemwe, omujo:kuyabwa eciyanwa co Mwoyo Mweru.

³⁹ Okuba omurago ni gwemwe na ku ba:na bemwe, na ku ba:nu bo:ne banu bari kura, ku bo:ne banu baribirikirwa na Ratabugenyi Nyamuanga weswe.

⁴⁰ Nabakomeresya mu misango ejindi myafu no kubakengya na:ika ati, Mwikisye mwiimbo rinu erikote.

⁴¹ Mbe aba:nu banu be:kirisisye omusango gwae nibabatijibwa. Orusiku urwo nibeyongesya ba:nu uti bisira bisatu.

Okusangira kwa ikanisa yo kwamba

⁴² Nibe:kome:sya mu kwiigisya kwa jintumwa na mu kusangira, na mu kubegana omukate, na mu kusabwa.

⁴³ Obu:ba nibuba ku mwoyo gwa buri mu:nu. Ebirugu:ro byafu ne bibarikisyo nibiborwaga na jintumwa.

⁴⁴ Bo:ne banu be:kirisisye bariga aamwi, na mu bi:nu byone basangiye aamwi.

⁴⁵ Nibaka:na obunibi bwebwe ne bi:nu binu bariga banabyo, nibagabiraga bo:ne rwa kutyo mu:nu wo:ne ariga akenere.

⁴⁶ Bakome:e kusiku no mwoyo gumwi mu yekaru, nibabeganaga omukate mu nyumba imwi imwi, nibaryaga ebiryo, bakondeywe no mutima gwerere.

⁴⁷ Nibakusya Nyamuanga, nibasi:mwa na ba:nu bo:ne. Ratabugenyi nongesyaga kusiku banu bakisibwaga.