Ebikorwa 16 - INDAGANO INYA:YA

Paulo nagega Timoteo

¹ Mbe nakinga Deribe na Lusitira. Omwiigisibwa ariga:rio, risi:na ryae Timoteo, Omwana wo Muyaudigasi unu e:kirisisye. Nawe esemwene ariga:ri Mugiriki.

² Oyo asimirwe na abairi ba mu Lusitira na Ekonio.

³ Paulo namwenda oyo agende nage. Namugega namutenda kurwa Bayaudi banu bariga bari mu ca:ro eco, okuba bo:ne bariga bamumenyere ati, esemwene ni Mugiriki.

⁴ Mbe nibatura mu misi nibabayana ebiragiro binu byaragiriywe na jintumwa na bakaruka banu bariga bari mu Yerusalemi, korereki babigwate.

⁵ Mbe jikanisa nijongesibwa amanaga mu kwikirisya, nibeyongesya okufura kusiku.

Paulo Kabirikirwa okuja Makedonia

⁶ Nibatura mu ca:ro ca Furugia ne ca Galatia, nibaganyibwa no Mwoyo Mweru basige kwaika Omusango mu Asia.

⁷ Wejire bateberera Musia nibaregeja okugenda mu Bitunia, nawe Omwoyo wa Yesu atabe:kiri-sisye.

⁸ Nibatura mu Musia nibateberera Tiroa.

⁹ Paul narora ebiroro mu ngeta. Omu:nu wa Makedonia e:mereguyu namuremberesya, na:ika ati, Yambuka u:je Makedonia ucisakire.

¹⁰ Wejire amara okurora ebiroro, niciyenja okugenda mu Makedonia, okuba camenyere cimari ati, Nyamuanga niwe acibirikiye okubasimurira Ebyobwana.

¹¹ Mbe nicisyabara okuso:ka Tiroa, nicigenda na mwijo gumwi era kukinga Samotarake, mwejo nicikinga Neapoli.

Nibakinga Filipi

¹² Niciso:kayo nicigenda Filipi, nigwo omusi Omukuru ogwa mu Makedonia, gunu gwabee gwo kwikaramo Abarumi. Nicibagamo mu musi ugwo siku nyafuo.

¹³ Mbe ku rusiku rwa isabato niciuruka mwirango ryo musi, nicigenda ku musima, eyo ce:ganirisisye ati niwo abasabirwaga. Niciyanja nica:ika na bagasi banu bariga be:kofyanyisyeo.

Okwikirisya kwa Ludia

¹⁴ Mbe ariga ariwo mugasi risi:na ryae Ludia, omuka:ni wo rusombyo rwo ruyo:yo, unu ariga wa mu musi gwa Tuatira, unu aramyaga Nyamuanga. Omwene nacungwa. Ratabugenyi ne:gura omwoyo gwae ategeresye jinu Paulo a:ikire.

¹⁵ Wejire abatijibwa aamwi na ba mu nyumba yae, naciremberesya na:ika ati, Araba omundora ati, ndi mwiikanyibwa ku Ratabugenyi, mwingire mu nyumba yani, mwikaremo. Nacisinyirisya.

Omuyara unu ariga nabumwa obufumu

¹⁶ Mbe anu cariga cicagenda anu basabirwaga, nicibonana no muyara unu ariga nabumwa obufumu, unu aboneraga besebugenyi omuri:ro mwafu kurwo kuragura.

¹⁷ Oyo naru:ba Paulo neswe, na:ikirira inguru na:ika ati, Aba:nu banu ni bagaya ba Nyamuanga unu ari inguru muno, banu ababasimurira emwe injira yo mweruro.

¹⁸ Nakoraga kutyo siku nyafu. Nawe Paulo nasurumbara muno, naindukira omusambwa, na:ika ati, Enikubwira mwisi:na rya Yesu Kristo, numuso:kemo. Nigumuso:kamo mu mwanya ogwo ao era. Paulo na Silasi nibe:swa mwiboero

¹⁹ Nawe besebugenyi wejire barora ati, okwiikanya kwa mabona gebwe kwawao, nibabagwata Paulo na Silasi, nibabakurura mbabakingya mwika:niro imbere ya bakuru.

²⁰ Nibabasira ku baramusi niba:ika ati, Aba:nu banu abayogya muno omusi gweswe, okuba ni Bayaudi.

²¹ Ka abe:igisya jintungwa jinu ejisisya eswe okujiru:ba no kujikora, okuba eswe ciri Barumi.

²² Ecise nicibakurumukira aamwi. Abaramusi nibabatemurira jingubo jebwe, nibaragirira okubabuma ji:simbo.

²³ Wejire bababuma nsimbo nyafu nibabe:sa mu nyumba yo buboywa, nibaragirira omuri:si wa baboywa abarinde muno.

²⁴ Omwene ejire aragirirwa kutyo, nabakwengesya mwisago rya munda, nababoya amaguru gebwe mu mase:ga. Omuri:si wa baboywa ne:kirisya

²⁵ Nawe mu bwire aagati, Paulo na Silasi nibasabwa nibemba ebyo kukusya Nyamuanga, ababoywa be:ja:bo nibabategeresya.

²⁶ Ca:ri kutyo ni:bao nyamutikima nene, ndijei jifuka ja inyumba yo buboywa nijisingisibwa. Aonao jinyigi jo:ne niji:guka, na mase:ga gebwe nigasurumuka.

²⁷ Omuri:si narafya. Wejire arora jinjigi ja inyumba yo buboywa ji:gukire, nasoora ecimari cae e:ite, okuba e:ganirisisye ati ababoywa be:rukire.

²⁸ Nawe Paulo na:ikirira inguru na buraka bunene, na:ika ati, Wasiga kwiutasya, okuba eswe ciriwo anu bo:ne.

²⁹ Nasabwa jitara nabirima nengira, nagwa a:si imbere ya Paulo na Silasi nayarara.

³⁰ Nabaurusya anja na:ika ati, Baratabugenyi, ?nikore kutiki nikisibwe?

³¹ Niba:ika ati, Numwikirisye Ratabugenyi Yesu Kristo, oukisibwa, awe na ba mu nyumba yao.

³² Nibamubwira omusango gwa Ratabugenyi aamwi na ba mu nyumba yae.

³³ Nabasira mu mwanya ogwo mu ngeta, nabo:sya amauta, nabatijibwa aonao, omwene na ba mu nyumba yae bo:ne.

³⁴ Nabasira mu nyumba yae, nabategya inenda, nakonderwa aamwi na ba mu nyumba yae bo:ne, okuba be:kirisisye Nyamuanga.

Okusurumurwa kwa Paulo na Silasi

³⁵ Bwejire bwaca, abaramusi nibatuma abakuru ba basirikare niba:ika ati, Nube:gurire aba:nu abo bagende.

³⁶ Omuri:si nabwira Paulo emisango ejo ati, Abaramusi batuma aba:nu okube:gurira emwe. Mbe wori muuruke, mugende no murembe.

³⁷ Nawe Paulo nababwira ati, Bamacibumira imbere ya ba:nu, ke:nu citaramuywe, ke:swe ciri Barumi ka na nibace:sa mwiboero. ?Ka woryanu abenda kuciso:syamo bwitebe? Uri na katyari. Nawe niba:je abene baciurusye.

³⁸ Abasirikare nibabwira abaramusi ebigambo ebyo. Wejire bongwa ati, ni Barumi, nibo:baya.

³⁹ Niba:ja nibabaremberesya. Nibabaurusya aanja, nibenda baso:ke mu musi gwebwe.

⁴⁰ Abene nibauruka mwiboero nibagenda ewa Ludia. Bejire babonana na bairi, no kubasi:ri:sya nibaso:kayo.