Ebikorwa 14 - INDAGANO INYA:YA

Nibasimura Ekonio

¹ Mbe, mu Ekonio nibengira aamwi mu rikofyanyisyo rya Bayaudi, nibasimura ndijei ecise cinene ca Bayaudi na Bagiriki nibe:kirisya.

² Nawe Abayaudi banyatongwa nibasoeresya abamaanga nibanyamura emyoyo jebwe korereki babibirwe abairi.

³ Mbe nibe:karayo siku nyafu niba:ika no buba:si mu Ratabugenyi unu agwimireko omusango gwe cigongo cae, nabayana ebibarikisyo ne birugu:ro binu byakorwaga na maboko gebwe.

⁴ Nawe ecise ca mu musi nica:ukana. Abandi nibaba ku Bayaudi, na bandi kuntumwa.

⁵ Nawe abamaanga na Bayaudi aamwi na bakuru bebwe, nibabagonera korereki babafume no kubarasira mabui,

⁶ Wejire bamenya, nibe:rukira mu Lusitira na Deribe, nijo emisi ja Lukonia, na mu ca:ro cinu cariga cisijene.

⁷ Nibaba eyo nibasimura Ebigambo byo bwana.

Paulo naosya omurema

⁸ Mu Lusitira ariga:riwo omu:nu ari murema mu maguru eyanjire aremaae kuso:ka mu nda ya nyiramwene, atendega kuribatako na katyari.

⁹ Oyo nongwa Paulo na:ika. Omwene namurore:rera nekeneke, namurora uti ano kwikirisya kunu kumwiire aosibwe,

¹⁰ Na:ika na buraka bunene ati, Imuka wimereguru ne bigere byao. Ne:junga naribata.

¹¹ Ebise wejire barora cinu Paulo akora, niba:ika na buraka mu nyaika ye Cilukonia niba:ika ati, Bamungu be:kire kwiswe mu rususo rwa ba:nu.

¹² Barinaba nibamutoga Jeu, na Paulo nibamutoga Ereme, okuba ariga:ri mwaiki kukira owe:ja:bo.

¹³ Omugabisi wa Jeu, unu iyekaru yae yariga imbere yo musi, nare:ta iŋa na jinenga jo bwaso kwirango, nendo:kutamba eco:go aamwi ne bise.

¹⁴ Nawe jintumwa, Barinaba na Paulo wejire bongwa, nibatemura ebifwaro byebwe, nibabirima nibengira mu cise, niba:ikirira inguru,

¹⁵ Niba:ika ati, ?Bamura, niki cinu ecikora nimukora kutya? Neswe one riri ba:nu rwemwe, ecibabwira ebigambo ebikonde korereki musige ebya kutyo era ebyeja:bo binu, muindukire Nyamuanga omuanga, unu akorere orwire na i:si, na inyanja na binu byone birimo.

¹⁶ Unu ariga asigire amaanga go:ne garibatirega mu njira jebwe abene, mu maimbo ga kara,

¹⁷ Nawe atabasigire batana rusingiro, nawe akoraga ebyo bwana, nabayanaga iŋuba okuso:ka mu rwire, na jisiku jo rugeso, ne:gusya emitima jemwe ne biryo no kukonderwa.

¹⁸ Nakabee ba:ikire kutyo, yabee nyako okubaganya, basige kubatambira eco:go.

Paulo naraswa na mabui

¹⁹ Nawe Abayaudi nibaso:ka Antiokia na Ekonio, nibasoeresya ebise, nibarasa Paulo na mabui, nibamukururira ku mwira gwo musi, nibe:togera ati, afu:ye.

²⁰ Nawe abe:igisibwa wejire bamusingira, nemereguru nengira mu musi. Mwejo nagenda Deribe aamwi na Barinaba.

²¹ Wejire bamara okusimura Ebyobwana mu musi ugwo, no kukora abe:igisibwa ba:fu, nibasuba mu Lusitira, na Ekonio na Antiokia,

²² Nibasimbagirisya emyoyo ja be:igisibwa, nibabakomeresya okuruma mu kwikirisya, niba:ika ati, kuci:ire okwingira mu bukama bwa Nyamuanga mu njira ya inya:ko nyafu.

²³ Wejire bamara okusora abakaruka mu kanisa jo:ne, no kusabwa no kusara:rira, nibabatu:ra ku Ratabugenyi unu be:kiri-sisye.

²⁴ Nibatura mu Pisidia nibakinga Pamufulia.

²⁵ Wejire bamara okusimura omusango mu Periga, nibateberera mu Atalia.

Nibabasombo:rera ala ikanisa ya Antiokia

²⁶ Nibaso:kayo nibaema amatanga okuja Antiokia, niye:yo bate:yweo mu cigongo ca Nyamuanga kurwo murimu gunu baku:misisye.

²⁷ Wejire bakinga nibakofya aba ikanisa, nibabasombo:rera byone binu Nyamuanga akorere aamwi nabo, na rwa kutyo abe:guriye abamaanga omuryango gwo kwikirisya.

²⁸ Nibe:karayo aamwi na be:igisibwa siku nyafu.