Ebikorwa 11 - INDAGANO INYA:YA

Petero nabwira Abayaudi ebya ba:maanga

¹ Mbe jintumwa na bairi banu bariga mu Buyaudi nibongwa ati, Aba:maanga one be:kirisisye omusango gwa Nyamuanga.

² Wejire Petero arinya Yerusalemi, abatende nibabambasyanya nage,

³ Niba:ika ati, Awe wamengira mu ba:nu banu batatendere nurya aamwi nabo.

⁴ Nawe Petero namba okubatondera ati,

⁵ Anye nariga mu musi gwa Yopa, ninsabwa, niyutuka, nindora mu ciroro eci:nu nici:ka, rwo mwenda omugutu gugwatirwe ku sonde ena nigwisibwa okuso:ka mu rwire, nicinyijira.

⁶ Nejire nasunguriramo, nini:ganirisya nindora jirimo jintyanyi ja ku si eja maguru gana, ne biremo na binu ebi:kurura, na jinyonyi ja mu rutumba.

⁷ Mbe ninungwa oburaka nibumbwira ati, Petero, imuka ukomere urye.

⁸ Nawe nina:ika ati, Uri, Ratabugenyi, okuba eci:nu ecijabi, amwi cinu cite:rere cicariga kwingira mu kanwa kani na katyari.

⁹ Nawe oburaka nibunyindura rwa kabiri okuso:ka mu rwire ati, Binu Nyamuanga e:sisye utabitogaga bijabi.

¹⁰ Nibiba kutyo kwiya kasatu, mbe niwo nibisubo:kurinyibwa mu rwire.

¹¹ Cari kutyo aonao ba:nu basatu bariga be:mereguyu imbere ya inyumba inu nariga nirimo, banu batumirwe kwanye okuso:ka Kaisaria.

¹² Mwoyo nambwira nigende nabo, kwitima:ta uri. Na bairi banu bata:nu na umwi nicigenda nabo, nicingira mu nyumba yo mu:nu uyo.

¹³ Omwene nacitondera rwa kutyo arorere maraika mu nyumba, emereguyu namubwira ati, Tuma aba:nu Yopa, baji:re Simoni, unu katogwa Petero.

¹⁴ Niwe arikubwira ebigambo binu birikukisya awe na ba ike:wao bo:ne.

¹⁵ Ao nambire okwaikana, Mwoyo Mweru nabagwako rwa kutyo eswe okwamba aciguyeko.

¹⁶ Nini:cuka ecigambo ca Ratabugenyi cinu a:ikire ati, Yoana abatijaga na manji, nawe emwe muribatijibwa no Mwo Mweru.

¹⁷ Mbe Nyamuanga akaba abayae eciyanwa eco rwa kutyo aciyae eswe kara, eswe abo eci:kirisya Ratabugenyi Yesu Kristo, ?anye nakabeega owo kutura okuingirira Nyamuanga?

¹⁸ Wejire bongwa ebyo, nibajibira, nibakusya Nyamuanga, niba:ika ati, Kana Nyamuanga ayae abamaanga one okuta okukinga mu buanga.

Ikanisa yo kwamba mu ba:maanga

¹⁹ Na banu banyaragene kurwo kunyasibwa kunu kwabeeo ku bya Stefano, nibaribata okukinga Foiniki, na Kupuro, na Antiokia, batasimuriye mu:nu omusango gwa Nyamuanga tari Abayaudi era.

²⁰ Nawe mwabo barigamo abamura abende Kupuro na Bakurene, bejire bakinga Antiokia, niba:ika na Bagiriki one, nibasimura Ebigambo byo bwana ebya Ratabugenyi Yesu.

²¹ No kuboko kwa Ratabugenyi kwariga kuri aamwi nabo. Ba:nu ba:fu nibamwikirisya, nibaindukira Ratabugenyi.

²² Emisango ja ba:nu abo nijikinga mu matwi ga ba ikanisa inu yaraga mu Yerusalemi. Nibatuma Barinaba agende Antiokia.

²³ Omwene ejire akinga narora ecigongo ca Nyamuanga, nakonderwa. Nakomeresya bo:ne ati, murumatane na Ratabugenyi no bukarae bwo mwoyo.

²⁴ Okuba omwene ariga:ri wa kisi e:juye Omwoyo Mweru no kwikirisya. Aba:nu ba:fu nibeyongesya ku Ratabugenyi.

²⁵ E:ya nagenda Tariso okuyenja Saulo.

²⁶ Ejire amubona namure:ta mu Antiokia. Mbe e:ya nibamara mwaka gumwi, nibe:ko-fyanyaga na ba ikanisa, nibe:igisyaga ba:nu ba:fu. Abe:igisibwa nibambira mu Antiokia okutogwa Bakristo.

²⁷ Mu siku ijo abaragi nibaso:ka Yerusalemi nibakinga Antiokia.

²⁸ Oumwi mu bene nemereguru, risi:na ryae Agabo, ne:resya mu managa go Mwoyo Mweru ati, iribao injara mu:si jo:ne. One ni:bao mu siku ja Kulaudio Kaisari.

²⁹ Abe:igisibwa niba:ikana okutumira abairi banu be:kae mu Buyaudi ebyo kubasakira, mu:nu wo:ne rwa kutyo ariga nabona.

³⁰ Nibakora kutyo, nibatumira abakaruka mu maboko ga Barinaba na Saulo.