Ebikorwa 1 - INDAGANO INYA:YA

Yesu naraga jintumwa

¹ Awe Teofilo, nandikire ecitabo co kwamba eca binu byone Yesu ambire okukora no kwiigisya,

² Okukinga ku rusiku orwo agegerwe nasirwa mu rwire, ejire amara okuragira kubwo Mwoyo Mweru jintumwa jinu asorere.

³ Wejire amara okunya:sibwa, ne:bu:risya ku bene mu bibarikisyo byafu ati ni muanga, nabatonekera mu mwanya gwa siku makumi gana, na:ika emisango jo bukama bwa Nyamuanga.

⁴ Mbe, ejire e:kofyanya nabo, nabakomeresya basige kuso:ka Yerusalemi, nawe barindirire omurago gwa Rata, gunu mwonguywe kwanye.

⁵ Okuba Yoana abatijaga na manji, nawe emwe muribatijibwa no Mwoyo Mweru mu siku jitari nyafu.

⁶ Mbe bejire be:kofyanya, nibamubu:sya niba:ika ati, ?Ratabugenyi, oujo:kusubisya Baisraeli obukama mu mwanya gunu?

⁷ Nababwira ati, Okumenya emyanya na jisiku kutari kwemwe, binu Rata atee mu buinga bwae omwene.

⁸ Nawe muriyabwa amanaga, Omwoyo Mweru ariba:ja kwimwe, nemwe murabaga abo kunyimako mu Yerusalemi, na mu Buyaudi yo:ne, na mu Samaria, no kukinga ku bute:ro bwa i:si.

Yesu narinya mu rwire

⁹ Ejire amara okwaika ebyo, anu bariga bacarora, ne:ŋengibwa, eri:re ndibasirigisya mu me:so gebwe mbaremo:kumurora.

¹⁰ Anu bariga bacarore:rera nekeneke mu rwire kutyo karinya, mbe rora, bamura babiri nibe:mereguru yei nabo, bafwae ngubo nyeru.

¹¹ Niba:ika ati, Emwe bamura ba Galilaya, ?niki cinu ecikora mwimereguyu nimuraramira mu rwire? Yesu uyo agegwa kwimwe okusirwa mu rwire, nikwo kutyo arisuba oku:ja rwa kutyo mugwemurora nagenda mu rwire.

Abeigisibwa nibasuba Yerusalemi

¹² Mbe niwo nibasuba Yerusalemi okuso:ka ku ci:ma cinu catogwaga Ce mijeituni, cinu ciri yei na Yerusalemi uti rugendo rwa rusiku rwa sabato.

¹³ Mbe wejire bengira, nibarinya mwigorofwa omwo bariga be:kae Petero, na Yoana, na Yakobo, na Anderea, na Filipo, na Tomaso, na Batolomayo, na Matayo, na Yakobo wa Alifayo, na Simoni Jelote, na Yuda owabo Yakobo.

¹⁴ Abo bo:ne bariga be:kome:sisye na mwoyo gumwi mu kusabwa, aamwi na bagasi na Maryamu nyiramwene Yesu na bamura babo Yesu.

Matiya naurwa okuba ntumwa

¹⁵ Mu siku ijo Petero ne:mereguru aagati ya ba:na ba:su—obukumi bwa masi:na ga banu be:kofyanyisye bariga uti bakingire egana na makumi gabiri—na:ika ati,

¹⁶ Ba:na ba:su, kwari kwiire binu byandikirwe biku:misibwe, binu byaikirwe kara no Mwoyo Mweru mu kanwa ka Daudi, ku bya Yuda unu abee mutangasya wa banu bagwatire Yesu.

¹⁷ Okuba ariga abariywe aamwi neswe, nayabwa omugabo gwo bukosi bunu.

¹⁸ Mbe, omwene nagura risambu no muyero gwo bunyamusi bwae, nagwa bwifumbike, na:tika inda, obura bwae mbuso:kamo bwone.

¹⁹ Omusango gunu nigumenyeka mu banu bo:ne be:kae Yerusalemi. Na risambu eryo, mu nyaika yebwe niritogwa ati, Akelidama, nikwo kwaika ati, Risambu rya manyinga.

²⁰ Okuba byandikirwe mu citabo ca Jaburi ati, Omusi gwae gube etongo, basigega kwikaramo ba:nu. Na rindi ati, Omurimu gwae gugegwe undi.

²¹ Mbe mu ba:nu abo baengyanyaga neswe mu siku jo:ne anu Ratabugenyi Yesu engiraga no kuuruka kwiswe,

²² Okwambira ku kubatija kwa Yoana kukinga ku rusiku orwo narinya okuso:ka kwiswe, kwiire oumwi kwabo abe wo kwimako ebyo kusu:ka kwae aamwi neswe.

²³ Nibatu:rao babiri, Yusufu unu atogwaga Barisaba, oyo atogerwe risi:na erindi Yusito, na Matiya.

²⁴ Nibasabwa niba:ika ati, Awe Ratabugenyi, unu umenyere emitima ja ba:nu bo:ne, nuce:resye ni wuya unu wasorere mu babiri banu,

²⁵ Agege omugabo gwo bufurubendi no butumwa, bunu Yuda asigire kubwe bikayo byae, agende ku bwikaro bwae omwene.

²⁶ Nibabakorera obwitosi. Obwitosi nibugwira Matiya, nabarirwa aamwi na jintumwa ekumi na umwi.