Bafilipi 4 - INDAGANO INYA:YA

Ebya Ewodia na Suntuke

¹ Mbe, ba:na ba:su abendwa na be:sigomberwa bani, banu muri kukonderwa kwani no rutenga rwani, mbe mwimereguru murumire mu Ratabugenyi, abendwa bani.

² Eniremberesya Ewodia, ka eniremberesya Suntuke, be:ganirisyega gumwi mu Ratabugenyi.

³ Yee enikusabwa awe one, omugaya we:ja:su, usakire abagasi abo, okuba banya:kaga emirimu aamwi mu Bigambo byo bwana, aamwi na Kelementi one, na bakosi be:ja:su abandi banu amasi:na gebwe gari mu citabo co buanga.

⁴ Mukondererwe mu Ratabugenyi kusiku. Enisuba okwaika rindi ati, Mukonderwe.

⁵ Obwororo bwemwe bumenyeke ku ba:nu bo:ne. Ratabugenyi ari yei.

⁶ Mutaweraga mwoyo musango gwone gwone, nawe mu jo:ne mubwire Nyamuanga binu omwenda, mu kusabwa na mu kuremberesya aamwi no kusi:ma.

⁷ No murembe gwa Nyamuanga, gunu ogukira okusombo:kerwa kwone, gurabarindaga emitima jemwe na me:ganirisyo gemwe mu Kristo.

⁸ Ku bute:ro, ba:na ba:su, bukaba burio bure:si, amwi kukaba kurio kukuya, mwiganirisyega binu ati, byone ebye cimari, na binu bi:ire ecibaro, ne byo burenge:resi ne byeru, na binu ebyendwa, na binu ebisi:mwa.

⁹ Binu mwe:igiye nimuramira nimungwa no kurora kwanye, nibyo mukorega, na Nyamuanga wo murembe arabaga aamwi nemwe.

Byone ebiso:ka ku Nyamuanga

¹⁰ Nawe nakondereywe mu Ratabugenyi okuba wori mu siku jinu, mwarabu:kire mu kwiganirisya kwemwe kubwani. Ni cimari mwanyiganirisyaga nawe mwaburirwe omwanya.

¹¹ Nitakwaikibwa bukene, okuba ne:igiye, okwiywa nebyo ndi nabyo.

¹² Nimenyere okukeywa, ka nimenyere okusagirira. Mu bigambo byone nde:igiye okwiguta no kurumwa omweko, no kufufya no kukeya.

¹³ Enitura byone mu Unu kanana amanaga.

¹⁴ Nawe mwakorere kisi okusangira nanye mu nya:ko jani.

¹⁵ Nemwe Abafilipi, mumenyere ati, mu kwamba kwe Bigambo byo bwana, wejire naso:ka mu Makedonia, yariga itario kanisa inu yasangiye nanye mu byo kugaba no kuyabwa, nawe nemwe era.

¹⁶ Okuba mu Tesalonika one, mwatumire ebyo nariga nikenere, rumwi no rwa kabiri.

¹⁷ Anye nitakuyenja ciyanwa, nawe eniyenja amatwasyo geyongesye ku bukumi bwemwe.

¹⁸ Nawe ndi ne bi:nu byone, ninfufya. Ne:gutire wejire nayabwa Epafurodito binu byaso:kere kwimwe, nirwo oruunyo rwo kuranga kisi, nico eco:go cinu Nyamuanga ke:kirisya no kusi:ma.

¹⁹ Nyamuanga wani arabayanaga byone binu mukenere, rwo buni:bi bwae mwikusyo kutyo buri mu Kristo Yesu.

²⁰ Nyamuanga Rata akusibwega kajanende na kajanende. Amina.

Okuke:sya

²¹ Muke:sye abe:ru bo:ne mu Kristo Yesu. Aba:na ba:su banu bari aamwi nanye ababake:sya.

²² Abe:ru bo:ne ababake:sya, nawe kukira muno, aba mu nyumba ya Kaisari.

²³ Ecigongo ca Ratabugenyi Yesu Kristo cibega aamwi ne myoyo jemwe.