Bafilipi 3 - INDAGANO INYA:YA

Oburenge:resi bwo mu:nu ni bwa kutyo era

¹ Ku bute:ro, ba:na ba:su, mukondererwega mu Ratabugenyi. Okubandikira ebigambo byejabo ebyo kutakuntamirisya anye, nawe okubare:tera emwe omurembe.

² Mwikenge jimbwa. Mwikenge abakosi bo bubi:bi. Mwikenge banu abe:tema.

³ Okuba eswe ciri bo rutendo, banu eciramya Nyamuanga mu Mwoyo, nici:kuya mu Yesu Kristo, nawe citakwiikanya ebyo mubiri.

⁴ Nakabee ndi anye nakaturire okwiikanya ebyo mubiri. Omu:nu oundi wo:ne ake:ganirisya okubi:ikanya, mbe anye enimukira.

⁵ Anye natendeywe ku rusiku rwa kata:nu na kasatu, ndi wa mwiyanga rya Isiraeli na mu ruganda rwa Benjamini. Ndi Mueburania wa Baeburania, mu biragiro niri Mufarisayo.

⁶ Mu kukome:ra, nariga ni:nya:sya ikanisa. Mu burenge:resi bunu buri mu biragiro, nariga nitariko cikayo.

Paulo nasiga byone amenye Kristo

⁷ Nawe byone binu byariga muri:ro kwanye, nibyo nabarire ati ni byo kufwirwamo kubwa Kristo.

⁸ Yee, enibara byone kuba kutyo era kurwo bure:si obwafu obwo kumenya Kristo Yesu Ratabugenyi. Kubwoyo nafwiriywemo ebi:nu byone, ka enibibara rwa mafwi korereki nibone Kristo,

⁹ Ka niboneke mu Mwene ati, nitana burenge:resi bunu obuso:ka mu biragiro, nawe ni bunu burio kurwo kwikirisya Yesu, nibwo oburenge:resi bunu obuso:ka ku Nyamuanga kurwo kwikirisya.

¹⁰ Korereki nimenye Omwene, no buinga bwo kusu:ka kwae, no kusangira mu kunya:sibwa kwae, nisusanyibwe no kufwa kwae.

¹¹ Korereki mu byone nikinge mu kusu:ka kwa bafu:ye.

Paulo ne:kome:sya okuja imbere

¹² Tari ati namarire okuyabwa, amwi ati, namarire okukumisibwa, nawe eniru:ba korereki nicigwate cinu Kristo Yesu angwatiye.

¹³ Ba:na ba:su, nitakwiganirisya ati, namarire okugwata, nawe enikora ecigambo cimwi rinu, nindabirwa ebya inyuma, nini:ruki:rira ebya imbere,

¹⁴ Eni:kome:sya, okubirima nikinge anu ecitangiranira, nibone ecifu:ywa co kubirikira kwa Nyamuanga okwa inguru mu Kristo Yesu.

¹⁵ Mbe eswe bo:ne banu ciku:miye, ci:ganirisyega kutyo. Muke:ganirisya ebindi mu musango gwone, Nyamuanga aribaswerurira nogwo one.

¹⁶ Nawe ku cinu cakingireko, ciribatirega mwico.

Abakristo ewabo ni mu rwire

¹⁷ Ba:na ba:su, muru:bega anye, murorerega kwabo banu abaribata rwe co kurorerako cinu mwabwene kwiswe.

¹⁸ Okuba ba:fu abaribata, banu nababwiriye kwiya ka:fu, na woryanu enibabwira nindira na masiga ati, nibo abaremo bo musaraba gwa Yesu Kristo.

¹⁹ Obute:ro bwebwe nikwo kusimagira, mungu webwe niyo inda, ne cibaro cebwe ciri mu nswaro jebwe, abe:ganirisya ebye ca:ro.

²⁰ Okuba obwinengo bweswe buri mu rwire. Niyo ecirindirira Omukisya unu kaso:kayo, niwe Ratabugenyi Yesu Kristo.

²¹ Niwe ariindura emibiri jeswe jinu jitana managa, korereki jisusanyibwe rwo mubiri gwae ogwa rikusyo, rwa managa gae kutyo agakora, nigainya ebi:nu byone bimworobere Omwene.