Bafilipi 1 - INDAGANO INYA:YA

Ebyo kuke:sya

¹ Anye Paulo, aamwi na Timoteo, banu ciri bagaya ba Yesu Kristo, ecandikira abe:ru bo:ne mu Yesu Kristo banu bari mu Filipi, aamwi na bakaruka ba ikanisa na bafurubendi.

² Ecigongo cibe kwimwe no murembe binu ebiso:ka ku Nyamuanga Rata na ku Ratabugenyi Yesu Kristo.

Okusabwa kwa Paulo

³ Enisi:ma Nyamuanga wani wora nabe:cuka.

⁴ Enibasabirwa emwe bo:ne kusiku mu kusabwa kwani kwone no kukonderwa.

⁵ Enisi:ma kurwo kusangira kwemwe mu Bigambo byo bwana, kuso:ka ku rusiku rwo kwamba kukinga woryanu.

⁶ Nimenyere kara omusango gunu ati, Oyo ambire omurimu gwo bwana mwimwe, niwe arigukumisya kukinga ku rusiku rwa Yesu Kristo.

⁷ Nikwo kutyo kunyiire okube:ganirisisya kutyo emwe bo:ne, okuba ndi nemwe, muri mu mutima gwani, ka bo:ne musangiye nanye mu cigongo cinu, mu kuboywa kwani na mu kurwanirira Ebigambo byo bwana no kubirumya.

⁸ Okuba Nyamuanga niwe kanyimako rwa kutyo enibaranga emwe bo:ne no kwenda kwa Yesu Kristo.

⁹ Enisabwa ati, okwenda kwemwe kwiyongesye no kufura mu kumenya no kusombo:kerwa kwone.

¹⁰ Korereki mwikirisye ebyo bwana, mube ba:nu ba cimari, banu batana cikayo kukinga ku rusiku rwa Kristo.

¹¹ Muunde amatwasyo go burenge:resi ganu gario kubwa Yesu Kristo, Nyamuanga akusibwe no kukuibwa.

Okukonderwa kwa Paulo na jinya:ko jae

¹² Nawe ba:na ba:su enenda emwe mumenye ati, binu byambeeko byabee bya kuswisisya Ebigambo byo Bwana.

¹³ Ndijei okuboywa kwani mu Kristo nikuboneka ku basirikare bo mukama na ku bandi bo:ne.

¹⁴ Na ba:na ba:su ba:fu muno mu Ratabugenyi, niwo nibakome:ra kurwo kuboywa kwani, nibeyongesyaga muno okutumbirira okwaika omusango gwa Nyamuanga, ku:baya uri.

¹⁵ Abandi abasimura Kristo kurwo rwiso no kuyomba, abandi abamusimura kurwo kwenda kwe kisi.

¹⁶ Banu abasimura kurwo kwenda, bamenyere ati, nateyweo kurwo kurwanirira Ebigambo byo bwana,

¹⁷ Nawe abandi abasimura Kristo kurwo kuyomba, tari mu kumasya, nibe:togera ati, abanyongesyako nyako mu kuboywa kwani.

¹⁸ ?Kambe niki? Nawe Kristo akasimura, mu njira yo:ne, amwi mu burigerige amwi mu kumasya, mbe nico ecikora ninkonderwa, ka nirikonderwa.

¹⁹ Okuba nimenyere ati, eco nico ciriinduka niciba mweruro gwani kurwo kusabwa kwemwe na kurwo kuyabwa Mwoyo wa Yesu Kristo.

Binu Paulo ariga akarariye

²⁰ Rwa kutyo enirindirira niniikanya ati nisige kujira nswaro mu musango gwone, nawe rwa siku jo:ne, ka na woryanu, Kristo arakusibwaga mu mubiri gwani mu buba:si bwone, nakabee ari mu buanga, nakabee ari mu kufwa.

²¹ Okuba kwanye okuba muanga niwe Kristo, no kufwa nigwo omuri:ro.

²² Nawe nikaba muanga mu mubiri, niryo ritwasyo ryo murimu gwani, mbe nitakumenya rinu eni:to:ra.

²³ Nawe eniiganyibwa mbara jo:ne ebiri. Enisigombera okugenda nibe aamwi na Kristo, okuba nikwo kukondere muno.

²⁴ Nawe okuba mu mubiri nikwo kukenerwe muno kurwemwe.

²⁵ Okuba eni:ikanya kutiyo, nimenyere ati, enibao no kwikara aamwi nemwe, korereki mwiyongesyega nimukonderwa mu kwikirisya.

²⁶ Okwikuya kwemwe niwo kufure mu Kristo Yesu kubwani, okuba enija kwimwe rindi.

Obusangi mu kunya:sibwa

²⁷ Nawe muribatega rwa kutyo kwiire Ebigambo byo bwana ebya Kristo. Ariba naja okubarora, amwi nikaba nitario nendere okungwa ebyemwe ati, murumire mu mwoyo gumwi, nimurwaniriraga okwikirisya kwe Bigambo byo bwana na mutima gumwi.

²⁸ Muto:bayaga baremo bemwe mu cigambo co:ne, okuba eco nico ecibarikisyo kata eco kusimagira kwebwe, nawe kwimwe ni cibarikisyo co mweruro, rinu eciso:ka ku Nyamuanga.

²⁹ Okuba nitayabirwe kurwa Kristo, tari kumwikirisya era, nawe no kunya:sibwaga kubwae.

³⁰ Okuba muri no kurwana kunu mwarorere kwanye, na woryanu omungwa ati kuri mwanye.