Baefeso 6 - INDAGANO INYA:YA

¹ Emwe aba:na, mungwega abe:busi bemwe mu Ratabugenyi okuba okwo nikwo kurengere.

² Ubarega esomwana na nyokomwana, nico eciragiro co kwamba cinu cirimo murago,

³ Korereki ubega kisi, uramega siku nyafu ku ca:ro.

⁴ Nemwe be:semwene, mutasindiraga aba:na bemwe, nawe mubarere mu kutongera na mu kweresya kwa Ratabugenyi.

⁵ Emwe abagaya, mungwega be:sobugenyi bo mubiri muri no bu:ba no kuyarara, mukorega no mutima gunu gutarimo burigerige, rwa ku Kristo.

⁶ Mutakoreraga ndorerwa, rwa banu abenda okusi:mwa aba:nu, nawe mukorega no mutima binu Nyamuanga kenda, rwa bagaya ba Kristo.

⁷ Mukorega emirimu no kwiganirisya kwe kisi, nimukorera Ratabugenyi tari ba:nu.

⁸ Mumenyere ati, eco bwana co:ne cinu omu:nu kakora, nico Ratabugenyi arisuba okumuyana, akaba ari mugaya, amwi akaba ari mwibure.

⁹ Nemwe be:sebugenyi, mubakorerega kutiyo, mutaja kubakanga, okuba mumenyere ati, emwe bo:ne muri na Esobugenyi mu rwire, unu atakusoro:ra mu ba:nu.

(8) Barwane oburemo bwo mwoyo

¹⁰ Ebya ku bute:ro, mubega na managa mu Ratabugenyi na mu buinga bwa managa gae.

¹¹ Mufware ebigwato byone ebya Nyamuanga korereki, muture okwimereguru mu burigerige bwa Syetani.

¹² Okuba okurwana kweswe citakurwana na mubiri na manyinga, nawe ecirwana na bakuru na bo buinga na batungi be cisu:te ca magoro ganu, ne bise bye myoyo jo bubi:bi mu mbara ja mu rwire.

¹³ Mbe mugege ebigwato byone bya Nyamuanga, korereki muture okukome:ra ku rusiku orubi:bi, mbe ariba mwamara okukora byone muture okwimereguru.

¹⁴ Mbe mwimereguruga mwiboere ne cimari mu bibunu, na mufwae oburenge:resi rwe cu:ma ca mu bifuba,

¹⁵ Mufware okwira:bira kwe Bigambo byo bwana ebyo murembe mu bigere byemwe.

¹⁶ No kukira byone, mugege inguba yo kwikirisya, inu irakoraga nimutura okusimya emisimu jo:ne ejo muriro ejo mubi:bi.

¹⁷ Mugege na ingofira yo mweruro one, ne cinyambutu co Mwoyo, nigwo Musango gwa Nyamuanga.

¹⁸ Musabwega mwanya gwone mu Mwoyo, no kusabwa kwone no kuremberesya kwone. Mutengeje kurwo kusabwa okwo mu kukome:ra kwone, nimubaremberesisya abe:ru bo:ne.

¹⁹ Nanye one munsabirwe, korereki niyabwe okwaika na:samye omunwa gwani, na:ike no buba:si obumbise bwe Bigambo byo bwana.

²⁰ Nibyo byankorere intumwa niboyerwe orunyoro, korereki na:ike ebyo no buba:si, rwa kutyo kunyiire okwaika.

²¹ Nawe Tukiko, owasu omwendwa no mukosi omwiikanyibwa mu Ratabugenyi, aribabwira go:ne, korereki emwe musombo:kerwe aga:ni.

²² Niwe nabatumira kurwo musango gunu, korereki musombo:kerwe ebyeswe, abafuŋamye emitima jemwe.

²³ Omurembe gubega ku ba:na ba:su, no kwenda aamwi no kwikirisya, binu ebiso:ka ku Nyamuanga Rata na ku Ratabugenyi Yesu Kristo.

²⁴ Ecigongo cibega na ba:nu bo:ne banu abenda Ratabugenyi Yesu Kristo mu cimari.