Baefeso 5 - INDAGANO INYA:YA

(5) Baribatega mu kwenda no bweru

¹ Mbe muru:bega Nyamuanga rwa ba:na abendwa.

² Muribatega mu kwenda, rwa Kristo kutyo abendere emwe, ne:tegayo kurweswe naba ciyanwa ne co:go ku Nyamuanga, okuba ruunyo runu oruunya kisi.

³ Nawe oburomesi amwi bujabi bwone, amwi kurigira, bisige kwaikwa mwimwe, rwa kutyo kwiire abe:ru.

⁴ Nakabee biri bya maswaro, amwi ebisimuro byo butamutamu, amwi ebyo buse:gu binu bitakondere bitaja kwaikwa, nawe akiri okusi:ma.

⁵ Okuba mumenyere ati, omuromesi wo:ne amwi mujabi wo:ne, amwi murigisi wo:ne, niwe unu karamya ebisusano, atana mwandu mu bukama bwa Kristo na Nyamuanga.

⁶ Omu:nu wo:ne asige kubabebeya ne misango ja kutyo era, kuba nijo ejire:ta risungu rya Nyamuanga ku banu batakungwa.

⁷ Mbe musige kusangira nabo.

⁸ Okuba mwariga cisu:te kara, nawe woryanu muri bweru mu Ratabugenyi. Mbe muribatega rwa ba:na bo bweru,

⁹ Okuba amatwasyo go bweru gari mu bufura bwone no burenge:resi no kumasya.

¹⁰ Mukomeresye binu Ratabugenyi kenda.

¹¹ Mutasangiraga ne bikorwa bye cisu:te binu bitakutwasya matwasyo, nawe akiri mubigonye.

¹² Okuba ebyo abakora mu bumbise ni swaro no kubyaika.

¹³ Nawe byone bikagonyibwa, ebibu:risibwa no bweru, okuba cinu co:ne ecibu:risibwa ni bweru.

¹⁴ Kwakorere na:ika ati, Rafya awe, unu uongee, usu:ke mu bafu:ye, Kristo kaja okukwesisya.

¹⁵ Mbe mukabuke muno kutyo omuribata, tari rwa banu batana bwenge, nawe rwa bo bwenge.

¹⁶ Mwicungurirega omwanya okuba ji:siku jinu ni mbi:bi.

¹⁷ Mbe mutabaga banu batana bwenge, nawe musombo:kerwe binu Ratabugenyi kenda kutyo biri.

(6) Be:jure Omwoyo Mweru

¹⁸ Mutakorwaga manji ge mijabibu ganu garimo injogere, nawe mwijure Omwoyo.

¹⁹ Mwaikanega mu jaburi na mu nyimbo jo Mwoyo, mwimbega nimukuya Ratabugenyi mu mitima jemwe.

²⁰ Musi:mega Rata Nyamuanga kusiku kurwe misango jo:ne mwisi:na rya Ratabugenyi Yesu Kristo.

²¹ Mworobanirega mu ku:baya Kristo.

(7) Bakorerane ebye kisi

²² Emwe abagasi, mworoberega abarume bemwe, rwa ku Ratabugenyi.

²³ Okuba omurume niwe omutwe gwo mugasi, rwa Kristo kutyo ni mutwe gwa ikanisa, ka niwe omukisya wo mubiri.

²⁴ Nawe rwa kutyo ikanisa eyungwa Kristo, na bagasi one nikwo kutyo bongwega abarume bebwe mu byone.

²⁵ Emwe abarume, mwendega abagasi bemwe, rwa Kristo kutyo endere ikanisa, ne:tegao kubwayo,

²⁶ Korereki ayesye no kuicuma no kuyosya na manji mu musango.

²⁷ Korereki e:bonere ikanisa ye cibaro itariko ebara, nakabee iri funyo, amwi co:ne cinu ecisusana rwebyo, nawe ibe nyeru itariko burema.

²⁸ Nikwo kutyo kube:ire abarume okwendaga abagasi bebwe rwe mibiri jebwe abene. Unu kenda omugasi wae keyenda omwene.

²⁹ Okuba atario mu:nu unu aratamangenwe no mubiri gwae omwene, nawe kagurisya nagucuma, rwa Kristo kutyo kacuma ikanisa.

³⁰ Okuba ciri byungo byo mubiri gwae.

³¹ Omu:nu nikwo arakoraga nasiga esemwene na nyiramwene, nibagwatana no mugasi wae. Nabo ku bubiri barabaga mubiri gumwi.

³² Obumbise bunu ni bukomee, nawe ena:ika ebya Kristo na ikanisa.

³³ Nawe mwimwe, mu:nu wo:ne endega omugasi wae rwa kutyo eyendere omwene. No mugasi abarega omurume wae.