Baefeso 4 - INDAGANO INYA:YA

Okuribata kwa be:kirisya (1) Baru:be obumwi bwo Mwoyo

¹ Kwenikora nimbaremberesya, anye omuboywa mu Ratabugenyi, ati, muribatega rwa kutyo kwiire okubirikirwa kunu mwabirikiriywe,

² Muribatega mu bwikeya bwone, na mu bwororo, na mu kwigumirisya, nimwigumirisyanya no kwendana.

³ Mukome:rega okurinda obumwi bwo Mwoyo mu kuboywa kwo murembe.

⁴ Omubiri ni gumwi, no Mwoyo ni umwi, rwa kutyo mwabirikiywe mu kwiikanya okumwi okwo kubirikirwa kwemwe.

⁵ Ratabugenyi ni umwi, okwikirisya ni kumwi, okubatija ni kumwi.

⁶ Nyamuanga ni umwi, niwe Esemwene bo:ne, unu atungire byone, katura mu byone na ka ari mu byone.

(2) Bakorere ebiyanwa byebwe

⁷ Nawe buri mu:nu ayaywe ecigongo rwa indengo ye ciyanwa ca Kristo kutyo ciri.

⁸ Kwakorere na:ika ati, Wejire arinya inguru, nagwata jingwatwa, nayana aba:nu ebiyanwa.

⁹ ?Nawe omusango ogwo ati, Arinyire, niki tari okwaika ati, e:kire mu mbara jemwaro eja i:si?

¹⁰ Unu e:kire niwe oyo arinyire inguru muno kukira orwire rwone, korereki aku:misye byone,

¹¹ Omwene nayana abandi okuba jintumwa, na bandi abaragi, na bandi abasimusi be Bigambo byo bwana, na bandi abare:fi na be:igisya,

¹² Babeo kurwo kuku:misya abe:ru, na kurwo murimu gwo kufurubenda, na kurwo kumbaka omubiri gwa Kristo.

¹³ Okukinga runu cirikinga bo:ne mu bumwi bwo kwikirisya, no bwo kusombo:kerwa Omwana wa Nyamuanga, runu cirikinga okuba mu:nu mukuru, okukinga mu ndengo yo bukuru bwo kukumira kwa Kristo.

¹⁴ Cisige kuba ba:na bato:to rindi, niciyemusibwa nicigegwagegwa miyaga jo:ne ejo kwiigisya mu burigerige no bwengebwenge bwa ba:nu, banu abe:te:me:ka ebyo rurimi.

¹⁵ Nawe ca:ikega ebye cimari mu kwenda, korereki mu byone cimukuriremo Kristo niwe omutwe.

¹⁶ Mu:yo omubiri gwone oguumbanyibwa kisi na binu ebire:twa ne byungo byone, rwo kukora kwa indengo ya jimba:ra jo:ne kutyo iri, omubiri nigukura kurwo kwiyumbaka mu kwenda.

(3) Baribate rwa ba:nu abaya:ya

¹⁷ Mbe ena:ika nimbabwira mu Ratabugenyi ati, kuso:ka wori emwe musige kuribata rwa ba:maanga kutyo abaribata mu kwiganirisya kwa kutyo era,

¹⁸ Obwenge bwebwe nibuba cisu:te, ba:uriywe kura no buanga bwa Nyamuanga, kurwo butamenya bunu bubarimo kurwo bukome:e bwe myoyo jebwe.

¹⁹ Okuba batacarumwa, abe:tu:ra mu buromesi, bakorega ebyo bujabi bwone mu kurigira.

²⁰ Nawe emwe mutamwiigiye Kristo kutyo.

²¹ Araba mwamunguywe nimwiigisibwa mu Mwene, rwe bye cimari kutyo biri mu Yesu.

²² Mu bya jintungwa ja kara, emwe mufu:re omu:nu wa kara unu kabora kurwo kurigira kwo rurimi.

²³ Mukorwe baya:ya mu mwoyo gwo kwiganirisya kwemwe.

²⁴ Mufware omu:nu omuya:ya, unu ayangirwe mu rususo rwa Nyamuanga mu burenge:resi na mu bweru bwe cimari.

²⁵ Mbe mufu:re orurimi, mwaikega ebye cimari mu:nu wo:ne no mwikasyanya wae, okuba ciri byungo bya be:ja:su eswe abene:ra.

²⁶ Mukabiirwa mutaja kunyamura. Risu:ba risige kugwa mucabiiywe.

²⁷ Mutayanaga Syetani mwanya.

²⁸ Unu e:baga asige kusuba kwiba, nawe akiri akome:rega mu mirimu, nakora ebye kisi na maboko gae, korereki abega ne co kugabira unu akenere.

²⁹ Omusango gwone omujabi gusige kuso:ka mu kanwa kemwe, nawe jibe ejo bwana jinu jiire okukome:sya unu akenere, korereki banu abongwa bayanwe cigongo.

(4) Batasurumbasyaga Mwoyo Mweru

³⁰ Mutasurumbasyaga Mwoyo Mweru wa Nyamuanga, unu abateeko ecibarikisyo kukinga ku rusiku rwo kucungurwa.

³¹ Okurura kwone na risungu no kubiirwa, na inyombo, no kufuma bibaso:keko aamwi no rwango rwone.

³² Mubega no bufura emwe abene:ra. Mubega no bwira, nimwiswaririrana, rwa kutyo Nyamuanga abe:swaririye emwe mu Kristo.