Baefeso 3 - INDAGANO INYA:YA

Obumbise bwo kubirikirwa kwa ba:maanga

¹ Nikwo enikora, anye Paulo unu ndi muboywa wa Yesu Kristo kurwemwe aba: maanga,

² Araba mwonguywe ebyo bugabi bwe cigongo ca Nyamuanga cinu nayabirwe kurwemwe,

³ Ati, anyeresisye obumbise mu kuswerurirwa, rwa kutyo nambire okwandika mu misango mito:to.

⁴ Ariba mwasoma binu, muritura okusombo:kerwa okumenya kwani mu bumbise bwa Kristo,

⁵ Bunu aba:na ba ba:nu bariga bata:menyere mu maimbo ganu garaturireo, rwa kutyo jintumwa jae abe:ru na baragi bae basweruriywe wori mu Nwoyo,

⁶ Ati, aba:maanga babe bari bo mwandu be:ja:bo, na bo mubiri gumwi, na banu basangiye omurago mu Kristo Yesu mu Bigambo byo bwana.

⁷ Nibyo naberee mukosi wabyo, rwe ciyanwa ce cigongo ca Nyamuanga kutyo ciri, cinu nayabirwe rwo kukora kwa managa gae kutyo kuri.

⁸ Nanye omuto:to kukira abato:to ba mu be:ru bo:ne, nayabirwe ecigongo cinu ati, nisimure mu ba:maanga obuni:bi bwa Kristo bunu butana bute:ro.

⁹ Korereki nimurikirega bo:ne barore obusangi bwo bumbise kutyo buri, bunu kuso:kerera kara na kara ko:ne bwabisirwe mu Nyamuanga unu ayangire byone.

¹⁰ Korereki woryanu obwenge bwa Nyamuanga obwa jinyami jinyafu bumenyeke kubwa ikanisa ku bakuru na ku batungi banu bari mu rwire,

¹¹ Rwo bukarae bwae obwa kajanende kutyo buri, bunu ariga akarariye mu Kristo Yesu Ratabugenyi.

¹² Mu:yo ciri no buba:si bwo kufugera mu kwiikanya kurwo kumwikirisya Oyo.

¹³ Kwenikora ninenda emwe musige kufwa mutima kurwo kunya:ka kwani, okuba nikwo okubabonera rikusyo.

Okusakwa kwa Paulo

¹⁴ Kwenikora ninfukamira Rata,

¹⁵ kuso:ka ku Mwene oruganda rwone orwa mu rwire no rwa ku:si, nikwo orutogwa risi:na,

¹⁶ abayane emwe okurumibwa na managa mu Mwoyo wae mu mu:nu wa munda, rwo buni:bi bwa rikusyo ryae kutyo buri,

¹⁷ Kristo e:karega mu mitima jemwe kurwo kwikirisya, korereki mubega ne misi, murumibwega mu kwenda,

¹⁸ korereki mubega na managa go kumenyegesya aamwi na be:ru bo:ne obugari, no bure:ra, no bwamba, no bwina kutyo biri,

¹⁹ Mumenye okwenda kwa Kristo kunu kukirire okumenya, korereki muku:misibwe kukinga mu kuku:mira kwone okwa Nyamuanga.

²⁰ Mbe akusibwega Unu katura okukora muno kukira byone binu ecisabwa amwi binu eci:ganirisya, rwa managa kutyo gari ganu agakorera mwiswe,

²¹ Niwe akusibwega mu kanisa na mu Kristo Yesu kukinga ku maimbo go:ne ga kajanende na kajanende. Amina.