Baefeso 2 - INDAGANO INYA:YA

Jintungwa ja banu bacari kwikirisya

¹ Nemwe one mwariga mufu:ye kurwe bikayo byemwe ne bibi:bi byemwe,

² Binu mwaribatiragamo kara rwa magoro ge ca:ro rinu kutyo gari, nimuru:baga ebyo mukuru wo buinga bwa mu rutumba, nigwo omwoyo gunu ogukora woryanu mu ba:na bo butongwa.

³ Neswe bo:ne kara caribatiraga aamwi nabo mu kurigira kwe mibiri jeswe, nicikumisya okwenda kwo mubiri no kwa me:ganirisyo geswe, nicibaga aba:na ba risungu mu busimuka rwa bandi.

Abakristo kutyo bari kurwe cigongo

⁴ Nawe Nyamuanga okuba niwe omuni:bi we cigongo kurwo kwenda kwae kwafu kunu acendere eswe,

⁵ Eswe anu cariga cifu:ye kurwe bikayo byeswe, acikorere baanga aamwi na Kristo. Mwaonyibwe kurwe cigongo.

⁶ Nacisu:rura aamwi nage, nacinyanja aamwi mu rwire mu Kristo Yesu.

⁷ Korereki mu magoro ganu garija e:resye obuni:bi bwafu muno obwe cigongo cae mu bufura bunu buri kwiswe mu Kristo Yesu.

⁸ Okuba mwaonyibwe kurwe cigongo kurwo kwikirisya, amwi bitaso:kere kwimwe, nawe ni ciyanwa ca Nyamuanga.

⁹ Bitaso:kere mu bikorwa, mu:nu wo:ne asige kwikuya.

¹⁰ Okuba eswe ciri mirimu jae banu camogeywe mu Kristo Yesu korereki cikore ebikorwa byo bwana, binu Nyamuanga aci:ra:biye kara korereki ciribatiregamo.

¹¹ Mbe mwicuke ati, emwe mwariga muri ba:maanga mu mubiri kara, banu mwatogwaga Batatendere na banu batogwaga Abatende mu mubiri, kunu okukorwa na mabako

¹² Mbe mu siku ijo mwariga muri kura na Kristo mwariga ba:maanga ku ruganda rwa Baisraeli, ka mwariga muri bagenyi ku buragane bwo murago, mwariga mutana kwiikanya, mutana Nyamuanga mu:si.

¹³ Nawe woryanu mu Kristo Yesu, emwe banu mwariga kura kara, woryanu mwafugesibwe kurwa manyinga ga Kristo.

Abayaudi na Ba:maanga baimbirwe mu Kristo

¹⁴ Okuba Omwene niwe omurembe gweswe, unu akorere bibiri byone kuba cimwi, nafumyao indugu ya aagati inu yariga ica:uye.

¹⁵ Wejire amara okuso:syao obusoko kurwo mubiri gwae, nibyo ebiragiro bye mitungirwe jinu jiri mu kuragirira, korereki akore ababiri babe mu:nu umwi muya:ya mu Mwene, nikwo nakora omurembe.

¹⁶ Korereki aba:ikanye ku bubiri ku Nyamuanga mu mubiri gumwi kurwo musaraba, okuba e:tire obusoko ku musaraba ogwo,

¹⁷ Na:ja nasimura Ebigambo byo bwana ebyo murembe kwimwe banu mwariga muri kura na ku banu bariga bari yei.

¹⁸ Okuba kubwoyo eswe cabwene injira yo kumufugerera Rata mu Mwoyo umwi.

¹⁹ Mbe nikwo kutyo mutacari ba:maanga na baitiŋani, nawe muri ba ruganda rumwi aamwi na be:ru, ka muri ba inyumba ya Nyamuanga,

²⁰ Okuba mwombakirwe ku musingi gwa jintumwa na baragi, ribui rinene erya ku sonde niwe Kristo omwene.

²¹ Inyumba yone eyumbakwa kisi mu Mwene, eikura okuba yekaru nyeru mu Ratabugenyi.

²² Nemwe one omumbakwa aamwi mu Mwene, mube bwikaro bwa Nyamuanga mu Mwoyo.